1 Vakorinto 3

Sithumi sa Txizimu

1Se i di ani, vanathu, kha na sikota kuwombawomba ni nanu nga vathu va Moya, aniko ni wombawombile ni nanu kota nga vathu va ha mafuni dwe, ni mi fananisa ni sivananana amu ka timhaka ta kuziva Kristu. 2#Wona ni ka: Vaheb. 5:12-13. I masi ni nga mi mamisa, hi nga sakudya so banga, nguko nga mi sa sikota kutxakuta. Hambi ni konkuwa, nga mi si sikoti, 3nguko mi ngadi vathu va ha mafuni dwe. Nguko mibango ni kuphikizana kuwa ku kuho hagari kwanu, ina hi nga kuwa mi ku ngadi vathu va ha mafuni dwe, mi hanyisako wuthu kani? 4#Wona ni ka: 1 Vak. 1:12. Nguko, ngako m'thu a txi khene: “Ani ni wa ka Paulo,” mmwani a txi khene: “Ani ni wa ka Apolosi,” ina tona tiya hi nga kuhanyisa wuthuri kani? 5Hi ngani ni gela: I mani Apolosi kani? I mani Paulo kani? Vona nzithumi dwe, asi mi nga amukeliswa ngu sona likholo, na ti txi tsimbila ngu hawa mmwani ni mmwani a nga ningiswa tona ngu Mkoma. 6#Wona ni ka: Mith. 18:4-11,24-28. Ani ni phayile, Apolosi asi theletete mati, aniko Txizimu ngu txona txi nga si kulisa. 7Ngu konaho, hambi wu a phayako, hambi wu a theletelako mati hi nga txilo. Txizimu ngu txona txi si kulisako. 8Awu a phayako kumweko ni wu a theletelako mati mbamwevo; se mmwani ni mmwani a na tshungulwa madingano ni mthumo wakwe. 9Kha ditshuri, athu hi vavhuneteli va Txizimu, anu mi wudimi wa Txizimu, mi Nyumba ya Txizimu. 10Madingano ni kateko ya Txizimu, ayi ni nga ningwa, ani kota muaki wo ziva, ni valute makhato, aniko mmwani ngene a akako txitimwi ka makhato awa. Se m'thu ni m'thu a na wonisise ati a akisako tona koneho; 11nguko awalo wu a ku ni fanelo ya kuveka mamwani makhato a kuhambana ni awa ma nga vekwa, i ku ene Jesu Kristu. 12Ngako m'thu a txi aka txitimwi ka makhato awa, ngu nzalama, ngu silivhela, ngu marigwi a lisima, ngu mapulango, ngu matshanga mwendo mwasi; 13wu na tikomba mthumo wa m'thu ni m'thu, nguko ditshiku da kuta ka Mkoma di nata wu landula. 14Se ngako mthumo wa m'thu wu di akilwe wu di tsani, muaki a na tshungulwa. 15Se ngako mthumo wa m'thu wokari wu txihya, eyo a na luzekelwa, kambe ene a na poniswa, nga a to pinda ngu hagari ka mndilo. 16Kasi kha mi tizivi ti to mi dithepele da Txizimu ni ti to Moya wa Txizimu wu zumba kwanu kani? 17Ngako m'thu a txi hasulela dithepele da Txizimu ni txona txi na mu hasulela. Nguko dithepele da Txizimu di sawulekile, se dithepele diya ngu nganu. 18Mi nga ti kanganyiseni mipune. Ngako m'thu a txi pimisa ti to a txharihile ngu wutxhari wa ha mafuni, a na ti mahe txipumbu, kufela ku e mana wutxhari wa ditshuri. 19Nguko wutxhari wa ha mafuni mbupumbu masoni ka Txizimu, kota nga ti ti nga bhalwa va txi kha vona: “Txona txa bzweta vazivi amu ka wutxhari wawe.” 20#Wona ni ka: Mas. 94:11. Ka wumwani wukhalo kambe va kha vona: “Mkoma wa tiziva ti to mialakanyo ya vathu hi nga ya kunyawula.” 21Ngu toneto, mi nga ti kuliseni hagari ka vathu. Ngu ditshuri, sotshe nzanu: 22Hambi ene Paulo, mwendo Apolosi, mwendo Khefasi, mwendo mafu, mwendo kuhanya, mwendo kufa, mwendo ta nyamsi, mwendo ta mangwana; sotshe nzanu, 23kambe anu mi va ka Kristu, se Kristu mbwa ka Txizimu.

Currently Selected:

1 Vakorinto 3: BEC2016

Highlight

Compare

Copy