1 Makronika 19
19
Dhavhidha e xula va ka Amoni ni Vasiriya
(2 Samuwele 10:1-19)
1Se ku to maheka taku, msana keto, Nahasi mfumeli wa vanana va ka Amoni, efa, se mwanana wakwe, a to fuma ka wukhalo wakwe. 2Sekoko Dhavhidha a to khene: Ni na mahela wumbilu Hanumi, mwana Nahasi, nguko tate wakwe a ni mahete wumbilu. Ngu kumaha keto, Dhavhidha a to rumela sithumi so ya mthavelela, ngu mhaka ya tate wakwe. Se ngako sithumi sa Dhavhidha si di tile ditikoni ka vanana va ka Amomi, ka Hanumi, ku ta mthavelela, 3vathangeli va vanana va ka Amoni, va to kha vona ka Hanumi: Ina u alakanya ti to Dhavhidha wo xonipha tate wako, aku a nga kurumela vathaveleli kani? Ina sithumi sakwe kha si teli ku ta viya ni kuwonisisa ditiko kani?
4Ngu kumaha keto, Hanumi a to teka sithumi sa Dhavhidha, e si kuyula misisi, a txi vharulela syambalo sa sona ngu hagari kala minengeni, e si tovela. 5Se va to tsula veya gela Dhavhidha mhaka ya vathu vava; aniko ene a to rumela vo va hingeta, nguko vavamna vale va ti ha tinganani ka hombe. Sekoko mfumeli a to khene: Zumbani kona kheyo Jeriko kala kuza maletu anu me kula; sekoko mi na wuya.
6Mbimo yile koko, vanana va ka Amoni va nga wona taku va phayile livengo ka Dhavhidha, Hanumi ni vanana va ka Amoni, va to rumela 1.000 wa titalenta ta nzalama, kasi kuya lomba ngu yona sikotxikani ni vagadhi va mahantxhi va Mesopotamiya, ni va Siriya ni Mahaka, ni va Zobha. 7Se va to ti lombela 32.000 wa sikotxikani, mfumeli wa Mahaka ni vathu vakwe; ve ta gova ngu masoni ka Medhebha; kambe ni vona vanana va ka Amoni, va to patana ngu madhoropa awe veta kulwani.
8Se ngako Dhavhidha a di ti pfite, a to ruma Jowabhi ni dotshe dibutho da yimbi da vavamna va mtamo ngutu. 9Se mbimo yile vanana va ka Amoni va nga huma, va to ya fola ha txikeni ka didhoropa; aniko vafumeli vale va nga ta, va to ta ema ngu didhawa ka thembweni.
10Mbimo yi Jowabhi a nga wona to yimbi yita ngu masoni ni msana, a to sawula hagari ka vale va nga sawulwa va ka Israyeli, e va folisa kasiku va txi lwa ni Vasiriya; 11se vathu vamwani a to va ningela manzani ka mwanawe Abhixayi; awule a nga va folisa kasi kuva txi lwa ni vanana va ka Amoni. 12Se Jowabhi a to khene: Ngako Vasiriya va di ni mtamo ngutu kupinda ani, u na ta u ta ni vhuna; kambe ngako vanana va ka Amoni va di ni mtamo ngutu kupinda awe, ni nata, ni ta kuvhuna. 13Tsana, a hi tsaneni hi lwela vathu vathu, ni madhoropa a Txizimu txathu, se Mkoma a na mahe ti ti wonekako i di ta tinene masoni kwakwe.
14Sekoko Jowabhi ni vathu vale a nga ti navo, va to tshuketa masoni ve lwa ni Vasiriya; kambe Vasiriya va to tutuma masoni kwawe. 15Se mbimo yile vanana va ka Amoni va nga wona taku Vasiriya va tutumile, ni vona va to tutuma masoni ka Abhixayi, mwanawe wa Jowabhi, ve wulela didhoropani; kambe Jowabhi a to tshumela eya Jerusalema.
16Se mbimo yile Vasiriya va nga wona taku va xutwe masoni ka va ka Israyeli, va to rumela mitumi yo ya dhana Vasiriya vale va nga ti akile ngu didhawa da mtxhatuko ka mnambo; se Sofaki, mthangeli wa dibutho da yimbi da Hadhadhezeri a ti ti thangete masoni kwawe. 17Mbimo yi Dhavhidha a nga ziviswa, a to sengeleta votshe va ka Israyeli, e txhatuka Jordhani, e xoma yimbi yo va wukela; ngako Dhavhidha a di xomile yimbi yo wukela Vasiriya, va to lwa nayo. 18Kambe Vasiriya va to tutuma masoni ka va ka Israyeli, se ka Vasiriya Dhavhidha a to daya 7.000 wa mahantxhi o ndinda sikotxikani, ni 40.000 wa vavamna vo tsimbila ngu mikondo; e daya ni Sofaki, mthangeli wa dibutho da yimbi. 19Se si di ti woni koko, sithumi sa Hadhadhezeri taku si xutwe masoni ka va ka Israyeli, si to kombela kudikha ka Dhavhidha, si mthumela; se Vasiriya kha va swa kambe ve lamulela vanana va ka Amoni.
Currently Selected:
1 Makronika 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
