1 Samuwele 31
31
Kufa ka Sawule ni ka vanana vakwe
(1 Makronika 10:1-12)
1Vafilista koko, va to lwa ni va ka Israyeli; se vavamna va ka Israyeli va to tutuma masoni ka Vafilista, kambe ku to dawa votala mmangoni ka Gilibhoya. 2Se Vafilista va to randela Sawule ni vanana vakwe, ve daya Jonatani, ni Abhinadhabhi, ni Malkisuwa, vanana va Sawule. 3Se kulwa ko wukela Sawule ku toya masoni, kambe vafuli va to mmana, aniko a to thava ngutu ngu mhaka ya vafuli. 4Sekoko Sawule a to khene ka mrwali wa matxhari akwe: Thavisa ditxhari dako u ni thola ngu dona, kasiku vanyamakhutu vava va si ti ve ta ni daya ni ku ni tseketsela. Kambe mrwali wa matxhari akwe kha tumela, nguko a ti ti thava ngutu; sekoko Sawule a to teka ditxhari e ti thola ngu dona. 5A di ti woni koko, mrwali wa matxhari akwe to Sawule a fite, nene a to teka ditxhari dakwe e ti daya efa kumweko ni Sawule. 6Ngu kumaha keto, Sawule a to fa ni vanana vakwe va vararu, ni mrwali wa matxhari akwe, ni votshe vathu vakwe va to fa kumweko nayo ka dona ditshiku dile. 7Se ngako va di ti woni vavamna va ka Israyeli, vale va nga ti didhawani ka mkova ni ka didhawa da khenu Jordhani, taku vavamna va ka Israyeli va tutumile, ni ti to Sawule ni vanana vakwe va ti ti datwe, va to leka madhoropa ve tutuma; se Vafilista va to ta, ve ta zumba ka ona.
8Ku to maheka koko, taku, va di tile Vafilista ka ditshiku dimwani ku ta handa ka sirumbi sile, va to mana Sawule ni vanana vakwe va vararu va di fite mmangoni ka Gilibhoya. 9Se va to wila msungo wakwe, ve teka matxhari akwe, ve rumela kuya zivisa ka dotshe ditiko da Vafilista, ni dithepeleni ka sithombe sawe ni ka vathu. 10Se va to veka matxhari akwe dithepeleni kona Axitarote, kambe txirumbi txakwe va to ya txigogotela ka diguma da Bheti-Seyani. 11Sekoko ngako vaaki va Jebhesi-Gileyadhi va di pfite, tile Vafilista va nga maha ka Sawule, 12votshe vavamna va mtamo va to khukha, ve tsimbila wusiku wotshe, veya thavisa txirumbi txa Sawule ni sirumbi sa vanana vakwe digumani ka Bheti-Seyani, ve tsula naso Jebhesi veya si hisa kona. 13Se va to teka marambu a kona ve ma kelela hahatshi ka mdonga, kona Jebhesi, ve ti tona sakudya mtxhanu wa masiku ni mambidi.
Currently Selected:
1 Samuwele 31: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
