1 Vafumeli 16
16
1Sekoko di tile dipswi da Mkoma ka Jehu, mwana Hanani, do wukela Bhahasa, di txi kha dona: 2Ngako ni nga kuguleta ha lithuluni ni kumaha mthangeli txitimwi ka vathu vangu va ka Israyeli, se awe u tsimbite ka nzila ya Jerobhowamu, u onhisile vathu vangu va ka Israyeli, u ni henyisa ngu sionho sako, 3wona, ni na thavisa liveleko la Bhahasa ni liveleko lako, se wu na nga tile wu nga mahisa tona m'ti wa Jerobhowamu, mwana Nebhate. 4Awule a no fela didhoropani ka Bhahasa, a na dyiwa ngu timbwa; awule a no fela dhandani, a na dyiwa ngu sinyana sa nzuma.
5Kasi ngu wungi wa mithumo ya Bhahasa, ni wa ti a nga maha, ni mtamo wakwe, ti ngava ti sa bhalwa ka Dibhuku da Matimu a Vafumeli va Israyeli kani? 6Se Bhahasa a to otela ka vatate vakwe, e tshotshwa Tiriza; se mwanana wakwe Ela a to fuma ka wukhalo wakwe.
7Ngu kumaha keto, di tile kambe dipswi da Mkoma, ngu ka mprofeti Jehu, mwana Hanani, do wukela Bhahasa ni nyumba yakwe; se totsheto ngu mhaka ya wubihi wule a nga wu maha masoni ka Mkoma, a txi m'henyisa ngu simaho sa manza akwe, nga tile ti nga maheka ka nyumba ya Jerobhowamu; se ngu mhaka yeto, a va pekile.
Kufuma ka Ela, wa ka Israyeli
8Ka dilembe da magumi mambidi ni mtxhanu ni dimwedo da Asa, mfumeli wa Judha, Ela, mwana Bhahasa, a to khata kufumela Tiriza wa Israyeli; a to fuma malembe mambidi. 9Se txithumi txa kona Ziniri, mthangeli wa hafu ya sikotxikani, a to m'wukela na a di Tiriza. A txi sela ni kuleva m'tini ka Arisa, mxayisi wa nyumba ya wukoma kona Tiriza. 10Sekoko Ziniri a to wulela e mlwisa, eza e m'daya, ngu dilembe da magumi mambidi ni mtxhanu ni mambidi da Asa mfumeli wa Judha; se a to fuma ka wukhalo wakwe.
11Se ku to maheka tito, mbimo yi a nga fuma a di ha txituluni kwakwe ka wukoma, a to lwisa yotshe nyumba ya ka Bhahasa; kha siya ni wamwamna ni wammweyo, ka maxaka akwe, hambi ni ka vangana. 12Ngu toneto, Ziniri a to hasamula yotshe nyumba ya ka Bhahasa, madingano ni dipswi da Mkoma ngu kuwomba ka mprofeti Jehu, madingano ngu Bhahasa, 13ngu mhaka ya sotshe sionho sa Bhahasa, ni sotshe sionho sa mwanana wakwe Ela, asi va nga onha, ni si va nga onhisa ngu sona Israyeli, ve henyisa Mkoma, Txizimu txa Israyeli 14Kasi ngu wungi wa mithumo ya Ela ni ka totshe ti a nga maha, ina ti ngava ti sa bhalwa ka Dibhuku da Matimu a Vafumeli va ka Israyeli kani?
Kufuma ka Ziniri, wa ka Israyeli
15Ka dilembe da magumi mambidi ni mtxhanu wa malembe ni mambidi, a Asa, mfumeli wa ka Judha, Ziniri a to fumela Tiriza mtxhanu wa masiku ni mambidi; se vathu va di randete Gibhetoni i ku ditiko da Vafilista. 16Se a to engisa vathu va txi womba ku kha vona: Ziniri a henyile, se a date mfumeli. Ka dona ditshikwedo, votshe va ka Israyeli koko, va to veka Oniri, mthangeli wa dibutho da yimbi wugoveloni, kuva mfumeli txitimwi ka Israyeli. 17Se Oniri ni votshe va ka Israyeli va Gibhetoni, va to khukha ve kwelela kuya randela Tiriza. 18Se ku to maheka ati to Ziniri a txi wona to didhoropa da tekwa, a to tsula nyumbani ka wukoma, eya hisa apune nyumba ya wukoma, se a txi fa, 19ngu mhaka ya sionho sakwe sile a nga si maha, ngu kumaha wubihi masoni ka Mkoma, ngu kutsimbila ngu nzila ya Jerobhowamu ni ka txionho txi a nga ti txi mahile, eza e onhisa Israyeli. 20Kasi ngu wungi wa mithumo ya Ziniri, ni ta txikungo txi a nga tximaha, ina ti ngava ti sa bhalwa amu ka Dibhuku da Matimu a Vafumeli va Israyeli kani?
Kufuma ka Oniri, wa ka Israyeli
21Sekoko vathu va Israyeli va to abaneka ngu madhawa mambidi: Vamwani va txi londisa Tibhini, mwana Ginate, ve mmaha mfumeli, se vamwani va ti londisa Oniri. 22Aniko avale va nga ti londisa Oniri va ti ni mtamo ngutu kupinda vale va nga ti londisa Tibhini, mwana Ginate; Tibhini a to fa, se Oniri e fuma. 23Ka dilembe da magumi mararu ni dilembe dimwedo a kufuma ka Asa, mfumeli wa Judha, Oniri a to khata kufumela Israyeli, a to fuma digumi da malembe ni malembe mambidi; se ditikoni ka Tiriza a fumile mtxhanu wa malembe ni dilembe dimwedo. 24Na a di Semeri a to xava mmango wa Samariya ngu titalenta timbidi ta silivhela, se e aka mmangoni, se a to raya didhoropa dile ku khene i Semeri, nyamne wa mmango wa Samariya.
25Se Oniri a to maha wubihi masoni ka Mkoma; a to onha ngutu kupinda votshe vale vo khata. 26A to tsimbila ngu totshe tinzila ta Jerobhowamu, mwana Nebhate, hambi ka sionho sile a nga ti mahile ti to e onhisa ngu sona Israyeli, e henyisa Mkoma, Txizimu txa Israyeli, ngu wukanganyisi wakwe. 27Kasi ngu wungi wa mithumo ya Oniri, ka tile a nga maha, ni ka mtamo wakwe wule a nga wu kombekisa, ina ti ngava ti sa bhalwa ka Dibhuku da Matimu a Vafumeli va ka Israyeli kani? 28Se Oniri a to otela ka vatate vakwe, e tshotshwa Samariya; se mwanana wa kona Akabe a to fuma wukhaloni kwakwe.
Kufuma ka Akabe, wa ka Israyeli
29Se Akabe, mwana Oniri, a to khata kufumela Israyeli, amu ka magumi mararu a malembe, ni mtxhanu ni mararu, a kufuma ka Asa, mfumeli wa Judha; se Akabe, mwana Oniri, a to fumela Israyeli kona Samariya, magumi mambidi a malembe ni mambidi. 30Se Akabe mwana Oniri a to maha wubihi masoni ka Mkoma, kupinda ngutu votshe vale vo khata. 31Se ku to mahisa, (ku nga mhaka yo hehuka kutsimbila sionhoni ka Jerobhowamu, mwana Nebhate), kambe a to teka Jezabheli, mwana Etibhahali, mfumeli wa Vasidhoni, kuva msikati wakwe; se a to tsula eya thumela Bhahali, ni ku mkhozela. 32Se a to akela txiluvelo Bhahali, ka nyumba yi a nga akela Bhahali, Samariya. 33Kambe Akabe a to vata sithombe, a mahisileto ngu kulava kuhenyisa Mkoma, Txizimu txa Israyeli, kupinda votshe vafumeli va Israyeli vo khata. 34#Wona ni ka: Jox. 6:26. Hiyeli wa Bheteli, ka masiku akwe, a to aka Jeriko; a khatile kuaka mbimo yi a nga fa Abhiramu, matiwula akwe; se ati a txi vekela matimba a txi fa mwanana wakwe wo gwitisa, Segubhi; madingano ni dipswi da Mkoma, di nga wombwa ngu Joxuwa, mwana Nune.
Currently Selected:
1 Vafumeli 16: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
