1 Vafumeli 10
10
Liendo la mfumeli wa txisikati wa Sabha
(2 Makronika 9:1-12)
1 # Wona ni ka: Mat. 12:42; Luk. 11:31. Se mbimo yile mfumeli wa txisikati wa Sabha a nga pfa nduma ya Solomoni, madingano ni ditina da Mkoma, a tile e ta m'hika ngu siwotiso so karata.
2Se a to ta Jerusalema ni dibutho da hombe, ni makameli ma di rwate sidyanadyana, ni nzalama yayingi ngutu, ni marigwi a lisima; e ta geletela Solomoni totshe ti a ngadi nato mbiluni kwakwe. 3Se Solomoni a to txhamusela ka mfumeli wa txi sikatiwa Sabha, totshe timhaka takwe; mfumeli kha sisa ni txa tximwetxo asi m'geli. 4Mbimo yile mfumeli wa txisikati wa Sabha a nga wona wutxhari wa Solomoni, ni nyumba yile a nga ti yi akile, 5ni sakudya sa ha mezani kwakwe, ni mazumbelo a sithumi sakwe, mathumelo a vathu vakwe, ni syambalo sawe, ni vatheleli va magombe akwe, ni mu a nga ti kwela ngu kona kuya Nyumbani ka Mkoma, a to pwata ni to womba. 6A to khene ka mfumeli:
I ti ditshuri dipswi di ni nga dipfa ditikoni kwangu, ngu mhaka yako ni wutxhari wako. 7Se ani ni si ma kholwi mapswi ale, niza ni txita, se maso angu ma ti woni; wona ku kha va siyeta ku ni gela ka kona; u pindisile ngutu ngu wutxhari ni tithomba ka nduma yile ni nga yipfa. 8Va katekile vavamna va u ku navo, va katekile vathumi vako avale yotshe mbimo va ku masoni kwako, va pfisisako wutxhari wako! 9A na Bongwe Mkoma Txizimu txako, a nga mana kutsakiswa ngu ngawe, kasi e kuveka ha txituluni ka wukoma ka Israyeli; nguko Mkoma wa randa Israyeli yotshe mbimo; ngu mhaka yeto, a kumahile mfumeli, kasi uva ni kupimisa ni wululamo.
10Se a to ninga mfumeli 120 wa titalenta ta nzalama, ni tixakaxaka tatingi ta makha, ni marigwi a lisima; kha kuzivi kuta makha amangi ngutu ku nga tiya mfumeli wa txisikati wa Sabha a nga ningisa tona ka mfumeli Solomoni.
11Kambe sitataru sa Hiramu, si nga ti khukhela Ofiri, si di rwate nzalama, si txi tisa mapulango amangi ngutu a almuge, ni marigwi a lisima ngu Ofiri. 12Se ngu mapulango eyo a almuge, mfumeli a to maha ngu ona sihiketo sa Nyumba ya Mkoma, ni ya nyumba ya mfumeli, kumweko ni tiharipa ni misengele ya vaembeleli; kha kuzivi kuta mapulango ongeyo ngu sandalo,#10:12 Sandalo: ditina da mndonga wonewo. kha ma zivi ka nga wonwa kala ka ditshiku da nyamsi.
13Mfumeli Solomoni a to ninga ka mfumeli wa txisikati Sabha, sotshe sile a nga si kombela ngu ku si navela, kuleka sile a nga maha ngu ku mninga apune, madingano ni wuha wa mfumeli Solomoni; se a to tshumela e khukha kuya ditikoni kwakwe, ene ni sithumi sakwe.
Tithomba ta Solomoni
(2 Makronika 9:13-28)
14Se kunemela ka nzalama yile yi nga ti nehwa ka Solomoni dilembe ni dilembe i ti 666 wa titalenta ta nzalama, 15hahanze ka mikhupo yi yi nga ti dihwa ngu vaxavisi, mabhindu a wukwewu, ni yi va nga ti diha vaxavisi va makha, ni a votshe vafumeli va Arabhiya, ni vathangeli va ditiko da kona.
16Mfumeli Solomoni a mahile 200 wa makhalo ngu nzalama yo bambatelwa; 600 wa madangarita a nzalama a to ruma kuva me pimwa, o lumba wukhalo ni wukhalo; 17a to maha kambe 300 wa sitxhavangu sa nzalama yo bambatelwa; magejo mararu a nzalama a to rumela ku me pimwa o lumba txithavangu tximwetxo ni tximwani; se mfumeli a to si veka txitingani ka Libhanoni.
18Se mfumeli a to maha txitulu txa hombe txa wukoma ngu makwasa a tinzofu, e tshulela ngu nzalama ya yinene ngutu. 19Txitulwetxo txa wukoma txi ti ni mtxhanu wa sikando ni tximweto, se msungo wa txitulu wa didangarita wu ti ngu msana ka kona, se ka madhawa otshe a mambidi ku di ni sikhingelo kala ha ka txikhalo txa kona; ni tingonyamo timbidi ti di kumweko ni sikhigelo. 20Kona txitimwi hale ka sikando sa mtxhanu ni tximwetxo sa madhawa mambidi, ku di ni digumi da tingonyamo ni timbidi; ku si zivi ka nga mahwa so fana niso ka mfumo ni wawumwewo.
21Kambe otshe magombe ale a nga ti sela ngu ona mfumeli Solomoni, i ti a nzalama, ni sotshe siya sa nyumba ya txitinga txa Libhanoni, i ti sa nzalama ya yinene; ka yona ku si nga ni silivhela, nguko ka masiku a Solomomi, yi si nga ni kudhundeka ni kakumweko. 22Nguko mfumeli a di ni sitataru sa Tarxixi, ni sitataru sa Hiramu; kumweko ngu malembe mararu, ku txi wuya sitataru sa Tarxixi si txi tisa nzalama ni silivhela ni makwasa a tinzofu, ni tifenhe ni digarakwinya.
23Sekoko mfumeli Solomoni a to pinda votshe vafumeli va ha mafuni ngu tithomba ni wutxhari. 24Se vathu va dotshe ditiko va txi lava kuwona khohe ya Solomoni, kasi vepfa wutxhari wule Txizimu txi nga ti vekile mbiluni kwakwe. 25Se mmweyo ni mmweyo a txi ta mninga siya sa silivhela ni siya sa nzalama, ni syambalo, ni matxhari, ni sithimbelo so bhumula ni mahantxhi ni mamula; tximwetxo ni tximwetxo ngu dilembe ni dilembe.
26Kambe Solomoni a to sengeleta sikotxikani sasingi ni vagadhi va mahantxhi; a ti ni 1.400 wa sikotxikani, ni 12.000 wa vagadhi va mahantxhi; e si yisa ka madhoropa a sikotxikani, se simwani si zumba kumweko ni mfumeli Jerusalema. 27Se mfumeli a to maha ti to Jerusalema kumaneka silivhela ku nga marigwi ni mikedhari o tala ngutu, nga miphayi ya txitinga yi manekako tibalani. 28Se va txi teka mahantxhi a Egipta me ningelwa ka Solomoni; mitxhambi yi txi xawa ngu vanyamakwewu va mfumeli, mxowo ni mxowo ngu mtengo wokari. 29Txikotxikani txa Egipta, txi txi kwela ni kurelela ka mtengo wa 600 wa tipimo ta silivhela, se dihantxhi ngu 150; sekoko ngu mamaheloyo va txi heleketa ka votshe vafumeli va Vaheti ni vafumeli va Siriya.
Currently Selected:
1 Vafumeli 10: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
