1 Vafumeli 15
15
Kufuma ka Abhiya, wa ka Judha
(2 Makronika 13:1--14:1)
1Se ka dilembe da wugumi ni mtxhanu ni mararu a mfumeli Jerobhowamu, mwana Nebhate, Abhiya a to khata kufumela Judha. 2Se a to fuma malembe mararu Jerusalema; se ditina da mwamwakwe i ti ti Mahaka, mwana Absalome. 3Se a to tsimbila ngu sionho sile, tate wakwe a nga ti si mahile kukhatani; kambe mbilu yakwe yi sa basa masoni ka Mkoma, Txizimu txakwe, ku nga mbilu ya tate wakwe Dhavhidha. 4Mkoma ngu kuranda Dhavhidha, a mningile dilambu Jerusalema, ngu ku emisa mwanana wakwe ni kutsanisa Jerusalema. 5Nguko Dhavhidha a ti mahile tile i ngadi ta tinene masoni ka Mkoma, a sa nga phawuka ka totshe tile a ngadi mleletile ka otshe masiku a kuhanya kwakwe, hahanze ka mhaka ya Uriya, Muheti. 6Ku to maneka kulwa hagari ka Robhowamu ni Jerobhowamu, ka otshe masiku a kuhanya kwawe. 7Kasi ngu mithumo ya Abhiya, ni ka sotshe si a nga si maha ti ngava ti sa bhalwa ka Dibhuku da Matimu a Vafumeli va Judha? Kambe kuve ni kulwa hagari ka Abhiya ni Jerobhowamu.
8Se Abhiya a to otela ka vatate vakwe, se va to mtshotsha Didhoropani ka Dhavhidha; se mwanana wa kona Asa, a to fuma ka wukhalo wakwe.
Kufuma ka Asa, wa ka Judha
(2 Makronika 14:1--16:14)
9Se ka dilembe da magumi mambidi a Jerobhowamu, mfumeli wa Israyeli, Asa a to khata kufuma ditiko da ka Judha 10mndani ka mune wa magumi a malembe ni dilembe dimwedo, a to fumela Jerusalema; se ditina da mwamwakwe i ti ti Mahaka, mwana Absalome 11Se Asa, a to maha tile i nga ti ta tinene masoni ka Mkoma, ku nga tate wakwe Dhavhidha, 12nguko a thavisile vafana vo biha ditikoni, e thavisa ni sithombe sile si nga mahwa ngu vatate vakwe, 13ahawa ko hambi mwamwakwe Mahaka, a to mthavisa kuva asi mahi mfumeli wa txisikati, nguko a ti mahete Aseri, txithombe txo nyenyeza ngutu; Asa nene a thavisile txithombe txakwe, eya txi hisa hafuhi ni txinambwana txa Kedroni. 14Hambiko, makhalo o guleka ma nga mbi thaviswa: Aniko mbilu ya Asa i ti ya yinene ka Mkoma masiku otshe. 15Siya so sawuleka sa tate wakwe, a to si tisa Nyumbani ka Mkoma, ni siya sile a nga si sawula ene apune: Silivhela ni nzalama ni siya.
16Se ku to maneka kulwa hagari ka Asa ni Bhahasa, mfumeli wa Israyeli, ka masiku awe otshe. 17Nguko Bhahasa mfumeli wa Israyeli, a to wukela Judha ngu kuaka Rama, kasiku ni wammweyo asi tumetiswi kuhuma, hambi kuwulela hafuhi ni Asa, mfumeli wa Judha. 18Sekoko Asa a to teka yotshe silivhela ni nzalama yi nga ti sate ka tithomba ta Nyumbani ka Mkoma, ni mu ka tithomba ta nyumbani ka mfumeli, se a to si ningela manzani ka sithumi sakwe, e si rumela ka Bheni-Hadhadhe, mwana Tambrimo, wa mwana Heziyomi, mfumeli wa Siriya, a nga ti zumba Dhamasku, a txi khene: 19Txitumelelano txi hagari kwangu ni nawe, hagari ka tate wangu ni tate wako; wona ti to na rumela txiningo kwako, silivhela ni nzalama. Tsula uya txhatxha txitumelelano txako ni Bhahasa, mfumeli wa Israyeli, kasiku e khukha kwangu.
20Se Bheni-Hadhadhe a to pfisisa mfumeli Asa, se e rumela vathangeli va yimbi avale a nga ti navo kuya ya wisa didhoropa da Israyeli, kambe va to ya xasela Ijomi, ni Dhani, ni Abhele-Bheti-Mahaka, ni dotshe didhoropa da Kinerete, ni dotshe ditiko da Naftali. 21Se ku to maheka to a di ti pfite Bhahasa, a to leka kuaka Rama, eya zumba Tiriza.
22Sekoko mfumeli Asa a to ruma kunuwela kotshe Judha ati to votshe ku si sali ni wammweyo, ve tsula Rama kuya teka marigwi ni mapulango ale a nga ti aka ngu ona Bhahasa; se mfumeli Asa a akile ngu ona Gebha ka Bhenjamini ni Misipa.
23Kasi ngu wungi wa yotshe mithumo ya Asa, ni wotshe mtamo wakwe, ni totshe ti a nga maha, ni madhoropa ale a nga aka, ina ti ngava ti sa bhalwa ka Dibhuku da Matimu a Vafumeli va ka Judha kani? Hambi keto, mbimo ya kukumba kwakwe a xanisilwe ngu malwati mikondoni. 24Se Asa a to otela ka vatate vakwe, a to tshotshwa aha va ku kona vatate vakwe, Didhoropani ka tate wakwe Dhavhidha; se mwanana wa kona Josafati a to fuma ka wukhalo wakwe.
Kufuma ka Nadhabhi, wa ka Israyeli
25Se Nadhabhi, mwana Jerobhowamu, a to khata kufumela Israyeli ka dilembe da wumbidi da Asa, mfumeli wa Judha; se a to fumela Israyeli malembe mambidi. 26Kambe a to maha wubihi masoni ka Mkoma, a to tsimbila ngu tinzila ta tate wakwe ni ka sionho sile a nga ti si mahile si onhisa Israyeli.
27Bhahasa, mwana Ayasi, wa nyumba ya ka Isakari, a to mu wukela, a to lwiswa ngu Bhahasa kona Gabhatoni, i nga ti ka Vafilista, mbimo yile Nadhabhi ni votshe Vaisrayeli va nga randela Gabhatoni. 28Se a to m'daya Bhahasa, ka dilembe da wuraru da Asa, mfumeli wa Judha, se e fuma ka wukhalo wakwe. 29Ku to maheka ti to aha a nga fuma ene, a to lwisa yotshe nyumba ya Jerobhowamu; kha nga siya ni txa tximwetxo txo lumba Jerobhowamu txi txi hanya, a to si hasamulela, madingano ni dipswi da Mkoma, adi a ngadi womba ngu ka txithumi txakwe Ayasi, wa Silo, 30ngu mhaka ya sionho sa Jerobhowamu, a nga onha e onhisa ni Israyeli, ni mhaka ya tile a nga vhilukisisa tona kuhenya ka Mkoma, Txizimu txa Israyeli.
31Se ngu wungi wa mithumo ya Nadhabhi ni totshe ti a nga maha, ina ti ngava ti sa bhalwa totshe ka Dibhuku da Matimu a Vafumeli va Israyeli kani? 32Ku to maneka kulwa hagari ka Asa ni Bhahasa, mfumeli wa Israyeli, ka otshe masiku awe.
Kufuma ka Bhahasa, wa ka Israyeli
33Ka dilembe da wuraru da Asa, mfumeli wa Judha, a to khata kufuma Bhahasa, mwana Ayasi, txitimwi ka kotshe Israyeli kona Tiriza, a to fuma magumi mambidi a malembe ni mune. 34A to maha wubihi masoni ka Mkoma, se a to tsimbila ngu nzila ya Jerobhowamu, ni ka txionho txile txi nga onhisa Israyeli.
Currently Selected:
1 Vafumeli 15: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
