1 Makronika 21
21
Dhavhidha e ruma kubala vathu
(2 Samuwele 24:1-25)
1Sekoko Sathani a to wukela va ka Israyeli, e kujetela Dhavhidha kubala va ka Israyeli. 2Se Dhavhidha a to khene ka Jowabhi ni ka vathangeli va vathu: Tsulani mi ya bala va ka Israyeli, kukhukhela Bherisebha kala Dhani; se mi tisa mtengo, kasi ku ni ziva mtengo wawe. 3Sekoko Jowabhi a to khene: Mkoma a na engetele ka 100 mtengo wa vathu vava; awe mfumeli, nyamne wangu, ina hi nga sona sotshe sithumi sa nyamne wangu kani? Kambe ngu kutxani awe nyamne wangu e lava kuziva mhaka yiya kani? Ina kha ti na mbi onhisa va ka Israyeli kani? 4Kambe dipswi da mfumeli di to xula Jowabhi; ngu kumaha keto, Jowabhi a to khukha e tsimbila ka dotshe ditiko da va ka Israyeli; se e tshumela e wuya Jerusalema. 5Jowabhi a to ningela ka Dhavhidha mtengo wa vathu i ku wuwa; ka va ka Israyeli i ti ti 1.100.000 wa vavamna, va nga ti ti sikota kundiwita ditxhari; se ka va ka Judha i ti ti 470.000 wa vavamna, va nga ti sikota kundiwita ditxhari. 6Kambe va ka Levhi ni va ka Bhenjamini va kha balwa hagari kwawe, nguko dipswi da mfumeli di si amukelwi ka Jowabhi.
7Se yotshe mhaka yiya yi to maneka yi di bihile masoni ka Txizimu, ngu kumaha keto, txi to dayela va ka Israyeli. 8Sekoko Dhavhidha a to khene ka Txizimu: Ni onhile ngutu ngu kumaha tiya; kambe konkuwa, ni kombela ku u thavisa kuonha ka txithumi txako, nguko ni mahile wuphukuphuku wa hombe ngutu. 9A to womba koko Mkoma ka Gadhi, m'huti wa Dhavhidha, a txi khene: 10Tsula u ya womba ka Dhavhidha, u txi khawe: Mkoma a womba tiya: Na kuninga simaho siraru; sawula tximwetxo ka sona, ti to ni ku mahela. 11Se a to ta Gadhi ka Dhavhidha, a txi ta khene kwakwe: Mkoma a womba tiya: Ti sawulele ka tiya: 12Mwendo u lava malembe mararu a nzala, mwendo kuheta mitxima yiraru masoni ka valala vako, ni ku u manwa ngu ditxhari da valala vako, mwendo kambe u lava masiku mararu ale Mkoma a no tsayisa ditiko ngu ditxhari dakwe, i ku tiya, mtungu wa ditikoni ni Ngelozi ya Mkoma, si na khundumusa yotshe mihingano ya ka Israyeli; wona koko, konkuwa, taku i xamulo muni ni no ninga wule a nga ni ruma. 13Sekoko Dhavhidha a to khene ka Gadhi: Ni ha kuxanisekani ka hombe; ani koko, ni na wele manzani ka Mkoma, nguko wumbilu wakwe mbwa wungi ngutu, se ni nga wele ka manza a vathu.
14 Mkoma koko, a to rumela mtungu ditikoni ka Israyeli; se ku to fa 70.000 wa vathu. 15Mkoma a to rumela ngelozi kuya khundumusa Jerusalema; mbimo yile yona yi nga ti khundumusa Mkoma a to ti wona, se e ti laya ngu wubihi wule; a nje khene ka ngelozi yile yi nga ti ti xasela: Tidingani! Konkuwa, thavisa dianza dako. Se Ngelozi ya Mkoma yi ti ti emile hafuhi ni txizenda txa Orinani, Mujebhusi. 16Se ngako Dhavhidha a di guletile maso akwe, a to wona Ngelozi ya Mkoma, yi di ngu hagari ka mafu ni nzuma, ni ditxhari do swomolwa manzani ka yona, yi di di nawulutile txitimwi ka Jerusalema; sekoko Dhavhidha ni madhota, va ti fenengete tinguwo ta masaka, ve khizama ve namisa tikhohe hahatshi. 17Se Dhavhidha a to khene ka Txizimu: Ina hi nga ani ni nga khani va na balwe vathu kani? Kambe ngani nipune ni nga onha, ni mahile wubihi wa hombe; se tinvuta tiya ti onhile txani kani? Yowe! Awe Mkoma, Txizimu txangu, dianza dako di na wele txitimwi kwangu, ni txitimwi ka nyumba ya tate wangu, di nga tsayise vathu vako.
18Sekoko Ngelozi ya Mkoma yi to gela Gadhi ku e gela Dhavhidha taku Dhavhidha e kwelela eya aka txiluvelo txa Mkoma wuhuleloni ka Orinani, Mujebhusi. 19Dhavhidha a to kwelela koko, madingano ni mapswi a Gadhi, ale a nga ma womba ngu ditina da Mkoma. 20Se a di tshemberekile Orinani, a to wona ngelozi, e sisala, ni vanana vakwe va mune; Orinani a ti ti kuhulani ka fulaho. 21Dhavhidha a to ta ka Orinani, se Orinani a to wona Dhavhidha, e huma ngu wuhuleloni, eya khizama masoni ka Dhavhidha e namisa khohe hahatshi. 22Se Dhavhidha a to khene ka Orinani: Ni ninge wukhalo wuwa wa wuhulelo, kasi ku ni aka txiluvelo txa Mkoma kona; ni ninge ngu male ya wona, kasi ku txitsayiso txiya txi pinda txitimwi ka vathu. 23Sekoko Orinani a to khene ka Dhavhidha: Ti tekele wukhalo wuwa, awe mfumeli, nyamne wangu, u maha ti u ti lavako ngu wona; wona taku ni kuninga tihomu ta mphaxo wa kuhiswa, ni makange kasi kumaha tikhuni, ni fulaho ya mningelo wa sakudya; sotshe na ku ninga. 24Se mfumeli Dhavhidha a to khene ka Orinani: Ahim-him! Kukhata ni lava kuxava ngu male, nguko kha ni na mbi teka si i ku sako, ni ninga Mkoma, kasiku ni si ningeli mphaxo wa kuhiswa, wu ni nga wu mana walo. 25Se Dhavhidha a to ninga Orinani ngu wukhalo wule, mtengo wu kunemela ka wona i ku ka 600 wa maxekele a nzalama. 26Sekoko Dhavhidha a to aka koneho txiluvelo txa Mkoma, e ningela ka txona miphaxo ya kuhiswa ni miningelo ya kudikha, e dhana Mkoma, awule a nga mxamula ngu mndilo wa nzumani txitimwi ka txiluvelo txa mphaxo wa kuhiswa. 27Se Mkoma a to ninga sileleto ka ngelozi, se yona yi beta ditxhari da yona amu ka msava. 28A di ti woni Dhavhidha, ka mbimo yoneyo, taku Mkoma a mxamute txizendani ka Orinani, Mujebhusi, a to mmahela mphaxo koneho. 29Nguko ditenda da Mkoma, dile Mosi a nga gwimba txiwulani, ni txiluvelo txa mphaxo wa kuhiswa, ka yona mbimo yile, si ti ti mmangoni ka Gibheyoni. 30Se Dhavhidha asi dingani kuya ahale, eya wotisa ka Txizimu, nguko a ti thavile ngu mhaka ya ditxhari da Ngelozi ya Mkoma.
Currently Selected:
1 Makronika 21: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
