4 Musa 29
29
Pèlèen ibas Pèsta Tahun Mbaru
(3 Ms. 23:23-25)
1I ari sada bulan pitu kennah merpulung ngo kènè lako memoji Jahowa, janah mak ndorok mengulaken ulaen mberrat. Tupung arinkenna i kennah ipersora ngo sarunè. 2Pèlèken mo bai Jahowa pèlèen situtungen imo sada lembu tonggal bajar dèng, nai sada biri-biri tonggal, dekket pitu anak biri-biri tonggal merumur sitahun, karina i siso lot tikasna. Bau pèlèen idi mo pesennangken ukur Jahowa. 3Pèlèken ma mo pèlèen hantaren sienggo ipatokken, imo nditak isakkor minak zaitun: Tellu kilo mi lembu tonggal, dua kilo mi biri-biri tonggal, 4janah sada kilo mi gennep sada anak biri-biri. 5Pèlèken ma mo sada kambing tonggal mahan pèlèen kesasaen dosa. Merkitè cara bagi mo kènè maing kerja kesasaen dosa bangsa i. 6Karina pèlèen idi sikira tambahna ngo i mi pèlèen situtungen sinipèlèken rasken dekket pèlèen hantarenna, tupung ari sada gennep bulan. Bagi ma sikira tambahna mi pèlèen situtungen gennep ari sinipèlèken rasken dekket pèlèen hantaren bak pèlèen anggurna. Bau pèlèen situtungen i mo pesennangken ukur Jahowa.
Pèlèen tupung ari Pengampunen Dosa
(3 Ms. 23:26-32)
7 #
3 Ms. 16:29-34
I ari sipuluh bulan pitu kennah pulung ngo kènè lako memoji Jahowa. Tupung arinkenna i kennah puasa ngo kènè janah mak ndorok mahan bahaen. 8Pèlèken mo bai Jahowa pèlèen situtungen imo lembu tonggal bajar dèng, sada biri-biri tonggal dèkket pitu anak biri-biri tonggal merumur sitahun, karinana i oda lot tikasna. Bau Pèlèen idi mo pesennangken ukur Jahowa. 9Pèlèken mo pèlèen hantaren sinipatokken, imo nditak merdengan minak zaitun: Tellu kilo mi lembu tonggal, dua kilo mi biri-biri tonggal, 10janah sada kilo mi gennep sada anak biri-biri. 11Pèlèken ma mo sada kambing tonggal keperluen kerja kessaen dosa bangsa i, laènken pèlèen kesasaen dosa dekket pèlèen situtungen gennep ari bak pèlèen hantaren dekket pèlèen laè anggur sinipèlèken tupung arinkenna i
Pèlèen Pèsta Sapo-sapo Bulung
(3 Ms. 23:33-44)
12 #
2 Ms. 23:16, 34:22; 5 Ms. 16:13-15 I ari sipuluh lima bulan pitu kennah baingen ndènè ngo pulungen lako memoji Jahowa, janah oda ndorok mahan bahaen mberrat. Sidekkah pitu ari kennah baingen ndènè pesta lako pesangapken Jahowa. 13I ari perlebbè, pèlèken mo bai Jahowa pèlèen situtungen imo sipuluh tellu lembu tonggal bajar dèng, dua biri-biri tonggal bajar, dekket sipuluh empat anak biri-biri tonggal merumur sitahun karinana i oda lot tikasna. Bau pèlèen idi mo pesennangken atè Jahowa. 14Pèlèken ma mo pèlèen hantaren sienggo ipatokken imo nditak mersakkor minak Zaitun: Tellu kilo mi gennep sada lembu tonggal, dua kilo mi gennep sada biri-biri tonggal, 15janah sada kilo mi gennep sada anak biri-biri. Rebbak dekket pèlèen hantaren idi kennah ipèlèken ma mo pèlèen laè anggur siniperluken. 16Laènkenna i pèlèken ma mo sada kambing tonggal lako mahan pèlèen kesasaen dosa. Sikira tambahna ngo pèlèen i mi pèlèen situtungen gennep ari rasken pèlèen hantaren bak pèlèen anggurna.
17I ari peduaken pèlèken mo sipuluh dua lembu tonggal bajar. Dua biri-biri tonggal, dekket sipuluh empat anak biri-biri tonggal merumur sitahun, karinana i oda lot tikasna. 18-19Pèlèken ma mo rasken dekket idi karina pèlèen sidèbanna bakunè kin siniperluken tupung ari perlebbè i.
20I ari peteluken pèlèken kènè mo sipuluh sada lembu tonggal bajar deng, dua lembu tonggal dekket sipuluh empat anak biri-biri tonggal merumur sitahun, karinana i oda lot tikasna. 21-22Pèlèken ma mo rasken dekket idi karina pèlèen-pèlèen sidèban bagè siniperluken i ari perlebbè.
23I ari pe-empatken pèlèken mo sipuluh lembu tonggal bajar dèng, dua biri-biri tonggal, dekket sipuluh empat anak biri-biri tonggal merumur sitahun, karina i oda lot tikasna. 24-25Rasken dekket i pèlèken ma mo tong pèlèen-pèlèen sidèbanna bagè siniperluken i ari perlebbè.
26I ari pelimaken pèlèken mo sibah lembu tonggal bajar, dua biri-biri tonggal, dekket sipuluh empat anak biri-biri tonggal merumur sitahun, karina idi oda lot tikasna. 27-28Rasken dekket i pèlèken ma mo tong karina pèlèen sidèban bagè siniperluken ari perlebbè.
29I ari pe-enemken pèlèken mo ualuh lembu tonggal bajar dèng, dua biri-biri tonggal, sipuluh empat anak biri-biri tonggal merumur sitahun, karina idi oda lot tikasna. 30-31Rasken dekket idi pèlèken ma mo tong karina pèlèen sidèban bagè siniperluken i ari perlebbè.
32I ari pepituken pèlèken mo pitu lembu tonggal bajar dèng, dua biri-biri tonggal, sipuluh empat anak biri-biri tonggal merumur sitahun, karina i oda lot tikasna. 33-34Rasken dekket idi pèlèken ma mo tong karina pèlèen sidèban bagè siniperluken i ari perlebbè.
35I ari peualuhken kennah pulung ngo kènè lako memoji Jahowa janah mak ndorok mengulaken bahaen mberrat. 36Pèlèken mo bai Jahowa pèlèen situtungen imo sada lembu tonggal bajar dèng, sada biri-biri tonggal, dekket pitu anak biri-biri tonggal merumur sitahun, karinana i oda lot tikasna. Bau pèlèen sibagidi mo pesennangken atè Jahowa. 37-38Rasken dekket idi pèlèken ma mo tong karina pèlèen sidèban bagè pèlèen i ari perlebbè.
39Idi mo hatoren tersèngèt pèlèen situtungen, pèlèen hantaren, pèlèen laè anggur, bak pèlèen perdamèen sikennah pèlèenken ndènè bai Jahowa tupung pèsta-pèsta ndènè sienggo itentuken. Karina pèlèen idi kira tambahna mo i mi pèlèen sinipèlèken ndènè lako menggarar niat barang pè pèlèen sitergerrek ibas ukur.
40Ipesakat si Musa mo bai bangsa Israel karina nasa siniperèntahken Jahowa tabasa.
Currently Selected:
4 Musa 29: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
