1 Vafumeli 11
11
Solomoni e ti dhawukisa ni Txizimu
1Se Solomoni a to randa vasikati vavangi va matiko, hahanze ka mwana Faro, a to randa Vamowabhi, Vaamoni, Vaedhomi, Vasidhoni, ni Vaheti, 2va mifumo yile Mkoma a nga ti gete vanana va ka Israyeli ku khene: Mi nga tekeni ka yona, ni yona kha yi na mbi teka kwanu; ngu kuhambana nito, va na kanganyisa timbilu tanu kuva mi londisa sizimu sawe. Se Solomoni a to randana navo. 3A ti ti ni 700 wa vasikati, ni 300 wa sigango; se vasikativo vakwe va to m'dya mbilu. 4Nguko ku mahekile ti to a di kumbile Solomoni, vasikati vakwe va m'dyite mbilu kasiku e londisa simwani sizimu; se mbilu yakwe yi sa hetiseka ka Mkoma, Txizimu txakwe, ku nga tate wakwe Dhavhidha, 5nguko Solomoni a to tsimbila ngu nzila ya Axitaroti, txizimu txa txisikati txa Vasidhoni, ni kulondeta Milkomi, txinyenyeko txa Vaamoni. 6Ngu toneto, Solomoni a to maha kubiha kuwonani ka Mkoma, se kha ti vekisela kulondeta Mkoma, nga tate wakwe Dhavhidha. 7Se Solomoni a to aka wukhalo wo dhumisa ka wona Kemosi, i nga ti txizimu txo biha txa Vamowabhi, ka mmango wu nga ti maneka wutxani ka Jerusalema, ni wukhalo wo dhumisa Moloke, txizimu txa walo txa Vaamoni. 8A to va mahela toneto votshe vasikati vakwe va matiko mamwani, avale va nga ti hisa mabaselo ve phaxela ka sizimu sawe.
9Ngu mhaka yeto, Mkoma a to henyela Solomoni, nguko a nga ti jikisile mbilu ka Mkoma, Txizimu txa Israyeli, awu a nga ti wonekisa kumbidi kwakwe. 10Madingano ni mhaka yiya a ti mlayile kuva asi londeteli simwani sizimu; aniko kha vekisa tile a nga laywa ngu tona ngu Mkoma. 11Se Mkoma a to khene ka Solomoni: Se aku ku nga maneka eto kwako, ta kwa mbi vekisa txitumelelano txangu ni sileleto sangu ni nga kuruma, ngu ditshuri awu mfumo ni na wu abanisa ni wu ningela ka txithumi txako. 12Hambiketo, kha ni na mbi ti maha eto ka masiku ako, ngu kuranda tate wako Dhavhidha; ni na wu abanisela manzani ka mwanana wako; 13kambe na mbi bhanda wotshe mfumo; nyumba yimweyo ni na ninga mwanana wako, ngu kuranda txithumi txangu Dhavhidha, ni kuranda Jerusalema, awule ni nga msawula.
Valala va Solomoni
14 Mkoma a to maha ti to Hadhadhe Muedhomi eva mlala wa Solomoni; ene i ti wa liveleko la mfumeli wa Edhomi. 15Nguko ku to maheka ti to Dhavhidha a di Edhomi, mbimo yi a nga kwelela Jowabhi mthangeli wa dibutho kuya kelela vafi, a to dayela votshe vavamna va Edhomi, 16(nguko Jowabhi a to zumba koneyo ni votshe va ka Israyeli, mtxhanu wa mitxima ni wumwewo, eza e dayela votshe vavamna va Edhomi.) 17Sekoko Hadhadhe a to tutuma, ene ni Vaedhomi vokari, ka sithumi sa tate wakwe, ve tsula nayo Egipta; Hadhadhe i ti ngadi mphya. 18Se va to khukha Midhiyani ve ta Parani, ve ta xula votshe vavamna va Parani, se va tile Egipta ka Faro, mfumeli wa Egipta, awu a nga mninga nyumba, e mthembisa ku m'dyisa, e mninga mafu okari. 19Se Hadhadhe a to dhundeka ngutu masoni ka Faro; se a to mninga ndombe yakwe kumaha msikati wakwe, mkoma ni mnanda ni Tafinesi, mfumeli wa txisikati. 20Se ndiya ya Tafinesi a to veleka mwanana wa mfana i ku Genubhate, a to wunjwa ngu Tafinesi m'tini ka Faro; se Genubhate a zumbile m'tini ka Faro, kumweko ni vanana va Faro.
21A di ti pfite koko, Hadhadhe ngu Egipta ti to Dhavhidha a otete ni vatate vakwe, ni ti to Jowabhi mthangeli wa dibutho da yimbi a datwe, Hadhadhe a to khene ka Faro: Ni thuse ni tsula ditikoni kwangu.
22Sekoko Faro a to mxamula a txi khene: Se u pwata txani kwangu, u lava kukhukha u tsula m'tini kwako kani? Ene a nje khene: Hi nga txilo, hambi keto, ni thuse.
23Se Txizimu txi to wusa mmwani mlala i ku Razomi, mwana Eliyadha, a nga ti tutumile ka nyamne wakwe Hadhadhezeri, mfumeli wa Zobha, 24a to tshanganisa vavamna e maha mthangeli wawe, mbimo yile Dhavhidha a nga va daya, se va to tsula Dhamasku, va to zumba koneyo, ve fuma Dhamasku. 25Rezomi a mahile mlala wa Israyeli ka otshe masiku a Solomoni, totsheto, hahanze ka wubihi wule a nga ti wu maha, nguko a ti venga Israyeli, e fumela Siriya.
Txithembiso txa Txizimu ka Jerobhowamu
26Hambi Jerobhowamu mwana Nebhate, Muefrayime wa Zeredha, txithumi txa Solomoni (mwamwakwe i nga ti noni, ditina dakwe i ku Zeruya), nene a to guleta dianza e wukela mfumeli. 27Ngu yona mhaka yiya yi nga mmaha e guleta dianza e wukela mfumeli: Solomoni a ti akile Milo, se e tsivetela maphosongo a Didhoropa da tate wakwe Dhavhidha. 28Se wamwamneyo Jerobhowamu, i ti dijaha da ndena; mbimo yi a nga wona dijahedo Solomoni, i nga ti wo thuma, a to m'veka txitimwi ka wotshe mthumo wa nyumba ya ka Josefa. 29Ka yona yile mbimo ku to maheka tito, a txi khukha Jerobhowamu ngu Jerusalema, e manwa ngu mprofeti Ayasi, wa msilowami hanzila, se ene a ti ti ambate simaha sasiphya, i ti ti vona vokha thembwenimo. 30Se Ayasi a to thavisa simaha si a nga ti ambate, e si bhandelela ngu digumi da sigwanda ni simbidi. 31A to khene ka Jerobhowamu:
Teka digumi da sigwanda, nguko Mkoma, Txizimu txa Israyeli a khene: Ni na bhandelela mfumo manzani ka Solomoni, ni na kuninga digumi da tihunzu. 32Hambiketo ene a nave ni lihunzu limwelo ngu mhaka yo randa txithumi txangu Dhavhidha, ni kuranda Jerusalema, didhoropa di ni ngadi sawula ka otshe madhoropa a Israyeli. 33Nguko va ni lekile veya khizamela Axitaroti, txizimu txa txisikati txa Vasidhoni, Akemosi txizimu txa va Mowabhi, ni Milikomi txizimu txa vanana va ka Amoni, kambe kha va tsimbila ngu tinzila tangu, kasi ve maha ati ti wonekako i di ta tinene masoni kwangu, i ku, sileleto sangu ni wululamo wangu, nga tate wawe Dhavhidha. 34Hambiketo na mbi teka txilo ka mfumwewo manzani kwakwe; aniko na m'veka kuva mthangeli ka otshe masiku a kuhanya kwakwe, ngu kuranda txithumi txangu Dhavhidha, awu ni nga msawula, awu a nga vekisa sirumo sangu ni sileleto sangu. 35Aniko manzani ka mwanana wakwe ni na thavisa mfumo, ni kuninga awe digumi da tihunzu takwe. 36Se mwanana wakwe ni na mninga lihunzu limwelo, kasiku txithumi txangu Dhavhidha a na va ni dilambu masoni kwangu kona Jerusalema, didhoropa di ni ngadi sawula kasi kuveka kona ditina dangu. 37Ni na kuteka ni kufumisa madingano ni ti wu ti lavisako tona m'hefemulo wako, u na va mfumeli txitimwi ka Israyeli. 38Se ku na maheka ti to u txi engisa totshe ti ni no kuruma, u tsimbila ngu totshe tinzila tangu, u maha ta tinene masoni kwangu, u txi veketa sileleto sangu ni milayo yangu, ku nga ti txithumi txangu Dhavhidha a nga mahisa tona, ani ni na va ni nawe, ni na kuakela nyumba yo tsana, ku nga kule ni akela Dhavhidha, ni na kuninga Israyeli. 39Ngu mhaka yeto, ni na vhinganyisa lotshe liveleko la Dhavhidha, aniko hi nga ngu yotshe mbimo.
40Ngu kumaha keto, Solomoni a lavile kudaya Jerobhowamu; se Jerobhowamu a to khukha e thavela Egipta, ka Sisake, mfumeli wa Egipta, eya zumba Egipta kala kuza Solomoni a txi fa.
Kufa ka Solomoni
(2 Makronika 9:29-31)
41Se ngu wungi wa mithumo ya Solomoni, ni totshe tile a nga maha, ni wutxhari wakwe, ina kha sa bhalwa amu ka dibhuku da matimu a Solomoni kani? 42Yotshe mbimo yile Solomoni a nga fumela Jerusalema ka dotshe ditiko da Israyeli, i mune wa magumi a malembe. 43Se Solomoni a otete ni vatate vakwe, a to tshotshwa Didhoropani ka tate wakwe Dhavhidha, se mwanana wa kona Robhowamu a to fuma ka wukhalo wakwe.
Currently Selected:
1 Vafumeli 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
