3 Musa 22
22
Kebadiaen pèlèen
1Idokken Jahowa mo si Musa 2pesakatken perèntah ènda bai si Aron bak taba dukak-dukakna, “Merandal mo bakin barang kadè sinipèlèken bangsa Israel simerkedekoen taba Aku, asa ulang pekemerken gerarKu simbadia i kènè. Aku ngo Jahowa. 3Mula lot sada kalak ibas pinemparmu nai tupung sinderrang melamun ia menjolmiti pèlèen-pèlèen simbadia sinihujuken bangsa Israel taba Aku, oda ndorok nèngè ia mengkebasi i langgaten. Hatoren idi merlakku soh mi sidekkah-dekkahna. Aku ngo Jahowa.
4Mula lot sada kalak pinempar si Aron kenna sakit puru mahantu, barang pè kenna sakit ibas dengan tubuhna sanga mengkaruarken nanah, oda ndorok ia kipangan pèlèen simbadia mula mak dèng ia mpanting. Gabè melamun ngo sada kalak imam mula terjamahsa barang kadè si melamun kumerna kenna bangkè. Melamun ma ngo ia mula kaluar bennihna, 5barang pè dais mi binatang barang kalak simelamun. 6Sada kalak imam tah kumarna kadè pe i gabè melamun tong ngo melamun soh sundut mataniari. Janah enggo nola pè sundut mataniari oda ndorok dèng ia kipangan sinipèlèken bai Jahowa mula mak dèng ia merridi. 7Enggo kessa sundut mataniari mpanting mo ia janah ndorok mo kipangan pèlèen i, kumerna i ngo pangaenna. 8Oda ndorok ia kipangan jukut binatang matè bagidi sambing barang pè matè kumerna ijerngem binatang sinirambah. Mula ipangan idi, melamun mo ia. Aku ngo Jahowa.
9Karina imam kennah menguèi karina hatoren siKuberèken. Mula oda, mersalah ngo kalak idi janah kennah matè, kumerna mengelausi hatoren-hatoren simbadia i. Aku ngo Jahowa, janah Aku ngo memilih kalak idi mahan milikKu.
10Pèlèen sinihujuken taba Aku pellin sisimpangaen imam i sendiri ngo kessa ndorok kipangan i; kalak sidèban oda ndorok, agia pè kalak i sada sapo dekket imam i barang pè tah gajinna. 11Tapi hamba-hamba sinitokor imam idi merkitè kèpèngna sendiri barang pè situbuh i sapona, ndorok ngo kipangan pangaen jambar imam idi. 12Berru imam si sijahè bai sada kalak siso imam, oda ndorok kipangan pèlèen idi. 13Tapi berru imam sienggo mbalu barang sienggo isirangken janah oda merdukak, nai balik nola ia mi sapo bapana janah gabè tanggungenna, ndorok ngo ia kipangan pangaen jambar bapana i. Pellin simpangaen imam sambing ngo kessa ndorok kipangan pèlèen idi.
14Mula lot sada kalak siso masuk bilang simpangaen imam keppè siso pemettohenna kipangan pangaen sinipèlèken bai Jahowa, kennah igancih ngo bai imam itambah dekket duapuluh parsen. 15Oda ndorok ilamuni imam-imam pèlèen sienggo merkedekoen baKu 16merkitè ibelli ipangan kalak siso merhak lako kipangan. Memaing gabè salah ngo idi bai kalak i janah mengkerohken hukumen tabasa. Aku ngo Jahowa, janah Aku ngo pebadiaken pèlèen idi.”
17Idokken Jahowa mo si Musa 18-19pesakatken bai si Aron, bai dukak-dukakna, dekket bai karina bangsa Israel hatoren ènda. Mula lot sada kalak Israel barang sada kalak sidèban siroh merian rebbak dekket kalak Israel memèlèken pèlèen situtungen lako menggarar sininiatkenna kin, barang pè pèlèen sitergerrek ibas ukurna nai, kennah tonggal ngo pinakan idi janah oda ndorok lot tikasna asa ndorok ijalo. 20#5 Ms. 17:1 Ulang ipèlèken pinakan mertikas, kumerna oda nggèut Jahowa menjalo i. 21Mula lot sada kalak memèlèken pèlèen perdamèen bai Jahowa lako menggarar bagah-bagahna kin barang mahan pèlèen sitergerrek ibas ukurna, oda ndorok mertikas pinakan idi, asa ndorok ijalo. 22Ulang mo pèlèken bai Jahowa pinakan pètung, pinakan sienggo mpenggel tulanna, barang pè pinakan siugahen, pinakan sibaroh-barohen, pinakan sipuruen barang kuro-kuroen. Pinakan sibagidi ulang ipèlèken mahan pèlèen sipanganen i babo langgaten. 23Mahan pèlèen sitergerrek ibas ukur ndorok ngo kènè memèlèken pinakan siso pella kennah mendè rua-ruana; tapi ukum lako mahan penggarar niat, pèlèen sibagidi oda ndorok terjalo. 24Ulang mo ipèlèken bai Jahowa pinakan mula ncèda sangapna kerna terkapit, barang igettap, ugah mpespes barang iambongken. Oda ndorok masa sibagidi i nagerri ndènè.
25Pinakan jinalo bai kalak sidèban nai mak ndorok ipèlèken mahan pèlèen sipanganen. Mertikas ngo ètongen pinakan i janah oda ndorok ijalo.
26-27Anak lembu, anak biri-biri barang anak kambing sirimbaru tubuh kennah tong rebbak indungna sidekkah pitu ari. Lebbè dung pè sipitu ari i asa ndorok ijalo mahan pèlèen sipanganen. 28Ulang memèlèken indung lembu barang biri-biri barang kambing rebbak dekket anakna sidarinkenna i. 29Mula ipèlèken kènè pèlèen lias atè bai Jahowa, ulaken mo idi rembang mi hatoren, asa ijalo pèlèen ndènè i. 30Pangan mo pèlèen idi arinkenna i, janah situk pè ulang tadingken mi sibarembenkenna nola.
31Nina Jahowa ngo, “Uèi mo karina perèntahKu, Aku ngo Jahowa. 32Ulang lèai gerarKu simbadia i. Karina bangsa Israel kennah menembah Aku Simbadia kalohon. Aku ngo Jahowa janah Aku ngo memakin kènè mbadia. 33Kuembah kènè mbungkas i Mesir nai, asa Aku gabè Dèbata ndènè. Aku ngo Jahowa.”
Currently Selected:
3 Musa 22: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
