4 Musa 26
26
Pengkèrahen peduakaliken
1 #
4 Ms. 1:1-46
Enggo kessa mentadi mballa i, idokken Jahowa mo taba si Musa dekket si Eleazar, dukak imam Aron, 2“Kennah kerahen ndènè ngo karinana bangsa Israel mengèkutken horongna gennep. Karina anak laki simerumur duapuluh tahun mi babo sienggo ndorok gabè soridadu, kennah isuratken.” 3-4Iulaken si Musa dekket si Eleazar mo perèntah idi. Idilo kalak i mo karina anak laki simerumur duapuluh tahun mi babo janah pepulungken kalak i i lembeng Moab, i kèpar laè Jordan, i gembar kuta Jeriko.
Enda mo kalak Israel simbungkas i Mesir nai:
5Ibas marga Ruben nai, dukak si Jakob situaen imo: Horong si Henokh, si Palu, 6si Hezron dekket si Karmi. 7Pulung karina anak laki bai kalak i nai buèna 43.730 kalak. 8Dukak si Palu imo si Eliab, 9janah dukak-dukak si Eliab imo si Nemuel, si Datan dekket si Abiram. Ukum si Datan dekket si Abiram enggo ipilih bangsa i, tapi gabè mersada nola mo kalak i dekket simengèkutken si Korah lako mengalo si Musa dekket si Aron lako mengalo Jahowa. 10Nai ngangang mo tanoh i janah ibendut mo kalak i gabè matè mo kalak i rebbak dekket si Korah dekket simengèkutkensa tikan roh api lako mengelekkup 250 kalak anak laki. Gabè sada pernèngèten mo simasa i bai bangsa Israel. 11Tapi ukum dukak-dukak si Korah oda dekket terbunuh.
12I marga Simeon nai imo: Horong si Nemuel, si Jamin, si Jakhin, 13si Zerah dekket si Saul. 14Anak laki i horong i nai buèna 22.200 kalak.
15I marga Gad nai imo: Horong si Zefon, si Hagi, si Syuni, 16si Ozni, si Eri, 17si Arod dekket si Areli. 18Anak laki i horong-horong kalak i buèna 40.500 kalak.
19-21I marga Juda nai: Horong si Syela, si Peres, si Zerah, si Hezron dekket si Hamul. Dua ngo anak si Juda imo si Er dekket si Onan enggo matè i tanoh Kanaan. 22Karina daholi ibas horong-horong kalak i nai buèna 76.500 kalak.
23I marga Isasar nai imo: Horong si Tola, si Pua, 24si Jasub dekket si Simron. 25Buè daholi i horong-horong kalak i nai 64.300 kalak.
26I marga Zebulon nai imo: Horong si Sered, si Elon dekket si Jahleel. 27Buè daholi i horong-horong kalak i nai 60.500 kalak.
28I pemparen si Josep nai, simeranakken dua daholi imo: Marga Manasye dekket marga Efraim.
29I marga Manasye nai imo: Si Makhir, dukak si Manasye, imo bapa si Gilead; janah horong-horong sitersurat èn imo pinempar si Gilead. 30Horong si Iezer, si Helek, 31si Asriel, si Sekhem, 32si Semida dekket Hefer. 33Si Zelafehad anak si Hefer oda lot merdukak daholi, pellin daberru ngo kesa. Gerar kalak i imo si Mahla, si Noa, si Hogla, si Milka dekket si Tirza. 34Buè daholi i horong-horong kalak i nai 52.700 kalak.
35I marga Efraim nai imo: Horong si Sutelah, si Bekher, dekket si Tahan. 36Horong si Eran imo pinempar si Sutelah. 37Buè daholi ibas horong-horong idi nai buèna 32.500 kalak. Idi mo horong-horong pinempar si Josep.
38I marga Benjamin nai imo: Horong si Bela, si Asybel, si Ahiram, 39si Sefufam dekket si Hufam. 40Horong si Ared dekket si Naaman imo pinempar si Bela. 41Buè daholi ibas horong-horong idi 45.600 kalak.
42I marga Dan nai: Horong si Suham. 43Buè daholi i horong idi 64.400 kalak.
44I marga Asyer nai: Horong si Jimna, si Jiswi dekket si Beria. 45Horong si Heber dekket si Malkiel imo pinempar si Beria. 46Lot ngo sada berru si Asyer mergerar si Serah. 47Buè daholi i horong-horong idi nai 53.400 kalak.
48I marga Naptali nai imo: Horong si Jahzeel, si Guni, 49si Jezer dekket si Syilem. 50Buè daholi i horong-horong idi nai 45.400 kalak.
51Pulung karina anak laki kalak Israel 601.730 kalak.
52 #
4 Ms. 34:13; Jos. 14:1-2 Nai nina Jahowa mo taba si Musa, 53“Pembagiken mo tanoh i bai marga-marga bangsa Israel mengèkutken buè gennep marga i. 54-56Bakin mo i merkitè cara mertendung. Bai marga sinterremna kennah mbellang berèken, janah bai marga cituk bilangenna cituk ma mo berèken.”
57Marga Lewi imo horong si Gerson, si Kehat dekket si Merari. 58Masuk pinempar kalak i mo horong si Libni, si Hebron, si Mahli, si Musi dekket si Korah. Si Kehat imo bapa si Amram. 59Jejap ngo si Amram dekket si Jokhebed, berru si Lewi. Ukum si Jokhebed idi tubuh i Mesir ngo. Dua kalak ngo anak si Amram dekket si Jokhebed imo: Si Aron dekket si Musa bak sada daberru, imo si Miryam. 60#4 Ms. 3:2 Empat ngo anak si Aron imo: Si Nadab, si Abihu, si Eleazar dekket si Itamar. 61#3 Ms. 10:1-2; 4 Ms. 3:4 Matè ngo si Nadab dekket si Abihu sinderrang memèlèken api siso ikelemoken Dèbata. 62Buè daholi simerumur sada bulan nai mi babo i marga Lewi 23.000 kalak. Jaè ngo kalak idi isuratken ibas denganna sada bangsa nai, kumerna oda terolih tanoh pusakka kalak idi i Israel.
63Idi mo gerar-gerar sinibakin si Musa dekket Imam Eleazar tersèngèt horong-horong kalak Israel sinderrang ibaing kalak i pengkèrahen i lembeng Moab i kèpar laè Jordan i gembar kuta Jeriko. 64Ibas kalak sinisuratken si Musa bak si Aron gerar-gerarna tikala i i gurun pasir Sinai, oda lot nè nggelluh giam sada kalak pè. 65#4 Ms. 14:26-35 Enggo idokken Jahowa kin ukum kalak i karina kennah matè i gurun pasir. Janah tuhuna ngo matè kalak i karina, laènken si Kaleb dukak si Jefune dekket si Josua dukak si Nun.
Currently Selected:
4 Musa 26: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
