1 Vafumeli 4
4
Sithumi sa Solomoni
1Ngu toneto, Solomoni a to va mfumeli wa dotshe ditiko da ka Israyeli. 2Se vathangeli va nawo ngu vava:
Azariya, mwanana wa Zadhoki, mphaxeli;
3Eliyorefi ni Ayiya, vanana va Sisa, vamabhalani; Josafati, mwanana wa Ayiludhi, mxayisi;
4Bhenaya, mwanana wa Joyadha, mthangeli wa yimbi; Zadhoki ni Abhiyatari i ti ti vaphaxeli.
5Se Azariya, mwanana wa Nathani, i ti mthangeli wa tinduna; ni Zabhudhi, mwanana wa Nathani, mthangeli wa hombe, mngana wa mfumeli;
6i Ayisari, mxayisi wa tithomba; Adhoniramu, mwana Abhidha, msengisi wa nduvo.
7Se Solomoni a ti ni digumi da vathangeli ni vambidi ka dotshe ditiko da ka Israyeli, va nga ti emela m'ti wa mfumeli; se mmweyo ni mmweyo a ti dingana kuthuma mtxima wumwewo ngu dilembe. 8Se matina awe ngu awa:
Bheni-huri, mimangoni ka Efrayime;
9Bheni-Dhekeri, a ti ti kona Makasi, ni Sahalibimi, ni Bheti-Semesi, ni Eloni, ni Bheti-Hanani;
10Bheni-Hesedhi, e maneka Arubhoti; kambe a ti ti ni ditiko da Soko ni dotshe da Heferi;
11Bheni-Abhinadhabhi, ngu ka otshe madhawa a Dhori: A ti ni Tafati, mwana Solomoni, kota msikati wakwe;
12Bhahana, mwana wa Ayiludhi, a ti ni Tahanake, ni Megidhu, ni dotshe da Bheti-Seyani, ku ku hafuhi ni Zaritana, hahatshi ka Jezreyele, kukhukhela Bheti-Seyani kala Abhele-Meyola, kala kambe magwito ka Jokimeyami;
13Bheni-Gebheri, i ku madhoropa a Ramoti-Gileyadhi; ku ti ti ni mikhokhola ya Jayiri, mwana Manasi, ayi yi manekako kona Gileyadhi; kambe ngu magwito ka Argobhe ku manekako Bhasani, ku ti ti ni mtxhanu wa magumi ni dimwedo a madhoropa a hombe o bhiywa ngu maguma a tisimbi ni koporo.
14Ayinadhabhi, mwana Idho, a teka Mahanayime;
15Ayimahasi, a ti ti maneka Naftali; kambe a ti tekile Bhasemate, mwana Solomoni, eva msikati wakwe;
16Bhahana, mwana Husayi, e lumbana ni Aseri ni Bheyoloti;
17Josafa, mwana Paruwa, e maneka Isakari;
18Simeyi, mwana Ela, e maneka Bhenjamini; 19Gebheri, mwana Uri, ditikoni ka Gileyadhi, ditiko da Seyomi, mfumeli wa Vaamori, ni da Oge, mfumeli wa Bhasani; ku ti kova ni mtxawa wumwewo wo vhikela ditiko dile.
Kuhumelela ka mfumo wa Solomoni
20Kunene, va ka Judha ni va ka Israyeli i ti vavangi, kufana ni mtxhefa wa mabambe ka linene, ngu wungi wawe, vedya, ve sela, ni kutitsakela. 21Solomoni a ti ti khozisa yotshe mifumo kukhukhela mnamboni ka Ewufrate, kala ditikoni ka Vafilista, kala magwito ka Egipta; va ti mluva ni ku mthumela ka otshe masiku a kuhanya kwakwe.
22Sakudya sa Solomoni i ti sa mpimo wa magumi mararu a mpupu wa fulaho, ni mtxhanu wa magumi ni dimwedo a mpupu wa timwani tixaka ditshiku ni ditshiku, 23digumi da a tihomu to nona, ni magumi mambidi a tihomu titako ngu ka vadyisi, ni 100 wa tinvuta, na hi si wombi ngu tixangu, timhoti, ni timbavala, ni sinyana so fuywa.
24Nguko a ti ti fumela sotshe si si nga ti ti ho mtxhatuko ka Ewufrate ngu didhawa da kheno kwakwe, kukhukhela Tifisa kala Gaza, ngu ka votshe vafumeli; a ti ti ni kuthutha ni matiko aawa a nga ti gwatamile nawo. 25Se Judha ni Israyeli va ti zumba va di tsani, mmweyo ni mmweyo hahatshi ka mvhina wakwe ni mkuwu wakwe, kukhukhela Dhani kala Bhersebha, ka otshe masiku a Solomoni.
26Kambe Solomoni a ti ti ni 40.000 wa mahantxhi o ndinda sikotxikani sa tiyimbi, ni 12.000 wa vagadhi. 27Vathangeli va sigava ni sigava, va ti heleketa sakudya si a nga ti si lava mfumeli Solomoni mtxima ni mtxima, ku ti si pwateki ni txilo tximwetxo. 28Va ti heleketa kumweko ni sevhadha, ni mwasi wa kudyisa mahantxhi o ndinda sikotxikani sa yimbi, ni hani ha a nga ti maneka kona mfumeli, madingano ni sileleto sa kona.
29Kambe Txizimu txi ningile wutxhari ka Solomoni, mapimo a hombe ngutu ni wuzivi wo talisa ku nga mtxhefa wa mabambe ka linene. 30Wutxhari wa Solomoni i ti wa hombe kupinda wutxhari wa votshe vathu va Wutxani, ni kupinda wotshe wutxhari Vaegipta. 31A ti tiziva ngutu kupinda votshe vathu, ni kupinda Etami, muezira, ni kupinda Hamani, ni Kalikoli ni Dhardha, i ku vanana va Maholi; se nduma yakwe yi to pfala ka matiko otshe ma nga ti madhawani kwakwe. 32#Wona ni ka: Mav. 1:1; 10:1; 25:1; Nda. 1:1. A sikile 3.000 wa mavingu, se tindando takwe i 1.005. 33A womba-wombile ngu tixaka totshe ta mindonga, kukhata ngu mkedhari wa Libhanoni, kala ka hisope wu milako digumani, kambe a wombawombile ngu sihari ni sinyana, ngu so tsimbila ngu dibindi ni sihaka. 34Votshe vathu va tile ku ta pfa wutxhari wa Solomoni, kumweko ni mitumi ya votshe vafumeli va mafu, vale va nga ti pfite madingano ngu wutxhari wakwe.
Currently Selected:
1 Vafumeli 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
