5 Musa 8
8
Tanoh merandal mahan ianen
1“Karina hukum sikuberèken bai ndènè ari sidari èn kennah ulaenken ndènè ngo i mertuhu-tuhu, asa tong nggelluh kènè, makin tambah bilangen, janah mengiani tanoh siniperbagah Jahowa bai empung ndènè. 2Engèt mo! Empatpuluh tahun dekkahna iuluken Jahowa Dèbata ndènè kènè i perdalanen ndaoh mengelausi gurun pasir. Lako mengunjuni kènè ngo Jahowa merkitè perdalanen i, asa idah Ia barang kadè sinibagasen ukur ndènè dekket tah iuèi kènè ma ngo karina perèntahNa. 3#Mat. 4:4; Luk. 4:4 Ibelli ngo kènè rapar, nai iberrè mo manna mahan panganen ndènè. Ukum si madèngkenna i oda kin ngo nung dèng ipangan kènè bak empung ndènè sibagidi. Ibakin Jahowa bagidi lako mengajari kènè ngo magahken oda nggelluh jelma i ukum kumarna pangaen sambing, tapi kumerna karina sinikataken Jahowa nai ngo. 4Sidekkah empatpuluh tahun èn oda ngo uè mumuk oles ndènè, janah nènèh ndènè pè oda nggèut meletcih. 5Engèt mo bagè partua simengajari dukakna ngo Jahowa Dèbata ndènè mengajari kènè. 6Asa, ulaken kènè mo karina sinidokken Jahowa Dèbata ndènè. Baing mo nggelluh ndènè i mengèkutken pati-patiinNa, janah pesangap kènè mo Ia. 7Ibabai Jahowa Dèbata ndènè ngo kènè mi nagerri nggabur; nagerri mbuè batang laè dekket laè mata-mata, bagi ma dekket laè menjarir i terruh tanoh marir mi napa-napa bak uruk-uruk. 8Mermatcam bagè ngo pagè hasil nagerri i, anggur, buah kayu ara, buah ndalima, kayu zaitun dekket tenggoli. 9Oda ngo kelèhèen barang kurangen kènè i sidi. Batu mamakna sin bessi, janah ibas delleng-dellengna nai ndorok okalen ndènè tembaga. 10Tuk gegoh ndènè mo kipangani, janah mendokken lias atè bai Jahowa Dèbata ndènè kumernaken tanoh nggabur siniberèkenNa bai ndènè.”
Sèngèt-sèngèt asa ulang mengelupaken Jahowa
11 #
Hos. 13:5-6
“Jaga mo mendè asa ulang sanga ilupaken kènè Jahowa Dèbata ndènè; ulang lèmbèken kènè agia sada pè ipas patinNa sienggo kuberèken bai ndènè i ari sidari èn. 12Mula enggo puas iakap kènè mangan janah enggo majek bages simerandal mahan bekkas ndènè, 13janah mula enggo mertambah-tambah lembu dekket kambing bak biri-biri ndènè, pirak dekket emmas ndènè bang harta milik ndè sidèban, 14jaga kènè mo mendè asa ulang gabè tunggang kènè janah mengelupaken Jahowa Dèbata ndènè, sipaluahken kènè i Mesir nai, bekkas ndènè i perhamba. 15Iuluken Jahowa ngo kènè arap gurun pasir mbellang nai janah ntengngam, merpengian nipè merbisa dekket bik. I tanoh ngkerrah siso merlaè iberèken ngo laè menjarir ibas batu nai, asa ndorok puas iakap kènè mènum. 16Iberèken ngo manna mahan panganen ndènè i gurun pasir, panganen siso itandai empung ndènè. Ibaing Jahowa bagidi lako mengoji kènè dekket lako pecerepken ukur ndènè, asa ujungna ndorok ibaing mendè taba kènè. 17Asa, ulang mo dok atè ndènè merkitè usaha dekket gegoh ndènè sendiri asa gabè kaya kènè. 18Èngèt mo Jahowa Dèbata ndènè ngo memerèken kinibèak idi taba kènè. Ibakin bagidi kumerna soh mi ari sidari èn dak tong ngo setia Ia meradepken padan sienggo ibahan dekket empung ndènè. 19Ulang lupa taba Jahowa Dèbata ndènè janah ulang merbalik nola kènè taba dèbata-dèbata sidèban lako mersembah janah merpenguèi taba kalak i. Ari sidari èn kupesèngèt kènè mula iulaken kènè ngo bagi, pasti kennah iripasken Jahowa kene. 20Mula oda tunduk kènè bai Jahowa Dèbata ndènè, kènè pè iripasken ngo, bagè karina bangsa siniripaskenNa i hadeppen mata ndènè.”
Currently Selected:
5 Musa 8: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
