1 TIMOTIUS 1
1
1-2 #
Kis. 16:1
Timotius, anaku ma sapodakaina d̄i ade Ruma! Sura ake rad̄i nahu, Paulus, rasu Ruma Isa Al Masih kai parenta Ruma Hatalla, Makasalama ndaita kai parenta Ruma Isa Al Masih, rapamao b̄a ndaita.
Raho-raho to'impa Ruma Hatalla Ama ndaita lab̄o Isa Al Masih Ruma ndaita mbeina bareka, rahama ro taho ra ntai d̄i nggomi.
Ngoa ra kawara mab̄oha ngoa ra tei ma santuda
3Ne'e b̄a nahu loakud̄u nggomi ngge'empa midimu d̄i Efesus b̄unera wa'u nggahi poda b̄a nahu d̄i nggomi aipu wakatu lao nahu aka Makedonia. B̄ara, d̄i Efesus wara pila-pila dou ma ngoa ra kahaba ngoa ra tei ma ncara, ro nggomi pab̄uapu kadenggamu siad̄oho. 4Nggahipu d̄i siad̄oho loakud̄u ai walina kede'emu mpama-mpama ro carita-carita londo ra mai ma wati dengga-denggana. Samenana ede d̄imakamaikai ngango ra ngorampa, ro wati kamajuna nia Ruma Hatalla ma cuma loa d̄i patakai ncai imbi d̄i Sia. 5Aona ngoa ra tei b̄a nahu ede eded̄u loakaina dou ntauna ade ma nira ro ade mpida ma raso, ro poda-poda imbi d̄i Ruma, ro ade ndedekaina siad̄oho loa meci ra ca'u sasama manusia. 6Wara sarunde dou ma wa'ura wati mori b̄une ede wali, ro santuda ade cence ncihi ma wati wara onenana. 7Siad̄oho nane'e ndad̄i guru-guru agama, sapodakaina ndai siad̄oho wati loana ka'ao nggahi ra eli rakani b̄a ndaid̄ohona atao lampa rawi-lampa rawi rarenta b̄a siad̄oho kai imbi poda.
8Ndaita b̄adeku b̄a one hukum agama eded̄u taho, nggara kalampa katahosi. 9Tantu pab̄uaku d̄i kawara b̄a one hukum randawi laina d̄i ru'u dou mataho, malaisi d̄i ru'u b̄a dou-dou masapa hukum, sanikina dou madab̄ae, d̄i ru'u b̄a dou makarawi dosa, dou mawati ntau agama, dou ma b̄atu tabe'a dunia, d̄i dou ma hade ama atao inana, dou-dou mahade dou, 10d̄i ru'u b̄a dou-dou masampu ra nggele, mane'e angi sama monena, mampanga dou, macowa; sakasi-sakasi cowa, ro cou-cou rau mandawi lampa rawi ma wati ncihi ncao lab̄o ngoa ra tei ma ncihi. 11Ngoa ra tei ede wara d̄i ade Haba Mataho ma ngoa ra kahabana wa'ura imbikai d̄i nahu, eded̄u Haba Mataho ma ramai ta Ruma Hatalla ma d̄ese ra ntasa ro mapatu d̄i roi ra wadi.
Iu syuku b̄ara rahama Ruma Hatalla
12Nahu marenta tarima kasi d̄i Isa Al Masih Ruma ndaita. Sia nawa'ura mbei tenggo ra wale d̄i nahu ru'u karawi weaku Sia, ro Sia nawi'ikaiku nahu loa ru'u taki ra puta ede, 13#Kis. 8:3, 9:4-5 kone ntoina nahu kafitinaku ro kancokiku ro katuna ra kab̄awaku Sia. Pala Ruma Hatalla kasi adena d̄i nahu, b̄ara aipu wakatu ede nahu watipu imbiku, ndad̄i nahu wati b̄adeku au d̄i karawi b̄a nahu. 14Ro nahu mbeina maremba kai rahama Ruma ndaita. Mbei b̄a Sia nahu tenggo ra wa'u d̄i imbikai d̄i Sia rameci ra ca'u d̄i sasama manusia. Tenggo rawa'u ede mbeina d̄i ndai sara'ana ma wa'ura sab̄ua lab̄o Ruma Isa Al Masih. 15Ncihi poda nggahi ra eli ake – b̄ara ndedena patu d̄i tarima ro d̄i imbi podakai –: ”Ruma Isa Al Masih maina d̄i dunia ake d̄imakasalama dou madosa.” Ro nahuku dou madosa ma ipi dab̄ae. 16Pala b̄ara justru ndedena Ruma Hatalla meci ra ca'ukaina nahu, loakud̄u Ruma Isa Al Masih katadana sara'a saba-Na d̄i nahu, dou ma ipi dosa ake. Ro ake ndad̄i sab̄ua conto d̄i ru'u sara'a dou mapea ede d̄ima'imbi d̄i Sia ro raka mori ma'ederahid̄i santoi-ntoina. 17Ruma Hatalla, Sangaji sara'a jamana, patu d̄i lia ra horoma ro d̄i roi ra wadi ncau-ncau, b̄a one Siaku ma'ederahid̄i, ma wati tada ro ma kese weki! Amin.
18Timotius, anaku! Taki ra puta ake imbikai b̄a nahu d̄i nggomi, kawaraku ranggahi Ruma Hatalla rakarongga b̄a nabi-nabi ade ela Ruma mab̄oha ndai nggomi. Pab̄uapu rangoa ede ndad̄i osu ru'umu ade usaha kapodakaimu ma taho. 19Usaha kapodapu ademu kai nentimu imbi ma poda ro kai ade mpida ma raso. Wara dou-dou ma wati kandad̄i au d̄i eli ade mpidana, ndad̄ina lelira imbi podakai siad̄oho. 20D̄i ade wekina eded̄u la Himeneus ro la Aleksander. D̄ua dou ede wa'ura hukum b̄a nahu kai d̄onggoku d̄i Ibilis, loakud̄u siad̄oho tana'o dengga i'a ra b̄a'a Ruma Hatalla.
Currently Selected:
1 TIMOTIUS 1: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
