5 Musa 12
12
Sada ngo kessa bekkas mersembah
1“Enda mo pati-patiin sikennah uèen ndènè sidekkah nggelluh ndènè i nagerri siniberèken Jahowa, Dèbata empung ndènè bai ndènè. 2Enggo kessa mbengket kènè mi nagerri i kennah rumpakken kènè karina bekkas pemelèen i babo delleng-delleng ndates, i uruk-uruk dekket siniterruh kayu ntemtem, bekkas bangsa simerian i sidi menembah dèbata-dèbata kalak i. 3#5 Ms. 7:5 Rumpakken kènè mo langgaten-langgaten kalak i janah reppukken pandak-pandak batu siniètong kalak idi keramat. Tutung kènè mo tanda-tanda Asyera, janah reppuk kènè mo gana-ganaen sembahen kalak i, asa ulang nèngè isembah dèbata-dèbata sibagidi i bekkas idi.
4Tikan isembah kènè Jahowa Dèbata ndènè, ulang mo osih kènè bagè pemaing kalak i menembah Dèbata kalak i. 5Ibas karina ladang marga-marga Israel nai, ipilih Jahowa Dèbata ndènè ngo sada bekkas asa ndorok roh bangsanta mi lebbèNa janah menembahSa. 6Mi bekkas idi mo kennah embahen ndènè pèlèen-pèlèen situtungen bang pèlèen-pèlèen sidèbanna, pèlèen persipuluhen ndènè bak pèlèen sidèban, pèlèen penggarar sininiatkenmu kin, pèlèen sitergerrek ibas ukur dekket anak lembu dekket kambing bak biri-biri siperlebbè tubuh. 7I sidi ma mo i hadeppen Jahowa Dèbata ndènè, kènè rasken dekket karina simpangaen ndè kennah mangan janah merlolo atè kumerna merhasil sinibahan ndènè ipasu-pasu Jahowa Dèbata ndènè.
8Mula enggo dapet katikana i, ulang nè mo bakin kènè bagè ulah-ulah ndè sibagèndari i. Ai soh mi bagèndari mersembah ngo kènè bakunè lemmo atè ndènè, 9kumerna oda dèng mbengket kènè mi nagerri siniberrèken Jahowa Dèbata ndènè bai ndènè, bekkas ndènè merian ibagasen damè. 10Enggo kessa isuberrangi kènè Laè Jordan, iurupi Jahowa Dèbata ndènè mo kènè menaban dekket mengiani tanoh sinikèpar laè i. Ijamoti ngo kè ipas karina musuh nai, janah nggelluh ibagasen damè dekket kemènaken mo kènè. 11Enggo kessa i ipilih Jahowa Dèbata ndènè mo sada bekkas mahan bekkas ndènè kennah menembahSa. Kennah mi si mo kènè merembah karina sienggo kuperèntahken, imo pèlèen situtungen dekket pèlèen sidèbanna, pèlèen persipuluhen dekket pèlèen simerkedekoen sienggo ijanjiken kènè bai Jahowa. 12Merlolo atè mo i hadeppen Jahowa Dèbata ndènè, rebbakken dekket dukak-dukak ndènè, naposo-naposo ndènè bak kalak Lewi simerian i kuta ndènè, kumerna oda menjalo jambar tanoh kalak Lewi i nagerri ndènè. 13Oda ndorok kènè memèlèken pèlèen ndènè i sembarang bekkas sinipilih ndènè sendiri, 14tapi pellin i bekkas sinipilih Jahowa ngo kessa. Pellin i sidi sambing ngo kessa kènè memèlèken pèlèen situtungen dekket mengulaken sidèbanna sikuperèntahken taba kènè.
15Tapi lemmo ndènè ngo lako menèat pinakan ndènè dekket kipangan jukutna barang i dikè sambing kènè merian. Ndorok ngo kènè kipangan barang sadikè buèna iberèken Jahowa Dèbata ndènè bai ndè. Gennep jelma tah mpanting pè ia barang tah melamun, ndorok ngo kipangan jukut i, bagè kènè ndorok kipangan jukut rigarung barang balkih. 16#1 Ms. 9:4; 3 Ms. 7:26-27, 17:10-14, 19:26; 5 Ms. 15:23 Pellin darohna ngo kessa oda ndorok ipangan, tapi kennah iorèken mi tanoh bagè laè. 17I bekkas ndènè merian i oda ndorok kènè kipangan pèlèen persipuluhen ibas pagè ndènè nai, anggur ndènè, minak Zaitun ndènè, lembu barang pè kambing bak biri-biri ndè siperlebbè tubuh, pèlèen penggarar niat ndènè, pèlèen gerrek atè barang pèlèen sidèbanna. 18Kènè dekket dukak-dukak ndènè, rebbak dekket naposo-naposo ndènè dekket kalak Lewi simerian i kuta ndènè, kennah i hadeppen Jahowa Dèbata ndènè ngo kipangan pèlèen idi, imo bekkas sinipilih Jahowa Dèbata ndènè. Janah i bekkas idi mo kènè kennah merlolo atè kumerna karina usaha ndènè. 19Datèken kènè mo asa ulang sanga ibelli kènè rapar kalak Lewi sidekkah nggelluh kènè i nagerri i.
20Enggo kessa ipebellang Jahowa Dèbata ndènè perbalengen nagerri ndènè bagè sinijanjikenNa, ndorok mo kènè kipangan jukut tuk gegoh bak roh gèut ndènè. 21Mula ndaohsu ngo bekkas sinipilih Jahowa Dèbata ndènè i bekkas ndènè nai, ndorok ngo sembellih kènè sada lembu, biri-biri barang kambing siniberèken Jahowa bai ndènè, janah kipangan jukutna i bekkas ndènè bakunè ipergeddo ukur ndènè, bagè sienggo kudokken bai ndènè. 22Karina jelma, tah mpanting ia barang melamun, ndorok ngo kipangan jukut i, bagè kènè ndorok kipangan jukut balkih barang jukut rigarung. 23#3 Ms. 17:10-14 Tapi jukut simerdaroh dèng oda ndorok ipangan, kumerna ibagasen daroh i ngo kessah, janah oda ndorok kènè kipangan kessah rebbak dekket jukutna. 24Ukum darohna oda ndorok panganen, tapi kennah iorèken ngo mi tanoh bagè laè. 25Mula iuèi kènè ngo perèntah idi lolo ngo Jahowa, jadi sayur ntua mo kènè bak pinempar ndènè. 26Karina pèlèen sienggo nijandiken ndènè bai Jahowa, kennah taruhken kènè mi bekkas sinitentuken Jahowa. 27Pèlèen situtungen dekket pèlèen panganen jukutna kennah ipèlèken i babo langgaten idi. 28Peratè-atèken mo mendè karina sienggo kudokken bai ndènè, nai ulaken kènè mo si merandal dekket sinikelemoken Jahowa Dèbata ndènè, asa sayur ntua kènè bak pinempar ndènè soh sidekkah-dekkahna.”
Pincang-pincang tersèngèt menembah gana-gana
29“Iripasken Jahowa Dèbata ndènè mo karina bangsa simerian i nagerri idi, asa gabè ndorok itaban dekket iiani kènè. 30Enggo kessa iripasken bangsa-bangsa idi, mermanat mo kènè ulang gabè iosih kènè nola kalak i menembah dèbata-dèbata sidèban, kumerna perohken kememago ngo perulaen sibagidi. 31Ulang mo osih kènè bagè pemakin bangsa- bangsa i menembah dèbata-dèbatana lako menembah Jahowa Dèbata ndènè, kumerna mersembah ngo kalak i merkitè mengu- laken perulaen-perulaen luhlah sinikecegoken Jahowa. Soh mi dukak-dukak kalak i sendiri pè itutung kalak i ngo i babo langgaten mahan pèlèen bai dèbata-dèbata kalak i.
32 #
5 Ms. 4:2; Alm. 22:18-19 Ulaken kènè mo karina sikuperèntahken bai ndènè i; ulang tambahi barang kurangi.
Currently Selected:
5 Musa 12: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
