1 Makronika 16
16
1Va di tisile koko dibhokiso da Txizimu, va to di veka hagari ka ditenda dile Dhavhidha a nga ti di gwimbile; se ve maha mningelo wa kuhiswa, ni miphaxo ya kudikha masoni ka Txizimu. 2Se mbimo yile Dhavhidha a nga gwita kuningela ka Txizimu mningelo wa kuhiswa ni wa kudikha, a to katekisa vathu ngu ditina da Mkoma. 3Se a to abanisela ka votshe va ka Israyeli, vavamna ni vavasikati, mmwani ni mmwani e mninga dipawu ni dikatha da hombe da nyama, ni txingotwana txa vhinya.
4Se a to veka Valevhi vokari masoni ka dibhokiso da Mkoma, kuva ve thangela mthumo wa wukhongeli; kasi ku alakanya, ni kudhumisa, ni kukhozela Mkoma, Txizimu txa Israyeli. 5Mthangeli wa kona i ti Asafe, kulondeta Zakariya, se ngu msana ku to gameta Jeyeli ni Semiramoti, ni Jeyeli, ni Matitiya, ni Eliyabhe, ni Bhenaya, ni Obhedhi-Edhomi, ni Jeyeli, va di ni sitende ni timbila; se Asafe a ti veka titshodi. 6Se vaphaxeli Bhenaya ni Jahaziyeli, va to simama ni mipundu, masoni ka dibhokiso da txitumelelano txa Txizimu. 7Sekoko ka ditshiku donedo, Dhavhidha a to khata kuleletela Asafe ni vanawe kudhumisa Mkoma, a txi khene:
Ndando ya kudhumisa
(Masalmo 105:1-15; 96:1-13; 106:14,47-48)
8Dhumisani Mkoma, huwelelani ditina dakwe,
nuwelani simaho sakwe hagari ka vathu.
9Embelelani tindando ta ku m'dhumisa,
wombawombani ngu mithumo yakwe yo xamalisa.
10Ti guleteni ka ditina dakwe do sawuleka;
Ti na tsake timbilu ta va va lavako Mkoma.
11Lavani Mkoma ni mtamo wakwe;
lavani khohe yakwe yotshe mbimo.
12Alakanyani mithumo yakwe yo xamalisa ayi a nga yi maha;
sidiwukiso sakwe ni kululama ka txisofu txakwe.
13Anu liveleko la ka Israyeli, sithumi sakwe,
ni nanu vanana va Jakobe, misawulwa yakwe.
14Ene Mkoma, Txizimu txathu;
kululama kwakwe ku ka otshe mafu.
15Alakanyani txitumelelano txakwe yotshe mbimo,
ni sileleto sakwe si a nga si veka ka digumi da mazana a tiveleko;
16 # Wona ni ka: Gen. 12:7. ka txitumelelano txi a nga txi maha ni Abrahamu,
ni ka txixambanyo takwe ka Isaake;
17 # Wona ni ka: Gen. 28:13. txile a nga txi tsanisa e txi maha txileleto ka Jakobe,
txi maha txitumelelano txa kwa mbi guma ka Israyeli;
18a txi khene: Ni na kuninga ditiko da Kanana,
di maha thomba yanu.
19Aku va nga ti ngu mtengo wa wudotho,
i nga ti valuveli ka dona;
20va ti tsimbila-tsimbila ka ditiko ni ditiko,
va txi penga ngu ka mfumo ni mfumo.
21 # Wona ni ka: Gen. 20:3-7. Txizimu kha txa tumela ti to ni wammweyo e va xupha,
ngu mhaka yawe, Txizimu txi kawukile vafumeli, txi txi kha txona:
22 # Wona ni ka: Gen. 20:3-7. Mi nga gweseni ava ni nga va tota,
mi nga xupheni vaprofeti vangu.
23Embelelani Mkoma anu mafu otshe;
nuwelani kuhanyiswa kwakwe ngu masiku otshe.
24Embelelani wudhumo wakwe hagari ka matiko,
ni sixamaliso sakwe hagari ka vathu votshe.
25Nguko Mkoma mbwa hombe;
a fanela kudhumiswa ngutu,
wa thaviseka kupinda sotshe sizimu.
26Nguko sotshe sizimu sa ha mafuni kha si vhuni txilo;
kambe Mkoma a vangile nzuma.
27Kudhumiswa ni wuhombe si masoni kwakwe,
mtamo ni litsako si ha wukhaloni kwakwe.
28Ningani Mkoma, anu vathu va matiko,
ningani Mkoma wudhumo ni mtamo.
29Ningani Mkoma wudhumo wu wu fanelako ditina dakwe,
tisani siningo, mi ta masoni kwakwe;
Khizamelani Mkoma ha kusawulekani kwakwe.
30Dhudhumela masoni kwakwe;
otshe mafu ma na dhudhumele masoni kwakwe;
se mafu ma na tsana, kasi ku ma si zinginiswe.
31Yi na tsake nzuma;
ni mafu ma na peke mikulungwane;
se ti na wombwe hagari ka vathu taku: Mkoma wa fuma.
32Li na bhonge linene ni sotshe sile si ku ka lona,
ma na tsake mafu ni sotshe sile si ku ka ona.
33Sekoko yotshe mindonga ya txitinga yi na embelela ngu kutsaka masoni ka Mkoma;
nguko wata ku ta lamula mafu.
34Dhumisani Mkoma,
nguko mbwa mnene:
Ni lirando lakwe li zumba ngu ha ku si gwitiko.
35Se mi na khanu:
Hi hanyise, awe Txizimu txa kuhanyiswa kwathu,
hi sengelete u hi txhatxhisa ka matiko;
kasi ku hi na bonga ditina dako do sawuleka,
hi tsaka ngu wudhumo wako.
36Ku na dhumiswe Mkoma Txizimu txa Israyeli,
ngu malembe ni malembe.
Se votshe vathu va to kha vona: Amen!
Se ve dhumisa Mkoma.
Wukhozeli kona Jerusalema ni Gibheyoni
37Sekoko Dhavhidha a to siya Asafe ni vanawe koneho, masoni ka dibhokiso da txitumelelano txa Mkoma, kasi kuve khozela masoni ka dibhokiso otshe masiku, madingano ni txileleto txa ditshiku ni ditshiku. 38Se kambe a to veka Obhedhi-Edhomi ni vanawe va mtxhanu wa magumi ni dimwedo. Obhedhi-Edhomi, mwana Jedhutumi ni Hosa, a to va veka kuva vaemeli va sike.
39Se mphaxeli Zadhoki, ni vanawe, vaphaxeli, a to va veka masoni ka Nyumba ya Mkoma, ka wukhalo wo guleka wule wu nga ti Gibheyoni, 40kasi kuve ningela miphaxo ya kuhiswa, ka Mkoma, txitimwi ka txiluvelo txa miphaxo ya kuhiswa, ya yotshe mbimo, wusiku ni mitshikari; se ni to madingano ni tile ti nga bhalwa amu ka Mlayo wa Mkoma, wu wu nga leletelwa va ka Israyeli. 41Se hagari kwawe a to yisa Hemani, ni Jedhutumi, ni votshe vale va nga sawulwa, vale va nga dhanwa ngu matina awe, kuve dhumisa Mkoma, nguko lirando lakwe li zumba ngu ha ku si gwitiko. 42Sekoko Hemani ni Jedhutumi, i ti vaveti va mipundu ni titshodi ta vaembeleli, ni sivetaveta sa m'zeno wa Txizimu; aniko vanana va Jedhutumi, i ti vawoneleli va txike.
43 # Wona ni ka: 2 Sam. 6:19-20. Sekoko votshe vathu va to tsula, mmwani ni mmwani e ti yela m'tini kwakwe; se Dhavhidha a to tshumela eya katekisa va mwaya wakwe.
Currently Selected:
1 Makronika 16: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
