2 Musa 3
3
Si Musa idiloi Dèbata
1Sinderrangna i ipermakan si Musa mo biri-biri dekket kambing si Jitro, simatuana, imam i tanoh Midian. Tikan mengarak pinakan i ia mi keparen padang gurun, soh mo ia mi delleng Sinai, imo delleng simbadia. 2#Ul. 7:30-34 Ipacidah malaèkat Jahowa mo dirina tabasa merumangken bendella api mergollah-gollah i tengah rambah i. Idah si Musa mo rambah i lakat, tapi oda messeng. 3“Legan mamo tuhu èn, dok atèna ibagasen.” Oda messeng rambah i. “Mula bagi, kujolmiti mo lebbè asa kuidah ntangkas.”
4Idah Jahowa mo si Musa menjolimiti bekkas i, nai mèter idiloken mo i tengah rambah i nai, “O Musa! Musa!”
“Isèn ngo aku,” nina si Musa mengaloi.
5Nai nina Dèbata mo, “Ulang ko ndessing. Talkasi mo cipatumi, ai tanoh simbadia ngo bekkasmu cènder i. 6Aku ngo Dèbata mpungmu, Dèbata si Abraham, si Isak dekket si Jakob.” Nai mènter ikemkemi si Musa mo abèna, kerna mbiar ngo ia mengidah Dèbata.
7Nai nina Jahowa nola mo, “Enggo Kuidah kinidersa bangsangKu i tanoh Mesir, janah enggo Kudengkoh tenggo-tenggo kalak i. Situhuna, Kubettoh ngo karina kinipersah kalak i. 8Kumarna i ngo asa susur Aku lako paluahken kalak i ibas tangan kalak Mesir nai, janah mengarak kalak i mbungkas i nagerri i nai mi nagerri mbellang kalohon. Mendè ngo tanohna janah nggabur, i iani bangsa Kanaan, bangsa Het, Amori, Feris, Hewi, dekket Jebusi ngo tanoh i bagendari. 9Enggo ntangkas Kudengkoh uo-uo bangsa Israel, janah enggo Kuidah barang bakunè pendersa bangsa Mesir taba kalak i. 10Kupasulak mo ko bagèndari lako menghadep raja Mesir, asa ko menguluken bangsangKu mbungkas i nagerri i nai.”
11Tapi nina si Musa mo taba Jahowa, “Mèter kadè mo pana aku èn, asa sanggup menghadep taba raja i janah mengarak bangsa Israel mbungkas i Mesir nai?”
12Ialoi Jahowa mo, “Kudengani pè ko. Janah mula enggo iarak kono bangsa i mbungkas i Mesir nai, sembah kènè mo Aku luas i delleng èn. Imo tandana Aku pasulakken ko.”
13 #
2 Ms. 6:1-2
Ialoi si Musa mo, “Tapi mula kujumpai kalak Israel janah kudokken taba kalak i, ‘Dèbata mpung ndènè i ngo pasulakken aku roh mendahi kènè,’ pasti kennah ikusoken kalak i, ‘Isè ngo gerarna?’ Nai bakunè mo pengaloingku taba kalak idi? ”
14 #
Alm. 1:4, 8 Nina Dèbata mo, “Aku imo AKU LOT. Janah èn mo kennah dokenkenmu taba bangsa Israel, Ukum sinigeraren AKU NGO AKU, enggo pasulakken aku mendahi kènè. 15Ranaken mo taba kalak i, Dèbata si Abraham, si Isak dekket si Jakob ngo pasulakken ko mendahi kalak i. Aku ngo Jahowa, ingo gerarKu soh mi amman sumendah. Imo penggerarenkenKu taba karina bangsa turun-tumurun. 16Berkat mo ko janah pepulung mo karina pengulu-pengulu bangsa Israel. Bagahken taba kalak i, ukum Aku, Jahowa Dèbata empung kalak i ngo, Dèbata si Abraham, si Isak dekket si Jakob, enggo kupacidah diringku taba ko. Bagahken ma taba kalak i, ukum Aku enggo pennah roh mendahi kalak i janah enggo kuidah barang bakunè pemakin bangsa Mesir taba kalak i. 17Janah enggo mo Kuharkatken lako meng- arahken kalak i mbungkas i tanoh Mesir nai, bekkas kalak idi idersa janah menguluken kalak i mi sada nagerri merandal janah nggabur tanohna, imo nagerri kalak Kanaan, kalak Het, Amori, Feris, Hewi dekket Jebusi.
18Dak idengkohken bangsangKu ngo ranamu. Nai rebbak laus mo kono dekket karina pengulu-pengulu Israel menghadep raja Mesir, janah dokken mo bana: ‘Jahowa Dèbata kalak Heber ngo enggo roh pacidahken dirina taba kami. Bagèndari pè, paduè mo kami laus daohna tellu ari merdalan dempak gurun pasir lako pesakatken pèlèen nami taba Jahowa Dèbata nami.’ ” 19Nai idokken Dèbata nola ma, “Kubettoh ngo oda ipadiat raja Mesir i kènè laus, ukum mak ipaksa ia. 20Tapi Kubaingken mo kuasangKu menghukum Mesir merkitè olpek sinaing Kupemasa i si. Enggo kessa bagidi, iduè mo kènè berkat.
21 #
2 Ms. 12:35-36
Kubaing pè kalak Mesir mermasèh atè midah kènè, asa sinderrang berkat i bangsangKu, oda ngo berkat bagi sambing, mèter kadè poda iembah. 22Gennep daberru Israel ipido mo bai kalak Mesir sinigembar bagesna nai dekket bai daberru Mesir sisada bages dekket kalak i pakè-pakèen pirak dekket emmas. Pakèken kènè mo i taba dukak-dukak ndènè. Merkitè bagi mo ipupusi kènè silot bai kalak Mesir.”
Currently Selected:
2 Musa 3: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
