FILIPI 2

Ananun ḇaḇeoser ma ranrun mankun imnis Kristus

2:1-11

1Inja ro Kristus ananun naisya, sneprei ma saswar, ḇaḇeoser ro Rurya isya, saswarya ma snesoya isya, 2insa mkofrur mnis raryaḇ yedi isoine: iḇye mkona sne-kakara oser, mkona saswar oser, rur oser, kakara oser, 3mboi mkosewar ḇaḇefandun mankun mkoḇena ḇardi awer roḇa sanandik ḇeḇefromo awer. Inja iḇye kuker randun sne mkomam min mkoḇesi sikaki syadi ro mankun mko; 4ma mkono oser-oser syewar fandun mankundi ḇyena awer, ḇape fandun snonkaku ḇesesya kako. 5Iḇye ro kankenem kayam mkona, swaruser ma ḇaḇir raris kosma ro Yesus Kristus kako,

6I kada imnis kuker Allah,

ḇape kyara ḇaḇaḇeoser ḇyedi ḇemnis kuker Allah,

nari iḇriwarek naḇa.

7Mboi ryir nakam kwar

ma ḇyeimnis mankundi raris manfyan oso.

Imnis raris snonkaku,

ma ikenem imnis snonkaku.

8Ryun mankundi, ma ikenem kuker aunos faro Allah isof imar –

isoine spai ro aprop faimar.

9Eḇedari Allah ikanowi fa ikaki syadi,

ma ḇyuk faroi snonsnon ḇeba syadi

ro snonsnon besena kam.

10 # Yes. 45:23 Ma faro ḇaḇesyowi Yesus,

roi ḇeḇor kam ḇekenem ro boiyaswa,

ma ro supnane baḇna,

nari nbansuba faroi.

11Sikam nari skarem Yesus Kristus ikada Manseren,

ma rarirya Allah Kmaya isma syom.

Mkosewar faswef koreri

2:12-18

12Naek srar yaswar kaku mkoine, indo mkoḇeuser; inja mko fararur faswef ro sasewar koreri mkoḇena kuker makakak ma araryof, imnis raris rofyor aya isya rofandu mko, mboi isyadi baboine rofafisu aya isya rofandu mko ḇa kako, 13snar Allah iso ḇefararur ro mko iḇye marisen ma ro fararur kako imnis marisen ḇyedi.

14Mkofrur roi ḇeḇor kam kuker sasurem ma famfaḇri awer, 15#Ul. 32:5ma mkofrur sasar awer, imnis Allah romawa ḇesren ḇyesi rofandu snonkaku ḇeḇarḇor ma ḇesasar ma ḇeḇor sine, isof mkosna rofandusi imnis maksya ro supswan ine, 16ma mkoserepen ro wos ḇekenemya, insa ro ras Kristus ḇyedi yamsik aya, mboi yafaḇri waworek ḇa ma yaḇekandera fromo ḇa.

17Ḇape rik ayena neḇesbawer ḇefasarser kako snar kakyar mkoḇena, yamarisen naba ma yaryaḇ naba kaku kuker mko. 18Ma rarirya kako nari mkoryaḇ kaku ma mkoryaḇ kuker aya.

Timotius ma Epafroditus

2:19–3:1a

19Ḇape ro Manseren Yesus yakyar nari yawan Timotius faro mko, insa yasma sneprei kako rofyor yamnaf rariso kankenem mkoḇena. 20Snar snonkaku oso isya ro dine ḇa, ḇena sne ma kakara oser kukeri ma ḇekara kaku ḇeri ḇaḇefandun mkoḇena; 21snar sikam ssewar ḇaḇefandun mankunsi sena, mboi ḇaḇefandun ro Yesus Kristus ḇa. 22Mboi mkofawi ḇaḇeuser ḇyena neḇemnasen kwar ma ifnoḇek aya kwar ro afuffarmyan ro Ankankinem Ḇeḇyeya imnis romawa oso ifnoḇek kmari. 23Iso nari yakyar yawan fasaw mufaḇemko, rofyor wawos ḇekur aya nane nasnai kwar maḇeaya. 24Ḇape yakyar faro Manseren, nari mankundaya kako yarakaki fasaw faro mko.

25Rofafisu ine yakara iḇye yawan Epafroditus faro mko, isoine naek ayedi ma min ḇefararur kayam, mkowan faḇeyuffarmyan aya ro ḇaḇefandun yena. 26Snar iswarkuf mko kam ma imkakwarek mko snar mkomnaf dafduf ḇyedi kwar. 27Kaku iduf rawo fanam imar, ḇape Allah iswari, ma derer monda ḇa, mboi aya kako, insa yaḇekandera mankenem awer. 28Eḇedari yawan fasaw i, insa rofyor mkomam i, mkoryaḇ wer ma sneri iknon. 29Inja mkosrow i kuker marisen ḇeba ma mkoḇesyowi snonkaku ḇerariryasya. 30Snar kuker fararur Kristus ḇyena indokada imar ma ḇyuk rur ḇyedi fa ifrur mnis rosai ḇemisḇa ro afuffarmyan mkoḇena maro aya.

Currently Selected:

FILIPI 2: LAIBHW

Highlight

Copy