FILIPI 1
1
1Cina ra angi ela Ruma Hatalla sara'ana ma ngge'e d̄i Filipi, ro ma wa'ura sab̄ua lab̄o Ruma Isa Al Masih. Cina ra angi rau mana'ekaina ro mabantu ela Ruma!
Nahu, Paulus, sama-sama lab̄o la Timotius, ada-ada Ruma Isa Al Masih, 2mapamao raho-raho to'impa Ruma Hatalla Ama ndaita ro Ruma Isa Al Masih mbeina bareka ro taho ra ntai d̄i nggomid̄oho.
Do'a la Paulus d̄iru'u ela Ruma
3Sanikina nahu kawaraku nggomid̄oho, nahu rentaku tarima kasi d̄i Ruma Hatalla. 4Ro sanikina nahu do'a weaku nggomid̄oho sara'ana, nahu do'a kai sana adeku. 5Nahu rentaku tarima kasi d̄i Ruma Hatalla, b̄ara ratampu'u ainaina sarambakaina sampe ake, nggomid̄oho wa'ura bantumu nahu kai ngoa ra kahabamu Haba Mataho ma ramai ta Ruma Hatalla. 6Ndai Ruma Hatalla ma tampu'una karawi ma taho ede d̄i nggomid̄oho, ro nahu ka'imbi poda Sia d̄imatuwuna karawi ede sampe nggorina wakatu Ainaina mai mbalina Ruma Isa Al Masih. 7Poda ncihi ncao nahu wara iuku b̄une ede d̄i nggomid̄oho, b̄ara sara'a nggomid̄oho d̄eni ncau d̄i ade nahu. B̄ara nggomid̄oho b̄atu tarima ao sama-sama lab̄o nahu, bareka rambei b̄a Ruma Hatalla d̄i nahu; nataho ake wunga nahu ade uma bui nataho rau wakatu nahu waraku ari lua d̄imabela ro ma nenti kacia Haba Mataho ede. 8Ruma Hatalla nab̄adeku b̄a one nahu poda-poda lingi adeku d̄i nggomid̄oho kai iu meci angi poda rad̄i ndai Ruma Isa Al Masih.
9Akeku do'a nahu d̄iru'u b̄a nggomid̄oho: raho-raho to'impa nggomid̄oho naha meci ra ca'umu Ruma Hatalla ro sasama ndaimu ro nanaha mboto loa ra tingimu ma ncihi ro loamu timba ra lemba. 10Ade ndedekaina nggomid̄oho ma loaku b̄ade kad̄ale au ramataho poda, ro morimu d̄imaraso rad̄i ma'iha atao b̄ab̄u ra lo'o kai au-au rau wakatu ainaina Al Masih mai mbalina. 11Morimu d̄imaremba kai ruku ra rawi ma taho poda ma cuma loa d̄i mbei b̄a ndai Ruma Isa Al Masih mpoampa; ndad̄i Ruma Hatalla d̄ikad̄ese ra kantasa ro d̄iroi ra wadi.
Mori d̄iru'u Al Masih
12Ne'e b̄a nahu nggomid̄oho b̄ademu, b̄a one lampa rawi-lampa rawi ma wa'ura ndad̄i d̄i nahu, ede taho makandad̄ina ncewi mboto dou maringa ro ma imbi d̄i Haba Mataho ede. 13#Kis. 28:30 Ndad̄ina sara'a dou ma jaga asi ro dou-dou ma kalai d̄i kota ake nab̄adeku buikai nahu b̄ara karawi wea b̄a nahu d̄i ru'u Al Masih. 14Ro bui kai nahu wa'ura kandad̄ina mboto dou-dou ela Al Masih d̄i kota ake ndad̄i ncewi imbi wali d̄i Ruma, ndad̄ina siad̄oho nanaha disa ngoa ra kahaba rangoa wi'i b̄a Ruma Hatalla kai wati dahu-dahuna.
15Wara romo pila-pila dou d̄i ade weki siad̄oho mangoa ra kahaba mab̄oha Al Masih b̄ara hiana adena ro nane'eku cence ncihi, pala ma kalaina ma ngoa ra kahaba mab̄oha Al Masih b̄ara wara ne'ena ma raso. 16Dou-dou ake karawina b̄ara siad̄oho meci ra ca'una Ruma Hatalla ro nahu, b̄ara siad̄oho nab̄adeku b̄a one Ruma Hatalla makauna nahu d̄imaturu teina b̄a one Haba Mataho ede napodaku. 17Pala dou makalai ngoa ra kahabana mab̄oha Al Masih kai makasu ma wati taho; siad̄oho ngoa ra kahabana d̄i pentikai ndaina. Kai ede ne'e b̄a siad̄oho loakud̄u nahu ipi ncokiku ade uma bui.
18Pala wati b̄unena! B̄ara kone b̄uneb̄e wali rau nataho ede rakarawi kai ne'e ma raso ro kai ne'e ma ncara, ngge'empa Al Masih d̄ingoa ra kahaba rau; ndad̄i nahu neo adeku. Ro nahu ngge'empa iu ndedeku, 19b̄ara nahu b̄adeku kai do'amu ro kai bantu b̄a Roh Isa Al Masih, nahu d̄i hori kalosa. 20D̄ine'e poda b̄a nahu ro rahoku eded̄u loakud̄u ai to'ina nahu dantau hasi d̄ei taki ra putakai nahu. Pala ne'e b̄a nahu loakud̄u sanikina wakatu, mapenti poda ake, loa katada disaku, ndad̄ina kai samenana sarumbu ra nawa nahu – nataho nahu moriku atao madeku – Al Masih d̄ikad̄ese ra kantasa. 21B̄ara ru'u b̄a nahu, d̄ine'e b̄a moriku d̄iru'u Al Masih mpa! Ro made ede aona laba. 22Pala nggara kai mori d̄i dunia ake, nahu loa karawi d̄ikarawi ma ncewi ntau one, ndad̄i nahu wati b̄adeku ma b̄eku d̄i pab̄ua kad̄ale b̄a nahu. 23Nahu rahinti rad̄i d̄ua b̄ae. Nahu wancuku ne'e podaku tu'u wi'i dunia ake d̄i lao ngge'e lab̄o Al Masih, b̄ara edeku ma wancu taho; 24pala, d̄i ru'u pentikai nggomid̄oho, eded̄u nancewi tahopu nggara nahu ngge'empa midiku d̄i dunia. 25Nahu imbi poda d̄i lampa rawi ede. B̄ara ndedena nahu kab̄ade nahu d̄imangge'empa midi lab̄o nggomid̄oho sara'ana, loakud̄u bantu nggomid̄oho d̄imandad̄i naha tenggo ro naha sana d̄ei imbi d̄i Ruma. 26B̄ara ndedena, nggara mbalisi nahu peade d̄i nggomid̄oho, nggomid̄oho ma wa'ura sab̄ua lab̄o Ruma Isa Al Masih d̄imantau ncewi mboto wali alasana d̄i iukaimu bangga d̄i weki nahu.
27Ma penti ake eded̄u b̄a one nggomid̄oho mori ncihi ncao lab̄o au rakane'e poda b̄a Haba Mataho mab̄oha Al Masih ede. Ade ndedekaina, kombisi nahu loa eda angi lab̄o nggomid̄oho atao wati, nahu d̄imaringa b̄a one nggomid̄oho tenggo kasab̄ua weki ro usaha kapoda ade sama-sama d̄i ru'u sab̄uampa nia ro sab̄uampa d̄i ne'e; eded̄u d̄i imbi mapoda ma ncihi ncao lab̄o Haba Mataho rad̄i Ruma Hatalla ede. 28Pab̄uapu nggomid̄oho disa ncau; aina dahu d̄i dou-dou ma'aomu. Ade ndedekaina nggomid̄oho mateiku b̄a one siad̄oho pasti d̄imakoa, ro nggomid̄oho d̄imangolu, b̄ara ndai Ruma Hatalla mambeina ngolu d̄i nggomid̄oho. 29B̄ara Ruma Hatalla nawa'ura mbei bareka d̄i nggomid̄oho laina d̄i imbi mpoakai d̄i Al Masih, pala d̄imasusa ra ncoki rau d̄i ru'u Al Masih. 30#Kis. 16:19-40 Ake nggomid̄oho rau b̄atumu nahu d̄ei karawi ma sama; eded̄u rawa'u parana eda b̄a nggomid̄oho ntoina nahu makarawi kapoda ade, ro sampe ake nahu mbuipu kapodaku ade, b̄une rawa'u ringa b̄a nggomid̄oho ake.
Currently Selected:
FILIPI 1: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
