2 KORINTUS 4

Nana ro boiyaswa ḇyeḇeser ro fyom saprop

4:1-15

1Fararur nkofrur ine ḇyeḇefrur kuker Allah famfnoḇek ḇyedi. Iso ḇeḇuk fararur ine maḇenko. Rarirya nkoḇe ḇirḇarḇa. 2Nkofararur kuker nyan ḇepampan ma ḇefrur fanorḇa. Nkomewer nkofararur kuker ankarkar roḇa nkowararye Allah wos ḇyenandi. Kuker sananai nkoḇaryas Allah marisen ḇyena. Inja nkoḇuk faro snonkaku kam faskara nko ro sisnesna ro Allah ḇarpon ḇyedi. 3Rofyor Ankankinem Ḇeḇye nkoḇaryas ani ono sifawi ḇaim ido, sikada snonkaku nari ḇeramura ḇeraroya. 4Ilah (Manserensya) ḇeḇarḇor ḇeyuf supswan ine srup kakara snonkaku ḇekyarḇasya. Si ḇedwareksi insa smam awer sananai ro Ankankinem Ḇeḇyeya ḇekur Kristus baba ḇyedi, ḇemnis Allah fanir ḇyedi. 5Wos nkobaryas ine wos ro mankun nkoḇa. Wos ani ikada wos ḇekur Yesus Kristus; mboi i Manseren; ma nkoine manfamyan ro naek srar mko snar Yesus Kristus. 6#Kej. 1:3Allah ikofen, “Iḇyekada ro pampanya dori sananaya dek,” Allah ani kako ḇeḇuk sananaya fadek ro kosnesna, insa kakara koḇena nasnai insa kofawi Allah sanapnaper ḇyedi ḇesnai ro Kristus ḇarpon ḇyedi.

7Ḇape nana ḇepyum ro rur ani nkuni kuker baken sifrur ro saprop ḇeḇemaejaḇa ine. Rarirya isnaibos mboi baba papoik ani isya ro Allah mboi isya ro nkoḇa. 8Sawos nkora ḇandiḇar, ḇape nkodadorḇa. Nko kmom, ḇape nkoḇeḇirḇarḇa. 9Sibor sembroḇ nko, ḇape nkemir nkokain ḇa. Ma fafisu ono siprer nko rao nkosapi, ḇape nkomarḇa. 10Ro moḇ rosai wer nkoisya nkoḇaḇir ḇesya kwar marmar Yesus ḇyedi ro baken nkoḇena, insa kankenem ḇyedi isnaibos ro ḇaken nkoḇena. 11Rofyor nkokenem ine, marmarya iḇemyun nko snar Yesus, insa Yesus kankenem ḇyedi kako isnaibos wer ro baken nkoḇena nari ḇemar ine. 12Ine fyasna ro baken nkoḇena marmarya isya ifararur sambraḇ ro nyan ḇyena, ro naek srar baken bedi kankenemya iso ḇefararur sambraḇya.

13 # Mzm. 116:10 Ro Refo kosma wos ine, “Yakyar eḇedari yawawos.” Inja, kuker kakyar ḇerarirya kako, nkawawos snar nkokyar. 14Nkokyar mboi Allah ḇeḇawes kaḇer Manseren Yesus kwar, nari ḇyawes kaḇer kokako kuker Yesus, ma dun naek srar mko ma nko ḇeḇarpon ḇyedi. 15Roi ḇeḇor nane kam nefandun faro naek srar mko. Snar snonkaku sibor sifawi Allah saswar ḇyedi, nadi kasumasa nabor syadi wer ssḇuk mufaḇe Allah; rarirya Allah isma sanandik.

Kankenem kuker kakyar

4:16–5:10

16Iso eḇedari nkoḇeḇirḇarḇa. Nyan ro ḇar baken koḇena namkok syadi rariso wer, ḇape nyan ro ḇar rur koḇena neḇefrur babo ro ras ḇeras. 17Ma kandera ḇemanan, nkofawi ḇekain fyoroḇa, nari ḇyuk maḇenko marisen ḇesyadadi ma ḇekain fyoro. Marasrisen ani ibasyadi wer kaku rofyor koḇuki kyara kandera ani. 18Snar nkomam epen roi komam naneḇa, mboi roi komamba na. Roi komam na nkain fyoroḇa, ḇape roi komamba na nkain faswef isof fyoro-fyoro.

Currently Selected:

2 KORINTUS 4: LAIBHW

Highlight

Copy