2 Makronika 13
13
Kufuma ka Abhiya, wa ka Judha
(1 Vafumeli 15:1-7)
1Se ka dilembe da digumi ni mtxhanu ni malembe mararu a mfumeli Jerobhowamu, Abhiyasi a to fumela txitimwi ka Israyeli. 2A to fuma malembe mararu Jerusalema; se ditina da mame wakwe i ti ti Mikaya, mwana Uriyeli, wa didhoropa da Gibheya;
se ku to maneka kulwa hagari ka Abhiya ni Jerobhowamu. 3Abhiya a to sawula 400.000 wa vathu e va ruma kuya yimbini, i ti mtxawa wa vavamna vo txhariha ngutu kolwa; Jerobhowamu e longisa 800.000 wa vavamna a nga ti ti va sawute, vavamna va tindena. 4Abhiya a to ema txitimwi ka mmango wa Zemarime, wu ku mimangoni ka Efrayime, a txi khene:
Ni engiseni awe Jerobhowamu ni nanu motshenu va ka Israyeli! 5Kha mi tizivi ti to Mkoma Txizimu txa Israyeli txi ningite wukoma wa va ka Israyeli ka Dhavhidha ni ka vanana vakwe, ngu txitumelelano txa m'nyu kani? 6Kambe Jerobhowamu, mwana Nebhate, txithumi txa Solomoni, mwana Dhavhidha, a to wukela nyamne wakwe. 7A to ramba vavamna vokari va migewu, vanana va sigevenga ve wukela Robhowamu, mwanana wa Solomoni; Robhowamu i ti ngadi dijaha asi na mtamo mbiluni kwakwe, kha ya sikota ku va xula.
8Konkuwa mi pimisa ti to mi na mana mtamo ka wukoma wa Mkoma, awu u ku diwokoni da vanana va Dhavhidha; anu mi vathu votala ngutu, nakona, mi ni marole a nzalama awa Jerobhowamu a nga mi mahela kasiku si va sizimu sanu. 9Kha ma tshotsha hahanze vaphaxeli va Mkoma, vanana va Aroni ni Valevhi se mi ti lavela vaphaxeli vanu kufana ni vathu va matiko mamwani? Mmwani ni mmwani awu a tako e ta phaxela ngu dirole ni mtxhanu wa tihamba ni timbidi koneko a maha mphaxeli wa vale i singako sizimu.
10Aniko athu Mkoma ngene Txizimu txathu, kha hi na mbi mleka; Vaphaxeli ava va thumelako Mkoma vanana va Aroni ni Valevhi. 11Mixo ni minova va hisela Mkoma mningelo wo hiswa, ni dibaselo do bhumula, ve veka ni mapawu a mhamba txitimwi ka meza yo basa, ni minova va layitha ni dilambu da nzalama, nguko athu hi xayisa mithumo ya Mkoma Txizimu txathu, atxi anu mi nga txi leka. 12Wonani Txizimu txi ni nathu masoni kwathu, vaphaxeli va txona va veta mipundu kasi ku mi hangalasa; vanana va ka Israyeli mi nga lweni ni Mkoma Txizimu txa va tate vanu, nguko kha mi na mbi mu xula.
13Jerobhowamu a to veka vathu vo baramela ngu madhawani, kasi kuveta ngu msana kwawe. 14Va ka Judha va txi wona ti to yimbi yi va randete msana ni masoni; va to peka huwa ka Mkoma se vaphaxeli vona ve veta mipundu. 15Se vavamna va ka Judha va to peka tihuwa, Txizimu txi txi engisa tihuwa ta va ka Judha txi to peka Jerobhowamu ni votshe va ka Israyeli ngu lifo masoni ka Abhiya ni ka va ka Judha. 16Se vanana va ka Israyeli va to thava masoni ka va ka Judha, Txizimu txi va ningela manzani ka va ka Judha. 17Ngu mamahelo awa Abhiya ni vathu vakwe va to onhetela ngutu hagari ka va ka Israyeli, nguko va date 500.000 wa vavamna ava va nga ti ti va sawute. 18Se va ka Israyeli va khozisilwe, vanana va ka Judha ve xula nguko va thembile Mkoma Txizimu txa vatate vawe.
19Se Abhiya a to tovela Jerobhowamu e mtekela Bheteli ni makhalo o fumwa ngu ngene, ni Jezana, ni Efroni ni otshe makhalo awa ma fumwako ngu ngene. 20Ngu ka mbimo ya Abhiya Jerobhowamu kha nga ngadi kambe e ma na mtamo a to pekwa ngu Mkoma a fa.
21Abhiya a to tsana ngutu, a to teka digumi da vavasikati ni mune, a veleka magumi mabidi a vanana va majaha ni digumi da mahorana ni mtxhanu ni dimwendo. 22Kasi ngu mithumo ya Abhiya, ni ka sotshe si a nga si maha yi bhatwe ka dibhuku da matimu a mprofeti Idho.
Currently Selected:
2 Makronika 13: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
