1 Makronika 24
24
Mthumo wa vaphaxeli
1Se mitxawa ya vanana va ka Aroni ngu yiya: vanana va Aroni i ti Nadhabhi, ni Abhiyu, ni Eleyazari, ni Itamari. 2#Wona ni ka: Levh. 10:1-2. Se Nadhabhi ni Abhiyu va fite na tate wawe a sanzi kufa, kambe va si nga ni vanana; se Eleyazari ni Itamari, va ti maha mthumo wa wuphaxeli. 3Dhavhidha kumweko ni Zadhoki, wa vanana va Eleyazari, ni Ayimeleki wa vanana va Itamari, va to abanisela mithumo ka vaphaxeli madingano ni wuthangeli wawe.
4Se va to mana taku vanana va Eleyazari mbavangi ngutu hagari ka vathangeli va mimwaya, kupinda vanana va Itamari, mbimo yile va nga abaniselwa; ka vanana va Eleyazari, va mani digumi da vathangeli ni mtxhanu ni vararu va tinyumba ta vatate, kambe ka vanana va Itamari, madingano ni tinyumba ta vatate vawe, mtxhanu ni vararu. 5Se va to abaniselwa ngu kuxaxuva tixolo, mmweyo ka vamwani; nguko ku ti ni vathangeli va wukhalo vo sawuleka, ni vathangeli va Nyumbani ka Txizimu, hagari ka vanana va Eleyazari ni hagari ka vanana va Itamari. 6Se Semaya, mwana Nathaniyele, mabhalani, hagari ka va ka Levhi a to va bhala masoni ka mfumeli, ni ka vathangeli, ni Zodhoki, mphaxeli, ni Ayimeleki, mwana Abhiyatari, ni vathangeli va vatate, hagari ka va vaphaxeli ni hagari ka va ka Levhi; se Eleyazari a to teka mmweyo hagari ka tinyumba ta vatate, se Itamari nene e teka mmwani.
7Se xolo yo khata yi to sawula Jeyoyaribhi, se ya wumbidi Jedhaya; 8ya wuraru yi to sawula Harimi; ya wumune, Seyorimi; 9ya wutxhanu Malikiya, ya wutxhanu ni yimweyo, Miyamini; 10ya wutxhanu ni timbidi Hakozi, ya wutxhanu ni tiraru, Abhiya; 11ya wutxhanu ni mune, Jesuwa; ya wugumi, Sekaniya; 12ya wugumi ni yimweyo, Eliyasibhe, ya wugumi ni timbidi Jakimi; 13ya wugumi ni tiraru, Hupa, ya wugumi ni mune, Jesebheyabhi; 14ya wugumi ni mtxhanu, Bhiliga; ya wugumi ni mtxhanu ni yimweyo, Imeri; 15ya wugumi ni mtxhanu ni timbidi, Heziri, ya wugumi ni mtxhanu ni tiraru, Hapisi, 16ya wugumi ni mtxhanu ni mune, Petaya; ya wu magumi mambidi, Jehezikhiyeli; 17ya magumi mambidi ni yimweyo, Jakimi, ya wu magumi mambidi ni timbidi, Gamuli; 18ya wu magumi mambidi ni tiraru, Dhelaya; ya wu magumi mambidi ni mune, Mahaziya.
19Mthumo wa vava ka wuthangeli wawe, i ti ti wa kuwulela Nyumbani ka Mkoma, madingano ni ti va nga leletiswa tona ngu Aroni, tate wawe, nga ti Mkoma, Txizimu txa Israyeli, a nga ti va leletisile tona.
Txhatxhameto ya va ka Levhi
20Se vale va nga sala ka vanana va ka Levhi ngu vava: Ka vanana va Aniramu, i Subhayeli; ka vanana va Subhayeli, i Jedhiya;
21ka vanana va Reyabhiya: i Isiya, i nga ti mthangeli;
22ka va ka Isari, i Selomite; ka vanana va Selomite i Jahati;
23ka vanana va Hebroni, wo khata i Jeriya, wa wumbidi i Amariya, se wa wuraru i Jahaziyeli, wa wumune i Jakameyamu;
24ka vanana va Uziyeli i Mika; ka vanana va Mika i Samiri;
25mwanawe wa Mika i Isiya, ka vanana va Isiya i Zakariya; 26ka vanana va Merari i Mali ni Musi; ka vanana va Jahaziya i Bheno; 27ka vanana va Merari ngu ka didhawa da Jahaziya i Bheno, ni Sowamu, ni Zakuri, ni Ibhiri; 28ka Mali, i Eleyazari; awuwa kha veleka vanana; 29ka vanana va Kisi i Jerameyeli; 30ka vanana va Musi i Mali, ni Edheri, ni Jerimoti; avava mbanana va ka Levhi madingano ni ni tinyumba ta vatate vawe.
31Se mthangeli wa nyumba ya vatate vawe kumeko ni mnanda wakwe, va to xaxuva tixolo kufana ni vanawe, vanana va Aroni, masoni ka Dhavhidha, ni Zadhoki, ni Ayimeleki, ni vathangeli va vatate, hagari ka vaphaxeli ni hagari ka Valevhi.
Currently Selected:
1 Makronika 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
