1 Vafumeli 5
5
Solomoni e lulamisela kuaka Dithepele
(2 Makronika 2:1-18)
1Hiramu, mfumeli wa Tiro, a to rumela sithumi sakwe ka Solomoni (nguko a nga pfa taku Solomoni a totilwe wukoma wukhaloni ka tate wakwe), nguko Hiramu a ti dhunda Dhavhidha. 2Sekoko, Solomoni a to rumela ka Hiramu kuya womba tiya:
3Kha ditshuri wa tiziva ti taku tate wangu Dhavhidha kha sikota kuakela nyumba ditina da Mkoma, Txizimu txakwe, ngu mhaka ya kurandelwa ngu tiyimbi, kuza kuhoka aha Mkoma a nga va veka hahatshi ka mikondo yakwe. 4Ngu konaho koko, Mkoma, Txizimu txangu, a ni ningile kuhumula ngu ka otshe madhawa; kha ku nga ni mlala, kambe kha ni mani txikarato ni txa tximwetxo. 5Se ani ni lava kuduketa kuakela nyumba ditina da Mkoma, Txizimu txangu, nga ti Mkoma a nga wombisa tona ka Dhavhidha, tate wangu, a txi khene: Mwanana wako, awu ni no m'veka ha wukhaloni kwako ka wukoma, eyo a na akela nyumba ditina dangu. 6Ruma koko, konakuwa, a ti to ngu Libhanoni va txi wila mikedhari, se sithumi sangu si na va kumweko ni sako, se ani ni na dihela sithumi sako, madingano ni ti u no wombisa tona; nguko awe wa tiziva kha kwati ti to ani ni nawe awalo a sikotako kuwila mapulango nga Vasidhoni.
7Ngako Hiramu a di pfite mapswi a Solomoni, a to tsaka ngutu, a txi khene:
A na dhumiswe nyamsi Mkoma, a nga ninga ka Dhavhidha mwanana wo ziva txitimwi ka vathu vava vo talisa tiya.
8Se Hiramu a to rumela ditpswi ka Solomoni, a txi khene: Ni ti pfite ti u nga rumela ku ta ni gela. Ni na maha kotshe kuranda kwako ngu mikedhari ni mikipresi. 9Sithumi sangu si na ma rwala kukhukhela Libhanoni kala lineneni, se ani ni na va ruma kuheleketa ngu sitataru ngu lineneni kala ka wukhalo wu u no ni elela kuya veka kona; se awe u na ma amukela; na nawe u na maha ti ni no ti lava, u na dyisa m'ti wangu.
10Ngu toneto, Hiramu a to ninga mapulango a mikedhari ni a mikipresi ka Solomoni, madingano ni kuranda kwakwe. 11Se Solomoni a to ninga ka Hiramu 20.000 wa tipimo ta hombe ya fulaho, kasi kudyisa m'ti wakwe, ni magumi mambidi a tipimo ta hombe ta mafura amanene; eso Solomoni a ti ninga Hiramu, dilembe ni dilembe.
12Sekoko Mkoma a to ninga Solomoni wuzivi nga ti a nga ti thembisile; ku to maneka kuthutha hagari ka Hiramu ni Solomoni, ngu wumbidi wawe va to sunga txitumelelano.
13Se mfumeli Solomoni a to dhana sithumi hagari ka Israyeli, ngu mtengo wa 30.000 wa vavamna. 14Se a to va rumela Libhanoni, ngu mtxima i ti 10.000 dwe; ve thuma mtxima wumwewo Libhanoni, se mitxima yimbidi ve maneka mitini kwawe; se va ti thangelwa ngu Adhoniramu. 15Solomoni a ti navo kambe 70.000 va nga ti ti rwala siya, ni 80.000 va nga ti ti wilela mimangoni. 16Vathangeli va Solomoni va i nga ti madhota akwe, va nga ti tsimbitisa kuaka kuleya, i ti ti 3.300, ngu vona va nga ti thangela vathu ka mthumo wa kuaka kuleya. 17Mfumeli se a to rumela ti to ve tisa marigwi a hombe ni a lisima, marigwi o vatelwa, ku ta khatisa ngu ona nyumba. 18Se ma to vatelwa ngu vaaki va Solomoni, ni va Hiramu, ni va Gebhalita; se va ti ti vatela mapulango ni marigwi kasi kuaka nyumba.
Currently Selected:
1 Vafumeli 5: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
