GALATIA 4
4
1-2Pala paralu nahu makapodana: salama dou makapasaka ntau ra wara mbuipu to'ina, wara dou ma jaga sia ro ma'uru au rad̄imapentina sampe sia raka umuna rakatantukai b̄a amana. Sia d̄i kaukai karawi sama b̄une sab̄ua dou ada, kone sapodakaina sia mantau d̄i samenana ntau ra wara ede. 3Ndede rau lab̄o ndaita: Salama ndai watipu na'e, ndai ka'ada b̄a roh-roh ma kuasakai dunia ake. 4Pala d̄i wakatu ma ncihi ncao, Ruma Hatalla nggaduna Ana-Na d̄i dunia. Ana-Na ede ranggana b̄a sab̄ua dou siwe ro mori d̄i ade kuasakai b̄a hukum Taurat. 5#Rm. 8:15-17 Ade ndedekaina Sia hori kalosana dou-dou ma mori d̄i ade kuasakai b̄a hukum Taurat; loakud̄u ndai rau loa ndad̄i ana-ana Ruma Hatalla.
6B̄ara nggomid̄oho eded̄u ana-ana Ruma Hatalla, Ruma Hatalla kauna Roh Ana-Na lu'u ta d̄ei ade nggomid̄oho ro ade nahu, eded̄u Roh ma renta, ”Ama, io Amaku.” 7Ndad̄i, nggomid̄oho lai walina ada, malaisi ana. Ro b̄ara nggomid̄oho Ana Ruma Hatalla, ndad̄i Ruma Hatalla d̄imambei d̄i nggomi samenana au-au rasadia-Na d̄i ru'u anad̄oho-Na.
Darura ade la Paulus d̄i dou-dou Galatia
8Ntoina nggomid̄oho wati patamu Ruma Hatalla, b̄a ndedena nggomid̄oho raka'ada b̄a kuasa-kuasa rawi'ikai ruma, pala sapodakaina laina Ruma Hatalla. 9Pala ake nggomid̄oho mapataku Ruma Hatalla, atao mancihi poda wali, Ruma Hatalla napataku nggomid̄oho. B̄ab̄auku nggomid̄oho ne'emu mbali wali d̄i roh-roh dunia ake, ma mapu ro mancoki mori? B̄ab̄auku nggomid̄oho ne'e kaimu ka'ada wali b̄a roh-roh ede? 10Nggomid̄oho makandihaku ainain-ainain rakatantukai, wura-wura rakatantukai, ro mba'a-mba'ana rakatantukai. 11Nahu dahu adeku, ai-aina maki rahompa nahu ru'u nggomid̄oho lao ncaumpa.
12Cina ra angi! Nahu maraho poda loakud̄u nggomid̄oho ndad̄i b̄une nahu. B̄ara nahu rau wa'ura ndad̄i b̄une nggomid̄oho. Nggomid̄oho wati wara karawimu ma ncara d̄i nahu. 13Nggomid̄oho tantu mbuipu kawaramu au marakandad̄ina nahu aipu sarambana ngoa ra kahaba Haba Mataho ede d̄i nggomid̄oho. Ndad̄ikaina eded̄u b̄ara nahu mab̄u supu. 14D̄i wakatu ede nggomid̄oho wati iumu ni'i d̄i nahu, konena ka'ada'ana sarumbu nahu eded̄u coba'a ma na'e d̄i ru'umu. Nggomid̄oho matarimaku nahu b̄une tarima aomu mala'eka Ruma Hatalla atao b̄une tarima aomu ndai Ruma Isa Al Masih. 15Nggomid̄oho neo poda ademu d̄i wakatu ede. Pala ake, tab̄era neo poda ademu ede? Nahu kab̄ade b̄ara wakatu ede nggomid̄oho marela cingga isi mada ndaimu d̄imbeikaimu d̄i nahu, nggara ede loasi d̄i karawi. 16Sab̄ua nggomid̄oho ake wa'ura wi'ikaimu nahu kai musumu, b̄ara nahu katadaku ma ncihi d̄i nggomid̄oho?
17Doud̄oho ma kalai ede kai kapoda ade ngupana nggomid̄oho, pala nia siad̄oho wati tahona. Siad̄oho cuma ne'ena kakompo ndapo angi nggomid̄oho lab̄o nami, loakud̄u nggomid̄oho b̄atumu siad̄oho kai kapoda ade. 18Nataho romo d̄i kapoda kai ade d̄ei lampa rawi ma taho, sura ndede ncauna ro aina cuma nggara wara nahu sama-sama lab̄o nggomid̄oho. 19Ana-ana rameciku! Nahu wakatu ake susa ra ncoki wali b̄ara nggomid̄oho. Nahu susa ra ncokiku b̄une ina masusa ra ncoki wunga wakatu ngganana ana. Nahu d̄imasusa ra ncoki ncau, nggara tabe'a Al Masih watipu nconggena d̄i wekimu! 20Nahu ne'e poda adeku wara d̄i woha nggomid̄oho ake, loakud̄u nahu rakaku nuntu d̄i nggomid̄oho kai eli ma kalai, b̄ara nahu watid̄u b̄ade ne'e karawi au wali lab̄o nggomid̄oho!
La Hajar ro La Sara d̄i contoh
21Cina ra angi ma ne'e mori d̄i ade kuasakai hukum hukum Taurat, kade'epu nggahi nahu! Nahu d̄imangoa d̄i nggomid̄oho auku ma sapodakaina ratunti ade Kitab Hukum Musa. 22#Kej. 16:15, 21:2 Ta ede ratunti b̄a one la Ibrahim ntau d̄ua ana: Ina b̄a anana ma sab̄ua eded̄u adana, ro ina b̄a anana ma sab̄ua wali eded̄u dou maradeka. 23Ana b̄a dou siwe ma ndad̄i adana ede rawarakaina biasa b̄ara kane'e manusia. Pala ana b̄a dou siwe ma maradeka, rawarakaina b̄ara rasake b̄a Ruma Hatalla. 24Ake loa d̄i kani kai conto ra ibara. Dou siwe d̄uana ede eded̄u ibarata d̄ua rasakekai: ma sab̄uana mamai rad̄i Doro Sinai – eded̄u la Hajar; anad̄ohona ranggana kai ada. 25Ndad̄i, Hajar eded̄u Doro Sinai, d̄i dana Arab. Sia ma ndad̄i tanda kota Yerusalem ro sara'a ela ra douna ma wakatu ake mawa'ura ndad̄i ada. 26Pala Yerusalem ma d̄i saroga ede eded̄u Yerusalem maradeka, ro siaku ina ndaita. 27#Yes. 54:1 B̄ara ade Alkitab ratunti,
”Kad̄ihira ademu oe dou siwe mbonggi, ma watipu parana nggana!
Kad̄ihi ro kaneora ademu oe nggomi ma watipu parana iu pili nggana!
B̄ara dou siwe rawi'i b̄a rahina d̄imaraka ncewi mboto ana
ntewi kaisi lab̄o dou siwe ma mori lab̄o rahina.”
28Cina ra angi! Ndai nggomid̄oho eded̄u ana-ana Ruma Hatalla ranggana b̄ara rasake Ruma Hatalla; nggomid̄oho sama b̄une Ishak. 29#Kej. 21:9 Aipu wakatu ede ana ranggana b̄atu kane'e manusia, kancoki hadena ana ranggana b̄ara rakane'e Roh Allah. Ndede rau ake. 30#Kej. 21:10 Pala auku ratunti ade Alkitab? Ta ede ratunti ndake: ”B̄aka kalosapu ada siwe ede lab̄o anana, b̄ara ana rad̄i ada siwe ede wati d̄imandad̄i dou makapasaka ntau ra wara sama-sama lab̄o ana rad̄i dou siwe maradeka ede.” 31Ndad̄i, cina ra angi, ndaita ake laina ana-ana rad̄i ada siwe; ndai eded̄u ana-ana rad̄i dou siwe mahori weki.
Currently Selected:
GALATIA 4: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
