1 TIMOTIUS 2
2
Do'a ra sambea ela Ruma
1Saramba-rambana, nahu maraho poda-poda loakud̄u au raraho, sambea, ro do'a safa'a ro renta tarima kasi d̄i karongga d̄i Ruma Hatalla ru'u sara'ana dou; 2ru'u sangaji-sangaji ro d̄i ru'u sara'a dou ma nenti kuasa. Rahopu loakud̄u ndai loa mori taho ro sana d̄i ru'u Ruma Hatalla kai ruku ra rawi ma patu. 3Edeku ma taho ro makasana wea ade Ruma Hatalla, Ma Kasalama ndaita. 4Ne'e b̄a Sia loakud̄u sara'a dou d̄i kasalama ro b̄adena ma ncihi. 5B̄ara, cuma wara sab̄uampa Ruma Hatalla, ro cuma sab̄uampa mambohakaina d̄i Ruma Hatalla lab̄o manusia, eded̄u Ruma Isa Al Masih. 6Sia sab̄ua manusia ma wa'ura d̄onggo weki-Na ru'u hori kalosakai sara'a dou rad̄i dosa-dosa siad̄oho. Kai ede Ruma Hatalla turu teina d̄i wakatu ma ncihi ncao, b̄a one ne'e b̄a Sia loakud̄u sara'a dou d̄i kasalama. 7#2Tim. 1:11 Ro b̄ara ndedena nahu kauna lao d̄i dou-dou malaina Yahudi d̄imangoa ra kahaba d̄i siad̄oho haba mab̄oha imbikai ma ncihi. Ranggahi b̄a nahu ake eded̄u ncihi, nahu wati cowaku.
8Ne'e b̄a nahu loakud̄u tab̄e-b̄e wali dou-dou mone do'ana kai ade ma raso, kai wati wara mbani atao cence ncihi.
9 #
1Ptr. 3:3
Pab̄uaku dou-dou siwe kantikana wekina kai kambohampa ro kanina kani ra lombo ma sopa. Aina ndawimu honggo ma lai-lai atao kondo, jima ro sinci masa atao mutiara, atao kani ra lombo ma nggali-nggali. 10Pala, dou siwe pab̄uaku kantikana wekina kai ruku ra rawi-ruku ra rawi ma taho b̄une ma patu d̄i ru'u b̄a dou siwe ma sambea ra do'a d̄i Ruma Hatalla. 11Dou siwe pab̄uaku tana'ona kai kamidi weki ro to'a. 12Nahu wati kancihiku dou siwe matei atao maparenta dou mone; siad̄oho pab̄uaku midina. 13#Kej. 2:7, 2:21-22 B̄ara ma saramba-ramba rakandad̄i eded̄u la Adam ro sawa'u b̄a ede ampo la Hawa. 14#Kej. 3:1-6 Ro laina la Adam, malaisi dou siweku rab̄oha b̄a tipu, ndad̄ina sapana parenta Ruma Hatalla. 15Konena ndede, dou siwe d̄imasalama kai ngganana ana, sura sia kai ka'awana weki nge'empa imbi d̄i Al Masih ro ngge'empa meci ra ca'una dou makalai ro mori d̄i ru'u b̄a Ruma Hatalla mpoampa.
Currently Selected:
1 TIMOTIUS 2: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
