3 Musa 21
21
Kebadiaen Imam-imam
1Idokken Jahowa mo si Musa pesakatken perèntah ènda taba imam-imam pinempar si Aron, “Sada kalak imam mak ndorok mengelamuni dirina sendiri kumerna dekket mengadeppi ulaen mengkubur kadè-kadèna, 2laènken mula simatè idi inangna, bapana, dukakna, dengan sibeltekna 3barang turangna sioda dèng sijahè, janah rebbak sada bages deketsa. 4Oda ndorok ia mengelamuni dirinna merkitè mengadeppi ulaen mengkuburken sincelket sinibagesna.
5 #
3 Ms. 19:27-28; 4 Ms. 14:1 Sada kalak imam oda ndorok mencukkur dèba buk sini takalna janah mak ndorok mengkiskis janggutna barang pè mengugahi dagingna dekket barang kadè sintajem lako menuduhken mersindanggel ia. 6MilikKu sinikelini ngo ia janah oda ndorok merkemmer ibaing gerarKu. Pèlènkenna ngo pèlèen pangaen bangKu, jadi kennah mbadia ngo ia. 7Sada kalak imam oda ndorok kabin dekket sada kalak daberru luhlah barang sada kalak siso gadi, barang daberru sienggo nung sirang, kumerna milikKu ngo imam. 8Kennah iakui bangsa Israel ngo ukum imam imo kalak sinikelini tabaKu kumerna ia ngo memèlèken pèlèen pangaen taba Aku. Aku ngo Jahowa; Simbadia ngo Aku janah Kuperbadiai ngo bangsangKu. 9Mula gabè daberru luhlah berru ni sada kalak imam, mengelèai bapana ngo ia jadi kennah itutung ia soh matè.
10Enggo mo ipebangkit Imam Huntuen merkitè mengarirken minak mi babo takalna dekket merkitè memakèken pakèen imam huntuen tabasa. Kumernana i mak ndorok ibelli sursar bukna, barang pè mengeribak olesna sikira tanda bonek atè. 11-12Enggo mo ia ipèlèken taba aku lako mahan milikKu, jadi mak ndorok ia mengelamuni dirina. Oda ndorok ma ia mengelamuni Undung-undungKu merkitè karuar i sidi nai lako mbengket mi bages sin bangkè, agia pè idi bangkè bapana barang bangkè inangna sendiri. 13-14Pellin taba sada kalak simerbaju gadi ibas bangsana nai ngo kessa ndorok ia memuat berru. Oda ndorok ia kabin dekket sada kalak simbalu barang pè dekket sada kalak daberru sienggo pennah isirangken dèba, barang pè dekket sakalak daberru sibabijalang. 15Mula ilausi hatoren i, karina dukak-dukakna aturen mbadia kin nemmuken, gabè melamun ngo. Aku ngo Jahowa janah enggo Kukelini ia gabè Imam Huntuen.”
16Idokken Jahowa mo si Musa 17lako mendokken bagèen bai si Aron, “Mula lot pinemparmu mertikas oda ndorok ia memèlèken pèlèen sipanganen taba Aku. Merdalan ngo hatoren i soh mi sidekkah-dekkahna. 18Kalak simemèlèken pèlèen mak ndorok mertikas dagingna, imo ka- lak pètung barang pangpangen, kalak simertikas abèna barang sendihi dagingna, 19kalak simatè serrap tanganna barang kèpang nènèhna, 20kalak mukung barang pè kalak rennek, kalak sipaloen barang pè sipuruen dekket kalak sinikasing. 21Karina pinempar si Aron simertikas dagingna oda ndorok memèlèken pèlèen sipanganen bangKu. 22Tapi ndorok ngo ia kipangan pangaen sinipèlèken, bang pè idi pèlèen sipanganen simbadia barang pè pèlèen sipanganen simbadia kaloen. 23Kumerna mertikas ngo daging kalak i, oda ndorok ia menjolmiti kirè-kirè simengkelang-kelangi Bilik Simbadia barang pè langgaten. Oda ndorok ia mengelamuni barang kadè sienggo ihujuken lako baKu, kumerna Aku ngo Jahowa, janah Aku ngo simengkelini barang-barang idi.”
24Idi mo hatoren-hatoren sinipesakat si Musa bai si Aron bak dukak-dukakna dekket bai karina bangsa Israel.
Currently Selected:
3 Musa 21: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
