4 Musa 33
33
Perdalanen i Mesir nai mi Moab
1Enggo kessa itadingken bangsa Israel tanoh Mesir, ibas nuhnuhen mengekutken marga horongna gennep siniuluken si Musa dekket si Aron, mentadi ngo kalak i i barang piga-piga bekkas. 2Iperèntahken Jahowa ngo taba si Musa asa isurat gerar gennep bekkas sinisinggahen kalak i.
3Bangsa Israel menadingken Mesir i ari sipuluh lima bulan sada, sidari enggo kessa Paskah ari perlebbè. Ibagasen penjamotien Jahowa itadingken kalak i mo kuta Rameses, ipetengen-tengen bangsa Mesir, 4ninganna mengkuburken dukak-dukak buka baju kalak i sienggo ibunuh Jahowa. Merkitè bagi mo, ipetarar Jahowa magahken mergegohen ngo Ia daripada sembah-sembahen kalak Mesir i.
5Enggo kessa itadingken bangsa Israel kuta Raamses, mermalam mo kalak idi i Sukot. 6Nai berkat nola mo kalak i janah mermalam i Etam, i biding gurun pasir. 7I sidi nai balik nola mo kalak i mi Pi-Hahirot, kan kebincaren Baal-Zefon, nai mermalam nola mo i gembar Migdol. 8Nai kessa i itadingken kalak i nola mo Pi-Hahirot, meneberangi la- ut janah laus mi padang gurun Etam; enggo kessa tellu ari merdalan, mermalam mo kalak i i Mara. 9I sidi nai nola terrus mo kalak i janah merundung-undung i Elim; lot ngo i sidi sipuluh dua laè mul dekket pitupuluh kambenna korma.
10Nai kessa i itadingken kalak i nola mo Elim janah merundung-undung i gembar suak laut Suez. 11-14Nai merundung-undung nola mo kalak idi i gurun pasir Sin, nai i gembar Dofka, enggo kessa i i Alus, janah kessa i i Rafidim, tapi oda lot laè ènumen i sidi.
15-37I Rafidim nai terrus mo kalak i mi Delleng Hor janah merundung-undung i bekkas ènda: Gurun pasir Sinai, Kibrot-Taawa, “Pendèbaen Lobo,” Hazerot, Ritma, Rimon-Peres, Libna, Risa, Kehelata, Delleng Syafer, Harada, Makhelot, Tahat, Tarah, Mitka, Hasmona, Moserot, Bene-Jaakan, Hor-Gidgad, Jotbata, Abrona, Ezion-Geber, gurun pasir Zin, dekket Delleng Hor, iperbalengen tanoh Edom.
38-39 #
4 Ms. 20:22-28; 5 Ms. 10:6 Merkitè perèntah Jahowa, menangkeng mo Imam Aron mi Delleng Hor. I sidi mo ia matè i ari sada bulan lima tahun peempatpuluhken enggo kessa itadingken bangsa Israel tanoh Mesir. Merumur 123 tahun mo si Aron tikan matè i.
40 #
4 Ms. 21:1
Sintor bagidi terbertik mo berita bai raja nagerri Arad i tanoh Negeb, Kanaan selatan enggo menuju nagerrina bangsa Israel.
41-49I perdalanen i Delleng Hor nai mi napa Moab, merundung-undung mo kalak Israel i bekkas ènda: Zalmona, Funon, Obot, kuta Abarim sienggo merumpak i ladang Moab, Dibon-Gad, Almon-Diblataim, Delleng Abarim i gembar Delleng Nebo, dekket i lembeng Moab i biding laè Jordan, ndessing mi kuta Jeriko, i kellang-kellang Bet-Jesimot dekket Napor Sitim.
Perèntah-perèntah sinderrang mak dèng meneberangi Laè Jordan
50I kendet Moab idi, i biding Laè Jordan, i gembar kuta Jeriko iberèken Jahowa mo bai si Musa 51perèntah-perèntah ènda lako bai bangsa Israel, “Mula isuberrangi kènè Laè Jordan lako mbengket mi nagerri Kanaan, 52kennah puari kènè karina pengisi nagerri idi. Binasaken kènè mo karina gana-ganaen kalak i sinibahan ipas batu dekket tembaga nai bang dekket bekkas kalak i mersembah. 53Kennah rampasi kènè tanoh i janah rajai kè, kumerna Aku ngo merèken idi bai ndènè. 54#4 Ms. 26:54-56 Nai kennah pella-pella kènè mo i gabè milik pusakka kaum bak horong ndènè merkitè merkettip. Bai horong nterrem bilangenna kennah berènken ndènè mbellang bagianna, janah bai horong cituk bilangenna, sempit ma mo bagianna. 55Tapi mula oda ibukar kènè pengisi nagerri idi, isusahi kalak sitong merian i sidi mo kènè tosè bagè kersik i mata ndènè barang pè dori i nènèh ndènè. Daoh-daoh ariin gabè kalak i nola mo menjuhap kènè. 56Mula oda ibukar kènè kalak i, Kubinasaken mo kènè bagè sienggo Kusura-surai taba kalak i.”
Currently Selected:
4 Musa 33: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
