1 TESALONIKA 2
2
Karawi la Paulus d̄i Tesalonika
1Cina ra angi! Ndai nggomid̄oho mab̄adeku b̄a one maikai nami d̄i nggomid̄oho wati lao ncauna. 2#Kis. 16:19-24, 17:1-9 Nggomid̄oho mab̄adeku b̄a one sawatipu mai nami d̄i nggomid̄oho d̄i Tesalonika, nami wa'ura kancoki ro kab̄awa ra katuna b̄a dou d̄i Filipi. Pala konena mboto dou ma ao nami, Ruma Hatalla ndai wa'ura mbeina nami disa d̄i ngoa ra kahabakaimu d̄i nggomid̄oho Haba Mataho ma ramai ta Sia. 3Rarece b̄a nami d̄i nggomid̄oho laina sab̄ua mancara; lai rauna kai nia mawati raso atao d̄i ne'emu tipu. 4Wati! Nami wati nuntu ra nggahimu d̄i kasanamu ade dou, malaisi d̄i kasanamu ade Ruma Hatalla, ma ujina ade nami. B̄ara nami rawi'ikai patu b̄a Ruma Hatalla d̄imangoa ra kahaba Haba Mataho ede. 5Ndai nggomid̄oho mab̄adeku b̄a one watipu parana nami makantika nggahi ra eli atao makeko nggomid̄oho d̄i cilikaimu nia mana'e ade. Ruma Hatalla masakasina! 6Nami wati ne'e raumu ngupa ncai d̄i rakakaimu roi b̄a dou – nataho rad̄i nggomid̄oho ro rad̄i dou makalai. Sapodakaina kai rasu Al Masih, nami maloa raumpa raho pakasa au-au rad̄i nggomid̄oho. 7Pala nami karawi kai mapu ra tika nggahi ra eli wakatu waramu d̄i woha nggomid̄oho, b̄une sab̄ua ina makab̄ua kataho anad̄ohona. 8B̄ara meci ra ca'u nami, nami mangawa mbei d̄i ru'u b̄a nggomid̄oho lai mpoana Haba Mataho ma rad̄i Ruma Hatalla ede, pala mori nami rau. B̄ara nami mawancuku meci ra ca'umu nggomid̄oho! 9Tantu nggomid̄oho mbuipu kawaramu b̄une usaha kapoda b̄a nami. Aimarai aimangad̄i nami karawimu b̄ab̄aina nami wati kasusamu kone sab̄ua dou rau d̄i weki nggomid̄oho aipu wakatu nami ngoa ra kahabamu Haba Mataho rad̄i Ruma Hatalla ede d̄i nggomid̄oho.
10Nami morimu kai maraso, ncihi ro wati wara ma'ihamu d̄i nggomid̄oho ma wa'ura imbi d̄i Al Masih. Nggomid̄ohoku sakasi-sakasi nami, ndede rauja Ruma Hatalla. 11Nggomid̄oho mab̄adeku b̄a one rakarawi b̄a nami d̄i cua-cua nggomid̄oho b̄une karawi ama d̄i anad̄ohona. 12Nami mangoa ra tei kataho nggomid̄oho, nami marundu nggomid̄oho ro nami makau pakasa nggomid̄oho loakud̄u nggomid̄oho morimu kai mataho poda ndad̄ina kasanamu ade Ruma Hatalla. B̄ara Ruma Hatalla wa'ura ouna nggomid̄oho d̄imandad̄i ela Karaja'an Allah ro d̄ima'iu d̄ese ra ntasa-Na.
13Wara wali sab̄ua lampa rawi makalaina ma kandad̄ina nami renta tarima kasi ncau d̄i Ruma Hatalla. Lampa rawi ede eded̄u, b̄a one wakatu nami karonggamu haba rad̄i Ruma Hatalla d̄i nggomid̄oho, nggomid̄oho maringaku ro tarimamu haba ede laina kai haba rad̄i manusia, pala kai haba ma poda-poda rad̄i Ruma Hatalla. Siaku ma wunga karawi d̄i ade weki nggomid̄oho ma imbi d̄i Al Masih. 14#Kis. 17:5 Cina ra angi, lampa rawi ra'iu b̄a nggomid̄oho wa'ura iu rau b̄a ela-ela Ruma Hatalla d̄i Yudea ma ndad̄i ntau Ruma Isa Al Masih. Nggomid̄oho ma'iu susa ra ncoki rad̄i bangsa ndaimu, sama b̄une ra'iu b̄a ela-ela Ruma Hatalla d̄i Yudea ede rad̄i dou-dou Yahudi. 15#Kis. 9:23, 29, 13:45, 50, 14:2, 5, 19, 17:5, 13, 18:12 Dou-dou ede ma rade Ruma Isa ro nabi-nabi, ro marakancokina nami. Siad̄oho musu kampoina dou, ro Ruma Hatalla wati ca'u podana d̄i siad̄oho. 16Bahkan siad̄oho matapa-tapana nami d̄i kahabakaimu d̄i bangsa-bangsa malaina Yahudi haba ma loana kasalama bangsa-bangsa ede. Kai ndedena dou-dou Yahudi ede nanaha sala'i ncauku dosa-dosa siad̄oho sampe ncihi orena. Ro ake siad̄oho cumpukaina hina mbani b̄a Ruma Hatalla!
La Paulus nane'e lao lamba dou-dou Tesalonika sakali wali
17Pala cina ra angi, ra'aipu nami ngalamu samporo wakatu lab̄o nggomid̄oho – ncengga d̄i mada pala wati d̄i ade – nami nanaha lingi ademu d̄i nggomid̄oho ro mane'e usaha poda-poda d̄i ne'ekai eda angi wali lab̄o nggomid̄oho! 18Nami mania lao lamba nggomid̄oho; ro nahu, wa'ura cobaku sakali d̄ua kali, pala Ibilis matapana nami. 19Poda nggomid̄ohoku d̄i ne'e ro neokai ade nami. B̄ara pea nggara namaisi Ruma Isa, ro ndai d̄imasatando-Na, ndad̄i nggomid̄ohoku d̄imandad̄i banggakai b̄a nami! 20Poda nggomid̄ohoku d̄i banggakai b̄a nami ro d̄ihikai ade nami!
Currently Selected:
1 TESALONIKA 2: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
