GALATIA 5
5
Nenti kaciapu rahorikai wekimu
1Ndaita ake wa'ura hori weki, b̄ara Al Masih wa'ura horina ndaita! B̄ara ndedena nenti kaciapu rahorikai wekimu, ro aina ngawa d̄i ka'ada wali.
2Kawarapu, nggara nggomid̄oho rahomu d̄i suna, ede aona Al Masih wati wara onena d̄i ru'u b̄a nggomid̄oho. Ma nggahi ake eded̄u ndai nahu, Paulus. 3Sakali wali ngoa ra kawara b̄a nahu d̄i dou ma raho d̄isuna, b̄ara sia pab̄uaku kalampana sara'a hukum Taurat! 4Nggara nggomid̄oho usahamu taho mbali lab̄o Ruma Hatalla kai hukum Taurat, ede aona hubungamu lab̄o Al Masih wa'ura kompo. Ade ndedekaina nggomid̄oho mori ari mai b̄a rahama Ruma Hatalla. 5Pala ru'u nami, raho b̄a nami b̄a one kai bantu b̄a Roh Allah ro kai dasa imbi nami d̄i Al Masih, Ruma Hatalla ma kaloana nami taho lab̄o Sia. 6B̄ara nggara ndaita wa'ura sab̄ua lab̄o Ruma Isa Al Masih, b̄atu atao wati b̄atu atora suna wati wara b̄unena. Ma penti eded̄u imbi d̄i Al Masih, ro ede natada d̄ei ade meci ra ca'u b̄a ndaita d̄i dou makalai.
7Ntoina nggomid̄oho ma'usaha kapoda ade kai taho! Ake b̄ab̄auku nggomid̄oho wati to'a walimu d̄i kane'e Ruma Hatalla? Cou mawa'ura siwi nggomid̄oho? 8Pasti ma karawi ede laina Ruma Hatalla ma wa'ura ou nggomid̄oho! 9#1Kor. 5:6 ”B̄uha ma sato'i d̄imakateka sara'a mub̄u rancambu,” nggahi dou. 10Konena ndede nahu mbuipu imbiku b̄a one nggomid̄oho wati d̄imab̄atu kananu makalai, b̄ara ndaita wa'ura sab̄ua lab̄o Al Masih. Ro nahu ka'imbi b̄a one cou-cou rau ma kakaco kananumu, d̄i hukum b̄a Ruma Hatalla.
11Mab̄oha nahu, cina ra angi, b̄ab̄auku nahu d̄i musu ncau nggara nahu mbuipu ngoa ra kahabaku b̄a one atora suna ede naparaluku? Nggara podasi ngoa ra kahaba kandede b̄a nahu, ndad̄i ngoa ra kahaba b̄a nahu mab̄oha salib Al Masih wati kamaina masa'ala. 12Ncewi tahopu dou-dou ma kakaco kananumu ede losa lalo rad̄i ela Ruma!
13Nggomid̄oho wa'ura ou d̄imandad̄i dou ma hori weki. Pala aina horikai wekimu ede d̄i karawi ncau-ncaukaimu au rane'e karawi b̄a nggomid̄oho. Pala ndakeku, nggomid̄oho pab̄uapu cua meci ra ca'u angi ro cua karawi wea. 14#Im. 19:18 Sara'a hukum Taurat wa'ura d̄iki d̄ei parenta ma sab̄ua ake, ”Pab̄uapu nggomid̄oho meci ra ca'umu d̄i sasamamu manusia b̄une nggomid̄oho meci ra ca'umu weki ndaimu.” 15Pala nggara nggomid̄oho cua musu angi, jaga, pea nggomid̄oho d̄imasama-sama leli.
D̄ine'e b̄a Roh Allah ro d̄i ne'e b̄a manusia
16Ne'e b̄a nahu ndake: Co'opu Roh Allah mad̄ende ra wa'a nggomid̄oho ndad̄ina nggomid̄oho wati mori b̄atu rakane'e tabe'a manusia. 17#Rm. 7:15-23 B̄ara ne'e manusia wati ncihi ncaona lab̄o ne'e Roh Allah, ro ne'e Roh Allah wati ncihi ncaona lab̄o ne'e manusia. D̄ua mbua ede cua sakontu angi, ndad̄ina nggomid̄oho wati loamu karawi au rakane'e b̄a nggomid̄oho. 18Pala nggara Roh Allah mana'ekai nggomid̄oho, ndad̄i nggomid̄oho wati kuasakai b̄a hukum Taurat.
19Ne'e tabe'a manusia tada d̄ei karawi-karawi ma sampu ra nggele, sampu, ro wati patuna; 20ade nembana berhala ro ilimu ma iha, ade musukai angi, ncao, wu'u, roci mbani, ro kapenti weki ndai, ncengga ra mbi'a ro kalompo-kalompo, 21ro hiana ade, kamawu weki, ndiha-ndiha ro makalai wali. D̄isamenana ede nahu mangoa ra kawara nggomid̄oho ake b̄une rangoa ra kawara b̄a nahu nggomid̄oho ntoi rauna, b̄ara dou-dou ma karawi lampa rawi b̄une ede wati d̄imandad̄i anggota ela Karaja'an Allah.
22Pala hasi Roh Allah eded̄u: meci ra ca'u, d̄ihi ade, taho ra ntai, saba, taho ade, kasi ade, patu ra to'a, 23mapu nggahi ra eli, ro taha ade. Wati wara hukum Taurat ma kanta lampa rawi-lampa rawi b̄une ede. 24Dou-dou ma wa'ura ndad̄i ntau Ruma Isa Al Masih, dou-dou ede wa'ura hadena tabe'a manusiana lab̄o samenana nawasu ro ne'ena. 25Roh Allah wa'ura mbeina d̄i ndaita mori ma b̄ou: B̄ara ndedena Sia rau pab̄uaku kuasakaina mori ndaita. 26Ndai wati loata ndad̄i sombo, ro cua kapili ade angi, ro hiana adena d̄i sab̄ua lab̄o sab̄ua dou.
Currently Selected:
GALATIA 5: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
