1 Samuwele 20
20
Jonatani e vhuna Dhavhidha
1Sekoko Dhavhidha a to tutuma ngu Nayote, kona Rama, eya masoni ka Jonatani, a txi ya khene: Ni onhile txani kani? Mnandu muni ni ku nawo kani? Ngu txihi txionho txangu masoni ka tate wako, a ku a lavako ku ni daya kani?
2Se ene a to m'gela ku khene: Hi nga toneto; khu na mbi fa! Wona taku, tate wangu kha mahi mhaka ya hombe hambi ya yidotho, asi thanga ngu ku ni zivisa; ngu kutxani koko, tate wangu a nga ni sisela mhaka yo fana ni yiya kani? Hi nga tona eto!
3Sekoko Dhavhidha a to xambanya kambe, a txi khene: Tate wako wa tiziva kha kwati to ni mani dikato masoni kwako; ngu kumaha keto, a to khene: A nga yi zive Jonatani mhaka yi ya nguko yi nga mpanda; se kha ditshuri, ni xambanya ngu Mkoma wu a hanyako, ni muhefemulo wako wu hanyako, ku to sala dizambo dimwedo dwe ku ni hoka kufani.
4Se Jonatani a to khene ka Dhavhidha: Ati moya wako wu ti lavako ni na ku mahela tona.
5 # Wona ni ka: Mit. 28:11. Dhavhidha a to khene ka Jonatani: Wona taku mangwana ngu meka ka mtxima wa wuphya, ditshiku di ni tolovelako ku khalahatshi ni mfumeli hi txidya; ni leke ni tsula, aniko ni na ya barama thembweni, kala ka minova ya ditshiku da wuraru. 6Se ngako tate wako a txi wotisa ngu kupwateka kwangu, u na khawe: Dhavhidha a ni kombete ngutu ti to ni mtumelela ku e tutuma eya Bhetlehema, didhoropani kwawe; ngu ku kumahwako kheyo mphaxo wa dilembe ni dilembe wa lixaka lakwe. 7Se ngako a txi khene: Ngu tona! Sekoko txithumi txako txi na mana kudikha. Kambe nga ku a txo henya ngutu, u na ti ziviva taku a ni makungo o biha ngutu. 8Pfela wumbilu koko, txithumi txako, nguko u mahile ti to txithumi txako txi wulela ni nawe ka txitulelelano txa Mkoma; se ngako ku di ni wubihi wokari kwangu, ni daye awe wupune; ngu kutxani u lava ku ni heleketa ka tate wako kani?
9Sekoko Jonatani a to khene: Ti nave kule ni nawe timhaketo; kambe i ti ko na tiziva kha kwati ti to tate wangu a lava ku kulovisa, ina ni di na lamba ku kugela kani?
10Se Dhavhidha a to khene ka Jonatani: Ni na ziviswa ngu mani, ngako tate wako a txi kuxamula ngu mapswi o nemela kani?
11Sekoko Jonatani a to khene ka Dhavhidha: Ngono, a hi tsimbile thembweni. Se va to huma ngu wumbidi wawe ve tsula thembweni. 12Se Jonatani a to khene ka Dhavhidha: Mkoma, Txizimu txa Israyeli, a nave fakazi. Ni txi xolisisa ani ka tate wangu, mangwana ngu mbimo yo yi, mwendo kupinda mangwana, se ni mana to kari xungetano ni Dhavhidha, ni nani, sekoko ni si ku rumeli hambi ku kuzivisa, 13Mkoma a na mahe toneto ka Jonatani ni kupinda; aniko ngako tate wangu a txi lava ku ku mahela to biha, ni na kuzivisa ni tona, kambe ni na kuleka u khukha, u tsula ngu kudikha; se Mkoma a nave ni nawe, ku nga kule a nga ni tate wangu. 14Sekoko ngako ani ni txi ngadi ni hanya, ina wu na ni mahela wumbilu wa Mkoma, kasiku ni si fi kani? 15#Wona ni ka: 2 Sam. 9:1. Ni ka kudotho u nga wile wumbilu wako wa kwa mbi guma ka nyumba yangu; hambi mbimo yi Mkoma a no wila votshe valala va Dhavhidha ha mafuni. 16Ngu kumaha keto, Jonatani a to maha txitumelelano ni nyumba ya Dhavhidha, a txi khene: Mkoma a na ti photele ka dianza da valala va Dhavhidha.
17Se Jonatani a to xambanyisa Dhavhidha kambe, nguko a ti mdhunda; nguko a ti mranda ngu lotshe lirando la mbilu yakwe. 18Se Jonatani a to khene kwakwe:
Mangwana ngu meka ka mtxima wa wuphya, aniko kha va na mbi kumana ka wukhalo wako, se txikhalo txako txi na maneka txi si ngani m'thu. 19Se ngako u txi pwateka masiku mararu, relela ngu kukuluveta u ya ka wukhalo wule u nga ti baramile ka wona ngu ditshiku da mahungu; wu ya zumba hafuhi ni dirigwi da Ezeli. 20Se ani ni na rinza tingove tiraru tiya ka didhawa dile, ni txi nga no rinzela txokari. 21Se ni na ruma mfana, ni txi khani: Tsula u ya teka tingove; aniko ngako ni txi khani ka mfana: Wona, tingove ti didhawa da kheno kwako, teka u ta nato; ngono, nguko ku ni kudikha kwako, kha ku na txilo, ni xambanya ngu Mkoma wu a hanyako. 22Kambe ni txi khani ka mfana: Wona, tingove ti didhawa ka khe kwako. Tsula, nguko Mkoma a lava ti to u tsula. 23Se ka timhaka tile hi nga womba-womba awe ni nani, wona taku Mkoma a hagari kwangu ni nawe, kala kupinduka.
24Se Dhavhidha koko, a to ya barama txitingani; se, ngu kumeka ka mtxima wa wuphya, mfumeli a to khalahatsha ha mezani kasi kudya sakudya. 25Se ngako mfumeli a di khalahatshile ha txikhaloni kwakwe, kufana ni simwani sikhati, ka wukhalo wa hafuhi ni diseta, Jonatani a to khukha, kambe Abhineri e ta khalahatshi didhawani ka Sawule; kambe wukhalo wa Dhavhidha wu to sala u si nga ni m'thu. 26Aniko ka ditshiku donedo, Sawule kha womba txilo, nguko a ti ti khene: Dhavhidha a to humelelwa ngu to maha, kutilava kha basa; kha ditshuri kha basa.
27Ti to maheka kambe ka dimwani ditshiku, i ku da wumbidi da kumeka ka mtxima wa wuphya, ti to wukhalo wa Dhavhidha wu maneka wu si nga ni m'thu; Sawule a to khene koko ka Jonatani, mwanana wakwe: Ngu kutxani mwanana wa Jese a nga mbi ta kutadya sakudya, nyamnova ni nyamsi kani?
28Se Jonatani a to xamula Sawule, a txi khene: Dhavhidha a to ni kombela ku ni mtumelela kuya Bhetlehema, 29a txi khene: Ni kombela ti to u ni leka ni tsula, nguko ku ni mphaxo wa lixaka lathu didhoropani, se mwanathu a ni dhani ku ni tsula. Ngako koko, konkuwa, ni nga mana kukateka masoni kwako, na ku kombela ti to ni leke ni tsula, ni ya wona vanathu. Ngu kumaha keto, kha ya ta mezani ka mfumeli.
30Sekoko Sawule a to henyela Jonatani, a txi m'gela tiya: Mwanana wa txiphukuphuku, wa kwa mbi na tinzeve; ina ani kha ni tizivi ti to awe u sawula mwanana wa Jese, kuva tingana tako ni tingana ta wumbwiri wa mame wako kani? 31Nguko masiku otshe ale mwanana wa Jese a no hanya ha mafuni, awe khu na mbi tsana, hambi mfumo wako, ngu kumaha keto, rumela vo ya mteka a txi ta hawa konkuwa, nguko a fanelwa ngu kufa.
32Sekoko Jonatani a to xamula ka Sawule, tate wakwe, a txi khene: A na dawelwa txani kani? A mahile txani kani?
33Sekoko Sawule a to mrinza ditxhari dakwe a txi lava ku m'daya; ngu kumaha keto, Jonatani a to pfisisa makungo a tate wakwe o daya Dhavhidha. 34Ngu toneto, Jonatani ngu henya ngutu, a to khukha ha mezani, e tshukula ni sakudya ngu ditshiku da wumbidi da kumeka ka mtxima wa wuphya; nguko a ti ti pandiseka ngu mhaka ya Dhavhidha, ngu kule tate wakwe a nga ti mxanisile. 35Se ku to maheka taku, ni mixo Jonatani a to huma eya thembweni, ngu mbimo yile a nga ti langani ni Dhavhidha, kumweko ni mfana wam'dotho. 36Sekoko a to khene ka mfana wakwe: Tutuma u ya teka tingove ti ni no rinza. Mfana koko, a to tutuma, se Jonatani a to rinza lingove li ya wela masoni kwakwe. 37Se mbimo yile mfana a nga hoka ka wukhalo wule Jonatani a nga rinza ka wona lingove, Jonatani a to kwangula, a txi khene ka mfana: Ina lingove li nga masoni kwako kani? 38Se Jonatani a to engeta e kwangula, a txi khene ka mfana: Kuluveta, tutuma, u nga swele. Se mfana wa Jonatani a to rola tingove, e wuya na to ka nyamne wakwe. 39Kambe mfana kha ziva ta txilo; mhaka ya kona yi ti ti ziwa ngu Jonatani ni Dhavhidha dwe. 40Sekoko Jonatani a to ningela matxhari akwe ka mfana wule a nga ti nayo, a txi khene kwakwe: Tsula nawo didhoropani. 41Se ngako mfana a di tsute, Dhavhidha a to khukha e wonetela didhawa da wulambwe, e ti wisa hahatshi ngu khohe yakwe, e khizama kuraru; kambe va to nyuntana, ve dila votshe, aha koza Dhavhidha e dila ngutu. 42Se Jonatani a to khene ka Dhavhidha: Tsula ngu kudikha! Nguko athu hi xambanyile hotshe vavambidi ngu ditina da Mkoma, hi txi khathu: Mkoma a nave hagari kwangu ni nawe kala kupinduka, ni hagari ka liveleko langu ni liveleko lako. 43Sekoko Dhavhidha a to khukha e tsula; se Jonatani a to wulela didhoropani.
Currently Selected:
1 Samuwele 20: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
