4 Musa 27
27
Berru si Zelafehad
1Lot ngo lima berru si Zelafehad, imo si Mahla, si Noa, si Hogla, si Milka dekket si Tirza. Bapa si Zelafehad imo si Hefer, bapa si Hefer imo si Gilead. Bapa si Gilead imo si Makhir, bapa si Makhir imo si Manasye, janah bapa si Manasye imo si Josep. 2Laus mo limana berru si Zelafehad i menghadep taba si Musa, dekket taba Imam Eleazar bak karina bangsa i simertumpu i pèntu Undung-undung Jahowa. Nina kalak i mo, 3“Matè ngo bapa nami i gurun pasir janah oda lot dukakna daholi. Oda ngo ia mengèkut taba si Korah simengalo taba Jahowa. Ku- merna dosana sendiri ngo matè bapa nami i. 4Tapi kasa mo kennah mago gerarna ibas bangsa Israel nai pellin kumernaken oda lot dukakna daholi? Berrè mo bai nami bak sincelket bapanami tanoh pusakka.”
5Nai ipesakat si Musa mo simasa bai kalak i taba Jahowa, 6janah nina Jahowa mo taba si Musa, 7#4 Ms. 36:2 “Kadè sinidokken dukak-dukak si Zelafehad idi tuhuna patut ngo i. Asa berèken mo bai kalak i bak sincelket bapana tanoh mahan pusakkana. Harta siniwarisken si Zelafehad idi kennah isusurken bai berruna. 8Bagahken mo bai bangsa Israel, mula lot sada kalak daholi matè, janah oda lot anakna, tanoh pusakkana kennah isusurken bai berruna. 9Mula oda lot dukakna daberru, tanoh pusakkana i iberèken bai dengan sibeltekna daholi. 10Mula oda lot dengan sibeltekna daholi, bai dengan sibeltek bapana mo tanoh i. 11Mula oda lot dengan sibeltekna daholi janah oda ma lot dengan sibeltek bapana, gabè milik horongna sincelket kalohon mo tanoh i.” Kennah ipatuhi kalak Israel ngo ketentuen i sikira hatoren hukum sienggo iperèntahken Jahowa merkitè si Musa.
Si Josua ipilih gabè penggancih si Musa
(5 Ms. 31:1-8)
12 #
5 Ms. 3:23-27, 32:48-52 Nina Jahowa mo taba si Musa, “Menangkeng mo ko mi Delleng Abarim, janah tatap mo i sidi nai nagerri sinaing Kuberèken bai kalak Israel. 13Enggo kessa itatap kono idi matè mo kono bagè kakamu si Aron, 14kumerna ialo kènè sidua ngo perèntahKu i delleng Zin. Tikan i Meriba ngut-nguten ngo karina sinterrem i taba Aku, keppè oda nggèut kènè sidua petararken kuasangKu i hadeppen kalak i merdemmu mi laè idi.” (Masa ngo idi i takal laè Meriba i Kades, i gurun pasir Zin).
15Nai mersodip mo si Musa, 16“Ialè, Dèbata Jahowa simemerèken kenggeluhen bai nasa singgelluh, pengidoenku, pebangkit mo sada kalak sindorok menguluken bangsa èn; 17#1 Raj. 22:17; Hes. 34:5; Mat. 9:36; Mrk. 6:34 sada kalak sindorok gabè pakalima tikan mergeraha kalak i. Ulang belli bangsamen bagè biri-biri siso lot merpermakan.”
18 #
2 Ms. 24:13
Idokken Jahowa mo bai si Musa, “Diloi mo si Josua, anak si Nun. Sada kalak simpantas ngo ia. Ampèken mo tanganmu mi babontakalna. 19Dokken mo cènder ia i lebbè Imam Eleazar dekket i lebbè bangsa i karina. I lebbè kalak i karina kennah mongmongenkennmu mo magahken si Josua mo gabè gancihmu. 20Sohken mo bana dèba ibas kuasamu nai, asa iuèi bangsa Israel ia. 21#2 Ms. 28:30; 1 Sam. 14:41, 28:6 Kennah ipido si Josua ngo peddah bai Imam Eleazar nai, janah kennah ikusoken Imam Eleazar ngo kadè lemmo atèngKu merkitè Urim dekket Tumim. Merkitè dalan bagidi mo si Eleazar menguluken si Josua dekket karina bangsa Israel ibas karina simasa sisempa bai kalak i.” 22Iulaken si Musa mo bagè siniperèntahken Jahowa tabasa. Idokken mo si Josua cènder i lebbè Imam Eleazar bak karina bangsa Israel. 23#5 Ms. 31:23 Nai iampèken mo tanganna mi babontakal si Josua janah imongmongken magahken si Josua mo gancihna, tosè mi sinidokken Jahowa tabasa.
Currently Selected:
4 Musa 27: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
