FILEMON 1
1
1Cinaku Filemon, soba ro masama-sama karawi lab̄o nami! Nahu, Paulus, dou rabui b̄ara Ruma Isa Al Masih, masama-sama lab̄o cina ndaita la Timotius, matunti sura ake d̄iru'u b̄a nggomi 2#Kol. 4:17 ro d̄iru'u b̄a ela Ruma ma kab̄oro weki d̄i umamu; d̄i ru'u rau b̄a amancawa ndaita, la Apfia ro lenga sama-sama karawi lab̄o ndaita, la Arkhipus.
3Do'a b̄a nami raho-raho to'impa Ruma Hatalla Ama ndaita ro Ruma Isa Al Masih mbeina bareka ro taho ra ntai d̄iru'u b̄a nggomi.
Meci ra ca'u ro imbi la Filemon
4Sanikina do'a nahu, nahu peheku ngara nggomi ro rentaku tarima kasi d̄i Ruma Hatalla. 5B̄ara ringa b̄a nahu b̄a one nggomi poda-poda imbimu d̄i Ruma Isa ro meci ra ca'umu d̄i sara'ana ela Ruma Hatalla. 6Nahu mado'ana raho-raho to'impa hubunga cina ra angi ndai kai sa'e ra ari kai dou-dou ma'imbi d̄i mawara hasi ma ncewi na'e d̄i samenana bareka ma wara d̄i ndai b̄ara sab̄uata lab̄o Al Masih. 7Cina Filemon, meci ra ca'umu d̄i sara'ana ela Ruma Hatalla, kaneomu ade nahu ro kaumu kapoda ade nahu! Sara'ana ela Ruma Hatalla wa'ura neo adena b̄ara nggomi.
Raraho d̄iru'u b̄a la Onesimus
8B̄ara ndedena, kai sab̄ua dou cina ma sama-sama imbi, nahu kaloaku kau nggomi d̄i makarawi au d̄i pab̄ua karawi b̄a nggomi. 9Pala b̄ara nahu mameci ra ca'u nggomi, nahu cuma rahoku. Nahu ake dou matua ro ake wunga taha b̄a dou ade uma bui b̄ara Ruma Isa Al Masih. 10#Kol. 4:9 Nahu, Paulus, maraho sab̄uampa d̄i nggomi mab̄oha la Onesimus, ana nahu ade Al Masih. B̄ara ade uma bui ake nahu wa'ura ndad̄i ama sia maraso. 11Ntoina sia wati wara onena d̄iru'u b̄a nggomi, pala ake sia wara onena, laina d̄iru'u b̄a nggomi mpoa, pala d̄iru'u b̄a nahu rau.
12Ake dou ma mecira ca'u b̄a nahu ede nahu manggadu mbalina d̄i nggomi. 13Sapodakaina nahu kane'e taha sia d̄i malab̄ona nahu kai macepe nggomi, loakud̄u sia bantuna nahu, santoi nahu waraku d̄i ade uma bui ake b̄ara rakahabaku Haba Mataho ma ramai ta Ruma Hatalla. 14Pala nahu wati ne'eku karawi au-au nggara watipusi kaukai b̄a nggomi. Nahu kancewi ca'upu nggomi karawimu kai rela ade ndaimu; nahu wati ne'eku pakasa nggomi.
15Kombisi la Onesimus ngalakaina lab̄o nggomi d̄iru'u samporompa loakud̄u nggomi raka mbalimu sia d̄iru'u santoi-ntoina. 16Ake sia laina sab̄ua dou ada d̄iru'u b̄a nggomi mpoa; sia ncewi ari mai b̄a ede. Sia eded̄u sama-sama dou ela Al Masih ma rameci b̄a nahu. Sia wara one podana d̄iru'u b̄a nahu, au walipu d̄iru'u b̄a nggomi! Tantu sia wara one podana nataho kai ada ro kai sab̄ua cina d̄i ade Ruma!
17B̄ara ndedena, nggomi mawi'ikai nahu lengamu masama-sama ela Al Masih, tarima mbalipu la Onesimus sama b̄une nggomi tarimamu nahu. 18Nggara nawarasi ncara sia atao nconggona d̄i nggomi, co'opu sara'ana ede nahu d̄imatangguna. 19Taho ndai nahu d̄imatuntina ta ake: Nahu, Paulus, d̄i macola kanggori sara'ana. (Tantu wati paraluna nahu ngoa ra kawaraku b̄a one ndai nggomi mantau nconggo d̄i nahu, eded̄u mori ra wokomu ma b̄ou kai ela Al Masih.) 20B̄ara ndedena, kai ngara Ruma coba bantu to'ipu nahu, kaneopu ade nahu kai cinamu ade Al Masih.
21Nahu tuntiku sura ake b̄ara imbi podaku b̄a one nggomi d̄imakarawina au raraho b̄a nahu. Nahu mala b̄adeku nggomi d̄imakarawina ese mai b̄a ede. 22D̄iwakatu ede, sadia wea to'ipu b̄ili ru'u nahu d̄i umamu, b̄ara pamao b̄a nahu Ruma Hatalla ringana do'a nggomid̄oho sara'ana ro mawa'a mbalina nahu d̄i nggomid̄oho.
Salam cumpukaina
23 #
Kol. 1:7, 4:12 Epafras, ma wara sama-sama lab̄o nahu d̄i ade uma bui b̄a one Ruma Isa Al Masih, nggaduna salam d̄iru'u b̄a nggomi. 24#Kis. 12:12, 25, 13:13, 15:37-39, 19:29, 27:2, Kol. 4:10, 4:14, 2Tim. 4:10, 11 Tarima raupu salam lengad̄ohoku masama-sama karawi lab̄o nahu: Markus, Aristarkhus, Demas ro la Lukas.
25Raho-raho to'impa Ruma Isa Al Masih mbeina bareka d̄iru'u b̄a nggomid̄oho.
Salam do'a nami, Paulus
Currently Selected:
FILEMON 1: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
