4 Musa 30
30
Hatoren tersèngèt pèlèen bagah-bagah
1Iberèken si Musa mo hatoren ènda taba pengulu marga bangsa Israel. 2#5 Ms. 23:21-23; Mat. 5:33 Mula lot sada kalak anak laki merbagah-bagah barang pè mengeruapken jandi merkitè isumpahken bai Jahowa, gabè berret mo dirina ipas jandina idi, kennah ipesaut ngo barang kadè kin sinijandikenna i, janah oda ndorok isondari sienggo iruapken idi.
3-4Mula lot sada kalak simerbaju simerian i bages bapana dèng merbagah-bagah bai Jahowa, janah iberret dirina ipas sada jandi, janah oda keberaten bapana tikan mendengkoh, jadi kennah ngo ipesaut karina niat dekket sinijandikenna i. 5Tapi mula sinderrang idengkoh bapana idi niat i, gabè keberaten ia, jadi oda ngo pella berret simerbaju i ibas niat dekket jandina idi. Iampuni Jahowa ngo ia, kumerna igerra bapana ngo ia.
6-7Mula lot sada kalak daberru simadèng sijahè merbagah-bagah barang pè memerretken dirina ibas sada jandi, barang tah enggo lebbèken kin ipikirken i barang pè tah asal iruapken bagidi sambing, jadi gabè berret mo ia ibas bagah-bagah barang pè jandina idi. Mula sijahè nola ia mi podi ari, tong ngo berret ia i bagah-bagah bak jandina idi, asal mo sinibalèna oda keberaten tikan ibettoh kessa tersèngèt mi si. 8Tapi mula igerra sinibalèna ngo tikala ibettoh kessa bagi, oda nè mo pella berret ia ipas bagah-bagah bak jandina idi. Iampuni Jahowa ngo ia.
9Mula lot sada kalak daberru mbalu barang pè daberru sienggo isirangken sinibalèna merbagah-bagah barang pè merjandi memerret dirina, berret mo ia ibas bagah-bagah barang pè jandina idi janah kennah ipesaut.
10Mula lot sada kalak daberru sienggo sijahè merbagah-bagah barang pè merjandi memerret dirina, 11kennah itebbus ngo sinijandikenna idi asal mo sinibalèna oda merkeberaten tikan idengkoh tersèngèt mi si. 12Tapi mula igerra sinibalèna ngo ia sinderrang idengkoh i, jadi oda nèngè ngo pella berret daberru idi ibagah-bagah barang pè jandina idi. Iampuni Jahowa ngo ia, kumerna igerra sinibalèna i ia. 13Lot ngo hak sinibalèna i lako menduè barang menondati bagah-bagah barang pè jandi sinibakin sinibagesna. 14Tapi mula oda ngo keberaten sinibalèna sinderrang mendengkoh idi, kennah itebbus daberru idi ngo karina bagah-bagah barang pè jandina idi. Toko ngo atè sinibalèna tersèngèt bagah-bagah bang jandi i kumerna oda keberaten ia sinderrang idengkoh tersèngèt mi si. 15Mula isondati sinibalèna i nola i podi ari bagah-bagah barang pè jandi sinibagesna i, gabè sinibalèna i nola mo menggongken kumerna penondatina idi.
16Idi mo hatoren-hatoren siniberèken Jahowa taba si Musa tersèngèt bagah-bagah dekket jandi sinibaing sada kalak simerbaju mula merian dèng ia ibages bapana, barang pè sinibaing sada kalak daberru sienggo sijahè.
Currently Selected:
4 Musa 30: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
