1 Makronika 23
23
1 # Wona ni ka: 1 Vafu. 1:1-40. Mbimo yi koko, Dhavhidha a nga kumba, a di ni masiku o tala, a to veka Solomoni, mwanakwe, kuva mfumeli txitimwi ka va ka Israyeli.
Mthumo wa Valevhi
2Se a to sengeleta votshe vathangeli va ka Israyeli, kumweko ni vaphaxeli ni Valevhi. 3Se ku to balwa Valevhi va magumi mararu a malembe ni kuya masoni; mtengo wawe madingano ni vathangeli va kona, i ti 38.000 wa vavamna. 4Hagari kwawe ku ti ni 24.000 va nga sawulwa ka mthumo wo aka Nyumba ya Mkoma, ni 6.000 wa vathangeli ni valamuli va timhaka, 5ni 4.000 wa vawoneleli va sike, ni 4.000 wa vo dhumisa Mkoma ngu sivetaveta, sile ani ni nga si maha kasi kudhumisa ngu sona, kuwomba Dhavhidha.
6Se Dhavhidha a to va abanisela ngu mitxawa, madingano ni vanana va ka Levhi: Gerisoni, Kowati ni Merari.
7Va ka Gerisoni: Ladhani ni Simeyi. 8Vanana va Ladhani; Jeyeli, i mthangeli, ni Zetani, ni Joyeli, mbararu. 9Vanana va Simeyi: i Selomite, ni Haziyeli, ni Harani, mbararu; avava ngu vona vathangeli va vatate va Ladhani.
10Se vanana va Simeyi i Jayati, ni Ziza, ni Jewusi, ni Bheriya; i ti ti mune wa vanana va Simeyi. 11Se Jayati i ti ti mthangeli, Ziza i ti ti wa wumbidi; aniko Jewusi ni Bheriya va si nga ni vanana votala; ngu mhaka yeto, va to ya balwa kumweko ni tinyumba ta vatate vawe, ve maha mwaya wumwewo.
12Vanana va Kowati ngu vava: Aniramu, ni Isari, ni Hebroni, ni Uziyeli, i mune. 13#Wona ni ka: Eks. 28:1. Vanana va Aniramu ngu vava: Aroni, ni Mosi; se Aroni a to sawulwa kasi kusawulekisa Wusawuleki wa Kusawuleka, ene ni vanana vakwe, ngu ha ku si gwitiko, kasi kuhisa dibaselo masoni ka Mkoma, ni ku mthumela, ni kuninga makatekwa ngu ditina dakwe, ngu ha ku si gwitiko. 14Aniko ngu ka Mosi, m'thu wa Txizimu, vanana vakwe va batwe hagari ka lihunzu la ka Levhi. 15Sekoko vanana va Mosi i Gerisoni ni Eliyezeri. 16Mwanana wa Gerisoni i Sebhuweli, mthangeli. 17Se mwanana wa Eliyezeri i ti mthangeli Reyabhiya; aniko Eliyezeri kha veleka vamwani vanana; kambe vanana va Reyabhiya va to handa ngutu.
18Mwanana wa Isari i Selomite, mthangeli. 19Se vanana va Hebroni i Jeriya, mthangeli, ni Amariya, wa wumbidi, ni Jahaziyeli, wa wuraru, ni Jakameyamu, wa wumune. 20Ka vanana va Uziyeli i Mika, mthangeli, ni Isiya, wa wumbidi.
21Vanana va Merari ngu vava: Mali ni Musi; vanana va Mali Eleyazari ni Kisi. 22Se Eleyazari a to fa asi nga ni vanana va vafana, kambe a ti ni vanana vamahorana; se vanana va Kisi, mwanawe, va to va teka va txi maha vasikati vawe. 23Vanana va Musi ngu vava: Mali, Edheri ni Jerimoti, mbararu.
24Avava ngu vona vanana va ka Levhi, madingano ni nyumba ya vatate vawe, vathangeli va vatate vawe, madingano ni ti va nga baliswa tona ngu mtengo wa matina, madingano ni vathangeli, vale va nga ti maha mthumo wa Nyumbani ka Mkoma, va tanga ya magumi mambidi a malembe ni mtxhanu ni kuya masoni.
25Nguko Dhavhidha a ti khene: Mkoma Txizimu txa Israyeli, a ningile kuhumula ka vathu, aniko a na zumba Jerusalema ngu ha ku si gwitiko. 26#Wona ni ka: Dhewut. 10:8. Ni ku va ka Levhi kha va na mbiswa ve rwala Ditenda da Mkoma, hambi txiya ni txa tximwetxo txo lumba mthumo wakwe.
27Nguko madingano ni mapswi o gwitisa a Dhavhidha, ku to balwa vanana va ka Levhi va magumi mambidi a malembe ni kuya masoni. 28Nguko mthumo wawe i ti ti wa kurumwa ngu vanana va ka Aroni, ka mthumo wa Nyumba ya Mkoma, ve hiyela mitendela, ni tinyumbani, ni kusawulekisa sotshe siya so sawuleka, ni kumaha mthumo wa Nyumbani ka Txizimu, 29i ku wuwa: Kuxayisa mapawu a miphaxo, ni mpupu wo tshura, ni mningelo wa sakudya, ni tximbwanda txa kwa mbi tshumbelwa, ni so katingwa, ni so yokwa, ni yotshe mipimo yo pima kutala ni wuhombe; 30ni ku va fanela kuema kasi kubonga, ni kudhumisa Mkoma otshe masiku, mixo ni mitshikari; 31va txi ningela mningelo wa kuhiswa, ka Mkoma, ngu migivhela ni kumeka ka mtxima, ni ka mipipi, ngu mtengo wa kona, madingano ni sihena sawe, masiku otshe masoni ka Mkoma; 32#Wona ni ka: Mit. 3:5-9. ni kuxayisa kha kwati ditenda da msengeletano, ni wukhalo wo sawuleka, ni kuvhuna vanana va ka Aroni, vanawe, ka mthumo wa Nyumbani ka Mkoma.
Currently Selected:
1 Makronika 23: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
