2 Makronika 12
12
Mfumeli wa Egipta e vhavhanya didhoropa da ka Judha
(1 Vafumeli 14:25-28)
1Ku to maheka koko taku, mbimo yile Robhowamu a nga tsanisa wukoma, a to leka Mlayo wa Mkoma, ene ni votshe va ka Israyeli. 2Se ku to maheka tito, ka dilembe da wutxhanu da mfumeli Robhowamu, Sisake mfumeli wa Egipta, a to kwelela a txiya wukela Jerusalema (nguko va ti ti tshuralete Mkoma.) 3A ti ti ni 1.200 wa sikotxikani ni 60.000 wa vagadhi va mahantxhi; ni vathu votala ngutu a nga ta navo ngu Egipta, va ka Libhiya ni va ka Suka ni va Etiyopiya. 4Se a to honyola madhoropa a hombe ale Judha a nga ti nawo, se e tsula Jerusalema.
5Sekoko mprofeti Semaya a to ta ka Robhowamu ni ka vathangeli va va ka Judha a ava va nga ti ti sengeletanile Jerusalema ngu mhaka ya Sisake, a txi khene: Mkoma a womba tiya: Anu mi ni lekile, nani ni mi lekile manzani ka Sisake.
6Sekoko vathangeli va Israyeli ni mfumeli va to ti veka hahatshi, va txi kha vona:
Mkoma a lulamile.
7Mbimo yile Mkoma a nga wona ku va ti vekile hahatshi, a to rumela dipswi dakwe ka Semaya, a txi khene:
Mi ti vekile hahatshi, kha na mbi mi xasela; ngu kukuluveta ni na mi ninga wukhalo awu mi no barama ka wona, kasi ku kuhenya kwangu ku si thekeli txitimwi ka Jerusalema, ngu manza da Sisake. 8Sekoko mi na maha sithumi sakwe, kasi kuza mi ziva ti to kuthumela ani ni kuthumela mifumo ya ha mafuni ku hambanile.
9Sisake koko i ku mfumeli wa Egipta, a to wukela Jerusalema, e teka tithomba ta Nyumbani ka Mkoma, ni tithomba ta nyumbani ka mfumeli; a to teka sotshe sitxhangu sa nzalama asi a nga ti si mahile Solomoni. 10Se ka wukhalo wa sona, mfumeli Robhowamu a to maha sitxhangu sa koporo, e si ningela manzani ka vathangeli va yimbi, va txi wonelela txike txa nyumba ya mfumeli. 11Se ku to maheka a ti to mbimo yile mfumeli a nga txi wulela Nyumbani ka Mkoma, va woneleti vakwe va txi teka sivhikelo ve wulela naso, ve gwita si wuyiswa ka dizumbo dawe. 12Se ene a to ti veka hahatshi, Mkoma a to thavisa kuhenya kwakwe txitimwi kwawe, kasi ku asi va fuvisi votshe; nguko Judha ku ti ni silo sa sinene.
Ati a nga fumisa tona Robhowamu
13Se mbimo yile mfumeli Robhowamu mwana Solomoni, a nga fuma Judha; a to khata kufuma a di ni mune wa magumi a malembe ni dimwedo, se a to fumela Jerusalema digumi da malembe ni mtxhanu ni mambidi, ka didhoropa dile Mkoma a ngadi sawula hagari ka totshe tihunzu ta ka Israyeli kasi kuveka ditina dakwe kona; se ditina da mwamwakwe i ti ti Nahama Muamoni. 14A to maha ta kwa mbi lulama, nguko kha lava Mkoma ngu mbilu yakwe yotshe.
15Kasi ngu kutala ka mithumo ya Robhowamu ni ka toshe ti a nga ti maha ti nga va ti sa bhalwa ka mabhuku a matimu a Semaya mprofeti, ni a Idho muhuti, madingano ni tihunzu tawe. Se ku to maneka kulwa hagari ka Robhowamu ni Jerobhowamu ka masiku awe otshe. 16Se Robhowamu a to otela ka vatate vakwe, e tshotshwa didhoropani ka Dhavhidha; Abhiya mwanana wakwe a to fuma ka wukhalo wakwe.
Currently Selected:
2 Makronika 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
