5 Musa 7
7
Bangsa sinipilih Dèbata
(2 Ms. 34:11-16)
1 #
Ul. 13:19
“Ibabai Jahowa Dèbata ndènè ngo kènè mi nagerri sinaing ianen ndènè, janah mèduk mo bangsa ipelaus i sidi nai. I lebbè mata ndènè ngo ipelaus pitu bangsa nterremmen janah mergegohen bai ndènè nai, imo kalak Het, Girgasi, Amori, Kanaan, Feris, Hewi dekket Jebusi. 2Mula enggo kessa ipesakat Jahowa Dèbata ndènè i bangsa-bangsa i mi terruh kuasa ndènè janah italuken kènè kalak i, bunuh kènè mo kalak i karina. Ulang masèh atè ndènè bai kalak i barang merpadan dekket kalak i. 3Oda ndorok kabin kènè dekket kalak i, janah ulang duè kènè dukak-dukak ndènè kabin dekket kalak i, 4asa ulang ipedaoh kalak i dukak-dukak ndènè bai Jahowa nai lako menembah dèbata-dèbata sidèban. Mula isembah kènè dèbata-dèbata sidèban, punguren mo Jahowa janah sintempu mo kènè iripasken. 5#5 Ms. 12:3 Kumerna i, rumpakken mo langgaten-langgaten bangsa i karina, reppuki mo pandak-pandak batu siniètong kalak idi keramat, runggangken kènè mo pertanda-pertanda Asyera, janah lekkup kènè mo gana-ganaen sembahen kalak i. 6#2 Ms. 19:5; 5 Ms. 4:20, 14:2, 26:18; Tit. 2:14; 1 Ptr. 2:9 Ulaken kènè mo karina idi kumerna milik Jahowa Dèbata ngo kènè. Ibas karina bangsa sinibabo tanoh èn, kènè ngo sinipilih Jahowa Dèbata ndènè lako gabè bangsaNa sitermurmur.
7Ikekelengi janah ipilih Jahowa pè kènè, oda ngo kumerna nterremmen kènè daripada bangsa-bangsa sidèban i nai; ukum situhuna kènè ngo bangsa sikèdèkna i babo tanoh èn. 8Tapi ipilih Jahowa ngo kènè kumerna ikekelengi ngo kènè janah lako pesautken padan sienggo ibahanken dekket empung ndènè. Kumerna i ngo asa enggo ipaluah kènè merkitè kuasaNa mbellen i janah ipaluahi kènè ibas perhambaen raja Mesir nai. 9#2 Ms. 20:5-6, 34:6-7; 4 Ms. 14:18; 5 Ms. 5:9-10 Engèt mo, pellin sada Jahowa Dèbata ndènè i ngo kessa Dèbata, janah Dèbata setia ngo Ia. Ipesaut Jahowa ngo padanNa janah hot ngo ngkelleng atèNa simenettap i soh meribu cundut bai kalak simengkekelengiSa dekket simenguèi pati-patiinNa. 10Tapi oda meralang-alang atèNa menghukum kalak i simerceggo atè tabaSa. 11Asa, uèi mo karina patiin sikuberèken bai ndènè i ari sidari èn.”
Pasu-pasu bai kalak simerpenguèi
(5 Ms. 28:1-14)
12 #
5 Ms. 11:13-17
“Mula iperatè-atèken kènè ngo pati-patiin idi, janah iulaken kènè mertuhu-tuhu, Jahowa Dèbata ndènè pè setia mo Ia meradepken perpadanen sienggo ibahanken dekket kènè. Dak ipacidah ngo masèh atèNa simenettap i bai ndènè bagè sienggo iperbagah bai empung ndènè. 13Ikekelengi janah ipasu-pasu mo kènè, gabè meppar mo kènè janah mertambah-tambah bilangen ndènè. Ipasu-pasu mo juma ndènè, gabè menghasilken pagè, anggur dekket minak zaitun. Ipasu-pasu mo kènè gabè mèduk kalohon mo lembu dekket kambing ndènè. Karina pasu-pasu idi jaloen ndènè mo i nagerri siniberèken Jahowa bai ndènè rembang mi padanNa bai empung ndènè. 14Ibas karina bangsa sinidunia èn, sada poda lot i menjalo pasu-pasu bagi mertinèncukna bagè kènè. Karina kènè, bang pinakan ndènè pè sada poda i nggempus. 15Ikelini Jahowa ngo kènè ibas karina sakit nai janah ipedaoh ibas karina bègu laus nai bagè siniidah ndènè i Mesir, tapi isempaken mo olpek idi taba musuh-musuh ndènè. 16Karina bangsa sinipesakat Jahowa mi bagasen kuasa ndènè kennah ripasken kènè, ulang kènè mermasèh atè taba kalak i. Ulang sembah dèbata kalak i, kumerna merembahken olpek ngo ulah-ulah sibagidi taba kènè.
17Tah bakunè dok atè ndènè buèen ngo bilangen bangsa-bangsa idi, gabè oda ndorok terpelaus kènè kalak i. 18Tapi ulang kènè mbiar midah kalak i; èngèt mo bakunè pemaing Jahowa Dèbata ndènè taba raja Mesir bak karina ginemgemna. 19Engèt kènè mo bakunè olpek mahantu sinisaksiken ndènè sendiri, kelengangen-kelengangen, dekket kegegohen mbellen sinibakinken Jahowa Dèbata ndènè lako paluahken kènè. Bagi ma ngo bakinen Jahowa Dèbata ndènè taba karina bangsa sinikebiaren ndènè. 20Baliksa pemasaen Jahowa Dèbata ndènè mo kegontaren i tengah-tengah kalak i, gabè binasa ngo jelma sindorok mperrus bak ciboni. 21Jadi ulang kènè buradan midah bangsa-bangsa idi. Jahowa Dèbata ndènè ngo menjamoti kènè. Dèbata meheji ngo Ia janah mahantu. 22Ipelaus ngo bangsa-bangsa i dèba-dèba i hadeppen ndènè nai. Ulang mènter sintempu ripasken kènè kalak i, asa ulang makin mi tambahna buè binatang penjerngem gabè kememago bai ndènè. 23Bagidi mo cara Jahowa Dèbata ndènè lako pesakatken musuh-musuh ndènè bai ndè. Ipesompar-baèrken mo kalak i soh tumpat karina. 24Isohken mo raja-raja kalak i bai ndènè. Ibunuh kènè mo kalak idi janah gabè ilupaken mo gerar kalak i. Sada kalak poda tahan mengalo kènè; tumpat mo kalak i karina ibakin kènè. 25Lekkup kènè mo gana-gana sembahen sinisembah kalak i. Ulang mbara mata ndènè mengidah pirak barang emmas silekket i gana-gana i janah ulang buat lako bai ndènè. Mula ilausi kènè perèntah idi matè mo kènè, kumerna ikecegoken Jahowa Dèbata ndènè ngo menembah gana-gana. 26Singkabuah pè ulang baing ibagesmu gana-gana, asa ulang sempa taba kènè nola sumpah aturen bana. Kennah ceggo atè ndènè midah sibagidi, janah merlèa i penengennen ndènè kumerna isumpahi Jahowa.”
Currently Selected:
5 Musa 7: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
