1 Vakorinto 2
2
Kupfalisa Kristu wu a nga gogotelwa ha txihambanoni
1Vanathu, mbimo yi ni nga ta kheyo kwanu, kasi ku ta mi fakazela mapswi a Txizimu, kha na tela ku ta womba-womba mapswi a kutiguleta mwendo o komba wuzivi. 2Ni pimisile ti to kha txi nga ho tximwani ni txi zivako hagari kwanu, hahanze ka Jesu Kristu, awu a nga gogotelwa ha txihambanoni. 3#Wona ni ka: Mith. 18:9. Ni tile masoni kwanu ni di ni dizowa ni kuthava ni kudhudhumela ka hombe. 4Dipswi dangu ni kutxhumayela kwangu i ti si nga sa kukomba wuzivi wa ha mafuni, aniko i ti mapswi a kutsaniswa ngu Moya ni mtamo wa Txizimu; 5ti to kukholwa kwanu ku si tsaniswi ngu wuzivi wa m'thu, aniko ku txi fela kutsaniswa ngu mtamo wa Txizimu.
Wutxhari wa Txizimu
6Hambi keto, athu hi womba-womba ngu wuzivi hagari ka vale i ku vo thembeka, kambe hi womba-womba ngu wuzivi wo va i si nga wa ditiko diya, awu kambe i si nga wuzivi wa va va fumako ditikoni muwa, ava va no gwita ngu kufa. 7Aniko athu hi gondisa wuzivi wa Txizimu, awu wu nga tumbetwa ngu makungo a txona, txi txi nga sisala ni konkuwa, awu wu nga sikelwa ngu kale ni kale ti to wu na maha wudhumo wathu, 8i ku wutxhari wu ni mmweyo mkoma wa ha mafuni muwa asi wu ziviko; nguko idiku va ti kova nawo wuzivi wuwa, nga va sa m'gogotela ha txhihambanoni ene Mkoma wa wudhumo. 9Aniko, nga tiya ti nga bhaliswa tona, nzimaha si
“hambi maso ma si sikotiko ku si tshanganisa,
hambi tinzeve ti si sikotiko ku si engisa,
hambi mialakanyo ya m'thu yi si sikotiko ku si pima,
asile Txizimu txi nga lulamisela avale va txi dhundako.”
10Aniko, kwathu, Txizimu txi si wonekisile ngu Moya wa txona wo Sawuleka, awu wu zivako totshe, hambi tile i ku ta wutumbu wa kueta wa Txizimu.
11Ngu toneto, kasi i mani a zivako simaha si si ku mndani ka m'thu, na i si nga wona moya wa m'thu, wu wu zumbako mndani kwakwe, kani? Kufana ni toneto, simaha sa Txizimu, awalo mmwani asi zivako, hahanze ka Moya wa Txizimu.
12Se athu kha ha amukela moya wa mafu, aniko hi amukete Moya wu wu tako ngu ka Txizimu, awu wu hi ningako kuziva tikateko ti hi nga ningwa ngu txona.
13Timhaka tiya kha hi ti xawuteli ngu mapswi a wutxhari wa txithu, aniko hi ti xawutela ngu mapswi ale hi gondiswako ngu Moya wo Sawuleka, i ku mapswi awa ma xawutelako timhaka ta Moya ngu mawombelo a Moya.
14Nguko m'thu wuwa i ku si nga wa Moya kha na ku engisisa asi i ku sa Moya wa Txizimu, nguko kwakwe timhaka tiya a ti wona i di wupumbu. Ene kha sikoti ku ti engisisa nguko tona ti pimwa ngu mapimiselo a Moya. 15Kasi m'thu wa Moya wa lamula ka totshe, kambe ene kha lamulwi ngu m'thu. 16Nguko i mani a nga zivako mialakanyo ya Txizimu, kasiku e txi gondisa kani? Aniko athu hi ni mialakanyo ya Kristu.
Currently Selected:
1 Vakorinto 2: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
