1 Samuwele 30
30
Yimbi yo wukela Vaamaleki
1Ku to maheka koko taku, mbimo yile Dhavhidha ni vathu vakwe va nga hoka didhoropani ka Zikilage ngu ditshiku da wuraru, Vaamaleki va ti xasete Wulambwe ni didhoropa da Zikilage, va ti hoxotile didhoropa da Zikilage, ve di hisa ngu mndilo. 2Se va to teka vavasikati vale va nga ti ka dona, ve va maha tikhumbi, kambe kha va daya m'thu ni wammweyo, hambi wam'dotho mwendo wa hombe; va to va teka dwe ve tsula navo. 3Se Dhavhidha ni vathu vakwe va to ya didhoropani, va to di mana di di hisilwe ngu mndilo, se vasikati vawe, ni vanana vawe va majaha ni vamahorana, va to tekwa ve yiswa wukhumbini. 4Sekoko Dhavhidha ni vathu vale a nga ti navo va to pekeletela tihuwa ve dila, kala kuza ve guma mtamo wo dila. 5#Wona ni ka: 1 Sam. 25:42-43. Vasikati va Dhavhidha va vambidi va to tekwa ni vona ve yiswa wukhumbini; Ayinowami, mujezireyeli, ni Abhigayeli, msikati wa Nabhali, mukarimeli. 6Se Dhavhidha a to henya ngutu, nguko vathu va ti ti womba-womba ngu kulava ku m'balisela ngu marigwi, nguko timbilu ta vathu votshe ti ti kuxanisekani, mmwani ni mmwani ngu mhaka ya vanana vakwe va majaha ni vamahorana; hambi keto Dhavhidha a to tsana ka Mkoma, Txizimu txakwe. 7#Wona ni ka: 1 Sam. 22:20-23. Se Dhavhidha a to khene ka mphaxeli Abhiyatari, mwana Ayimeleki: Na ku kombela, ni tisele efodhe hawa. Se Abhiyatari a to tisa efodhe ka Dhavhidha. 8Sekoko Dhavhidha a to wotisa ka Mkoma a txi khene: Ina ni nga wulondeta mtxawa wuwa wa masotxhwa kani? Ina na wu mana kani? Se Mkoma a to m'gela ku khene: Wu londete, nguko ngu ditshuri u na wu mana kambe u txhatxhisa sotshe.
9A to khukha koko, Dhavhidha, ni 600 wa vavamna vale a nga ti navo, se veya hoka txinambwanani ka Bhesori, ahale va nga ya ema kona vale va nga ti sate ngu msana. 10Se Dhavhidha a to londeta Vaamaleki, ene ni 400 wa vavamna, nguko 200 wa vavamna va ti sate msana, kha va sikota kutxhatuka txinambwana txa Bhesori, ngu kukarala ngutu.
11Se va to mana wa wamwamna wa Muegipta libalani ve mu yisa ka Dhavhidha; va to mninga sakudya, e dya, ve mninga ni mati e sela. 12Va to mninga ni txibhutwana txa makuwa o oma, ni sizangwa simbidi sa mauvha e dya; se a to mana mtamo, nguko ku ti ti pindile masiku mararu ni wusiku wa kona a sa dya sakudya, ni kusela mati. 13Sekoko Dhavhidha a to m'gela ku khene: U waka mani awe, ni ku u ta ngu hani kani? Se mfana wule wa Muegipta a to khene: Ni txithumi txa wa wamwamna wa muamaleki, kambe nyamne wangu a ni lekile, nguko ni hetile masiku mararu ni txi lwala. 14Athu hi ti ko ya xasela didhawa da wulambwe ka Vakereti, ni didhawa da va ka Judha, ni didhawa da wulambwe ka Vakalebhi, hi hisa ni didhoropa da Zikilagi.
15Se Dhavhidha a to khene kwakwe: Ina u nga relela, u ni heleketa ka mtxawa ewo wa masotxhwa kani? Se a to khene: Xambanya ka Txizimu ti to khu na mbi ni daya, hambi ku ni ningela manzani ka nyamne wangu, se ni na relela ni kuheleketa ka mtxawa ewo wa masotxhwa.
16Se a to relela e mu heleketa. Kambe va to ya va mana va di hangalakile ka otshe madhawa a ditiko, va txidya, ni kusela, ni kusinya, ngu mhaka ya sotshe sile va nga handa ditikoni ka Vafilista ni ditikoni ka va ka Judha. 17Se Dhavhidha a to va xasela, kukhukhela ni mixo kala ni minova ya mangwananani ka kona, kha ka huluka ni wammweyo, hahanze ka 400 wa majaha dwe ale ma nga gadha makamelu, me tutuma. 18Ngu kumaha keto, Dhavhidha a to txhatxhisa sotshe sile si nga ti tekilwe ngu Vaamaleki; e txhatxhisa ni vasikati vakwe vavambidi. 19Aniko kha pwata ni wammweyo, kukhukhela ka wam'dotho kala ka wa hombe, ni kala ka vanana va majaha ni vamahorana; ni kukhukhela ka sile so handwa kala ka sotshe sile va nga ti teketwe; sotshe Dhavhidha a to wuya naso. 20Dhavhidha a to teka kambe totshe tinvuta ni tihomu ta mikati, se veya ti pata ka simwani sifuyo, va txi kha vona: Asiya si handilwe ngu Dhavhidha.
21Se mbimo yile Dhavhidha a nga hoka ka vavamna vale va 200, vale va nga ti karate ngutu, ve tandeka kulondeta Dhavhidha, ve sala txinambwanani ka Bhesori, va to huma ve hingeta Dhavhidha ni vathu vale a nga ti wuya navo; a di va hokete Dhavhidha a to va losa ngu kudikha. 22Sekoko votshe vabihi ni vanana va Bheliyali, i ku vamwevo ka vavamna vale va nga ti tsute ni Dhavhidha, va to xamula va txi kha vona: Evo va nga mbi tsula ni nathu, kha hi na mbi va ninga sile hi nga handa; kambe mmweyo ni mmweyo a na teke msikati wakwe ni vanana vakwe e tsula.
23Kambe Dhavhidha a to khene: Mi nga maheni eto vanathu, nguko siya hi ningilwe ngu Mkoma, a hi xayisile ni kuningela mtxawa wa masotxhwa manzani kwathu, ale ma nga ti ta ku ta hi wukela. 24Se i mani wu a ndi no mi engisa ka to fana ni tiya kani? Nguko txyavelo txa vale va nga ti ti yite yimbini txi na lumba vale va nga ti ti sate ni thundu; va na abaniselwa ngu kufana.
25Kukhukhela ka ditshiku donedo ni kuya masoni ku to mahisa toneto, a to si veka kuva txileleto ni txihena ka va ka Israyeli, kala ka ditshiku da nyamsi.
26Se mbimo yile Dhavhidha a nga hoka Zikilage, a to rumela sile so handwa ka madhota a ka Judha, i ku vangana vakwe, a txi khene: Dikatonyana diya danu, da sile hi nga ya handa ka valala va Mkoma:
27Ka vale va ku Bheteli, ni va Ramoti ka Wulambwe, ni va Jatiri, 28ni va Aroweri, ni va Sifimote, ni va Estemowa, 29ni va Rakali, ni ka vale va nga ti ti madhoropani ka Vajerameyeli, ni ka madhoropa a Vakeni, 30ni va Horima, ni va Bhorasani, ni va Atace, 31ni va Hebroni, ni ka otshe makhalo ale a nga tsimbila ka ona Dhavhidha, ene ni vathu vakwe.
Currently Selected:
1 Samuwele 30: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
