4 Musa 12
12
Ihukum si Miryam
1Enggo ibuat si Musa sada kalak daberru Kus mahan sinibagesna, janah imo ibakin si Miryam dekket si Aron cida- lihen lako mengerèhèi si Musa. 2Nina kalak i mo, “Pana pellin tarap si Musa nai ngo kessa Jahowa mengerana? Otang arap kita pè ndorok ngo Ia mengerana?” Idengkoh Jahowa mo kadè sinicakapen kalak i. 3Ukum si Musa percerrep ukur kalohon ngo, mengelampoi karina jelma singgelluh i dunia èn.
4Nai sintempu idokken Jahowa mo mbang si Musa, si Aron dekket si Miryam, “Laus mo kènè sitellu mi Undung-undungKu.” Nai laus mo kalak idi mi sidi, 5janah susur mo Jahowa ibagasen binangun hembun. Jengjeng mo Jahowa i pèntu Undung-undungNa janah idiloi mo si Aron bak si Miryam. Mi lebbè mo kalak i duana, 6janah nina Jahowa mo, “Dengkohken mo ranangKu ènda! Mula lot i tengah-tengah ndènè nai nabi, Kupacidah mo diringKu bana ibagasen alaten-alaten, janah mengerana dekketsa merkitè nipi. 7#Heb. 3:2 Tapi oda ngo bagidi ukum naposongKu si Musa. Ia mo kalak sesetiana ibas bangsangKu. 8Janah mengerana ngo Aku hadep abè dekketsa, ntangkas oda merkoning-koningen. Soh mi rupangKu pè enggo ngo idah! Kasa pang kènè mengalo si Musa, naposongKu idi?”
9Melaga kalohon mo Jahowa bai kalak i sidua, janah laus mo Ia. 10Sinderrang itadingken hembun i kessa Undung-undung Jahowa, taridah mo mènter kenna sakit puru mahantu si Miryam; dagingna mbulan bagè kapas. Tikan itulihken si Aron dempak si Miryam janah idah enggo kenna sakit sibagidi ia, 11nina mo mbang si Musa, “Tolong mo, tuan nami, ulang mo belli kami idersa kumerna dosa sikubahan kami ibagasen kemotoen nami i. 12Ulang mo belli ia bagè anak mbara baru tubuh enggo matè, dekket dagingna sitengah melala.”
13Nai pingko-pingko mo si Musa taba Jahowa, “Alè Dèbata, kupengido, pemalum mo ia.”
14 #
4 Ms. 5:2-3
Ialoi Jahowa mo, “Ukum icèduri bapana kin abèna, otang sidekkah pitu ari ia kennah menggongken kememalu? Liplip mo ia i perundung-undungen nai sidekkah pitu ari, janah enggo kessa i, ndorok mo ia balik mbengket.” 15Nai iliplip mo si Miryam i perundung-undungen idi nai sidekkah pitu ari, janah oda mèrèt bangsa idi i sidi nai mèma iduè si Miryam balik mi perundung-undungen. 16Nai itadingken kalak i mo Hazerot janah mermalam i padang gurun Paran.
Currently Selected:
4 Musa 12: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
