2 Musa 21
21
Pemaing taba hamba
(5 Ms. 15:12-18)
1Nai nina Jahowa mo taba si Musa, “Pesakat mo taba kalak Israel hatorenen. 2#3 Ms. 25:39-46 Mula itokor kènè sada kalak hamba i bangsa ndènè nai sendiri, kennah mahan bahaen mo ia rebbak kènè sidekkah ennem tahun. I tahun pepituken kennah iselangsaèken mo ia janah oda pella kadè mahan gararenna. 3Mula anak perana dèng ngo ia sinderrang gabè hamba ndènè, ukum sinibagesna oda ndorok deket iembah tikan selang saè i ia. Tapi mula enggo kin ngo ia merbekkas kom, tikanna gabè hambamu ia, ndorok mo dekket sinibagesna idi rebbakensa. 4Mula iperunjukken tuanna i ia bai sada kalak daberru, nai mula lot dukakna, tuanna idi ngo sidasa sinibages deket dukakna idi, janah oda ndorok mengèkut rebbak dekket hamba i tikan selang saè i ia. 5Tapi mula umpamana idokken hamba i ngkelleng atèna midah sinibagesna i, dukak-dukakna, dekket tuanna, janah oda nggèut ia iselangsaèken, 6nai kennah iuluken tuanna idi mo ia mi bages jerro. Isuruh mo i si hamba idi cènder tunandè i pèntu barang i tihang pèntu bages jerro i, janah kennah itustus tuanna i mo coping hamba idi. Nai gabè hambana mo ia sidekkah nggelluh.
7Mula sada kalak daberru Heber idèa bapana gabè hamba, oda ngo iselangsaèken daberru idi enggo kessa pul ennem tahun, jadi oda dos dekket hamba daholi. 8Mula oda ngo ia peloloken atè tuanna simerniat naing mengkabinisa, kennah idèa ngo ia balik bai partuana. Oda ndorok idèa daberru idi taba kalak sidèban, kerna enggo oda selloh ia ibakin tuanna siso menuhui jandina. 9Mula lot sada kalak menokor hamba daberru lako mahan sinibages anakna, kennah tosè bagè berruna ngo ibaing taba hamba daberru idi. 10Mula merunjuk nola anak idi tong ngo ia kennah memerrèken pangaen dekket pakèen bak karina bakunè kin hakna bagè kecemmalen bai sinibagesna siperlebbè i. 11Mula oda ibakin bagi, kennah iselangsaèken ngo sinibagesna idi, oda pella lot riar mahan penebusna.”
Hatoren tersèngèt perbuaten siso puna-puna
12 #
3 Ms. 24:17
“Barang isè kalak memunuh jelma sidèban sanga matè, kennah ngo patènken. 13#4 Ms. 35:10-34; 5 Ms. 19:1-13; Jos. 20:1-9 Tapi mula itendelli kalak oda isengaja, janah oda lot ukurna lako memunuh, ndorok mo ia mperrus mi sada bekkas siKutuduhken bamu, janah isidi mo ia terondingen. 14Tapi mula lot sada kalak mènter bura- ngasen, janah sengaja memunuh kalak, nai mèter mperrus ia mi langgatenKu lako meronding-onding, kennah ialeng ngo ia i sidi nai janah ihukum matè.
15Barang isè memalu bapana barang inangna, kennah ihukum matè.
16 #
5 Ms. 24:7
Barang isè menculik jelma, kennah ngo ihukum matè, barang pè tah enggo sanga idèa kalakna barang tah i bagesna dèng pè.
17 #
3 Ms. 20:9; Mat. 15:4; Mrk. 7:10 Barang isè menumpahi bapana barang inangna, kennah ihukum matè.
18Mula tupung lot perubaten, lot sada kalak memalu sidèban merkitè batu barang dekket tènju-tènjuna, tapi oda memunuhsa, oda pella hukumen ia. Mula sanga pella gampar kalak sinipaluna idi kumernaken ipalu i, 19tapi ndorok nola ia kèkè janah merdalan mertongket, kennah ikebbaru simemalu i ngo ia soh njuah, janah menggarar karina kerogien sidekkah ia cioen.
20Barang isè kalak simengelutak hambana daholi barang daberru gabè mènter matè hambana idi, kennah ngo ihukum. 21Tapi mula oda ngo matè hamba idi ibagasen sada barang dua ari, oda pella hukumen tuanna idi. Kerogin sisempa bana kumerna kembalangen hamba idi mo sikira hukumen bana.
22Mula lot barang piga-piga kalak anak laki sidang merubat, janah sada kalak bai kalak idi nai, memaing rèpak sada kalak daberru siberrat-berat rumah gabè keguguren, tapi oda pella kadèen sendihina sidèbankenna i, kennah gararenna mo denda nasa belgah sinidokken sinibalè daberru i janah ituhu-tuhui perhukum. 23Tapi mula mparah kalohon ngo rèpak daberru idi, jadi hukum mi kejahaten idi, imo kessah gancih kessah, 24#3 Ms. 24:19-20; 5 Ms. 19:21; Mat. 5:38 mata gancih mata, èpen gancih èpen, tangan gancih tangan, nènèh gancih nènèh, 25ugah gancih ugah, ugah messeng gancih ugah messeng, mbessar gancih mbessar.
26Barang isè mengelipat mata hambana sanga pètung, kennah iselangsaèken ngo hamba idi sikira tebbus matana idi. 27Mula lot sada kalak memalu hambana sanga ncuak èpenna, kennah iselangsaèken mo hamba idi sikira tebbus èpenna idi.”
Tanggung jabab sidasa milik
28“Mula lot sada lembu menambih sada kalak jelma sanga matè, kennah bunuhen ngo lembu idi merkitè ibentiri dekket batu, janah jukutna oda ndorok panganen, tapi oda pella ihukum sidasa idi. 29Mula dak menendengi sambing ngo kecemmalen lembu tonggal idi, janah enggo pennah isèngètken taba sidasa, tapi oda ijaga pinakanna idi, nai mula itendeng lembu tonggal idi sada kalak jelma sanga matè, kennah ibunuh mo pinakan idi merkitè ikebbekki dekket batu, janah sidasa idi pè kennah ihukum matè. 30Tapi mula ipaduè ngo sidasa lembu idi menggarar ali, kennah igarar mo barang sadikè buèna ipido menggarar ali kessahna. 31Mula anak laki barang daberru pè sinibunuhna idi, tong ngo hatoren sibagidi merdalan. 32Mula hamba anak laki barang daberru ngo siterbunuh idi, kennah gararen sidasa lembu i mo tellupuluh riar pirak bai sidasa hamba i, janah lembu idi pè kennah ikebbekki dekket batu soh matè.
33Barang isè memuat tutup sumur ibas sada sumur nai, barang mengkurak sumur tapi oda itutupi, nai ndabuh mo mi bagasen sada lembu tonggal barang kalodè, 34kennah gararen sidasa sumur idi ngo kerogien bai sidasa pinakan idi, tapi ndorok ngo buatenna pinakan sienggo matè idi bana. 35Mula lot lembu tonggal sada kalak mematèken lembu tonggal milik sidèban, duana sidasa lembu idi kennah rebbak merdèa pinakan singgelluhna i dèng, janah memella kèpèng tokorna. Jukut pinakan simatè idi pè kennah ipella kalak i ma ngo. 36Tapi mella enggo terbettoh dak menendengi sambing ngo kecemmalen lembu tonggal idi, janah oda ijaga sidasa, kennah igancihi ngo dekket lembu tonggal nggelluh, janah ndorok mo ia memuat pinakan sienggo matè idi lako bana.”
Currently Selected:
2 Musa 21: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
