1 TESALONIKA 1
1
1 #
Kis. 17:1
Cina ra angi ela Ruma d̄i Tesalonika, ma ndad̄i ela Ruma Hatalla Ama ndaita ro Ruma Isa Al Masih:
Nami, eded̄u Paulus, Silas, ro la Timotius mapamao raho-raho to'impa Ruma Hatalla mbeina bareka ro taho ra ntai d̄i nggomid̄oho.
Mori ra woko ro imbi dou-dou Tesalonika
2-3Nami syuku ncaumu d̄i Ruma Hatalla b̄ara nggomid̄oho sara'ana. D̄isanikina do'a nami d̄i Ruma Hatalla ro Ama ndaita, nami makawara ncauku nggomid̄oho. Nami mado'a ncauku d̄i ru'u b̄a nggomid̄oho. Nami kawaramu b̄une nggomid̄oho katadamu d̄i ade ruku ra rawimu b̄a one nggomid̄oho imbimu d̄i Al Masih, b̄uneku nggomid̄oho meci ra ca'umu dou makalai ndad̄ina karawi weamu ru'u siad̄oho, ro b̄uneku nggomid̄oho ne'e podakai b̄a ademu d̄i Ruma ndai Isa Al Masih. 4Nami mab̄adeku, cina ra angi, b̄a one Ruma Hatalla mameci ra ca'u nggomid̄oho ro mawa'ura kad̄ale nggomid̄oho ndad̄i ntau-Na rakalai ndai. 5B̄ara nami karonggamu Haba Mataho d̄i nggomid̄oho laina kai nggahi ra eli mpoa, pala kai kuasa rau lab̄o kai Roh Allah. Ro nami ma'imbi podaku d̄ilampa rawi mancihi rad̄i Haba Mataho ede. Nggomid̄oho mab̄adeku b̄uneku nami morimu d̄i paralukai b̄a nggomid̄oho wakatu nami waramu d̄iwoha nggomid̄oho. 6#Kis. 17:5-9 Nggomid̄oho b̄atumu conto ruku ra rawi nami ro conto Ruma. Konena nggomid̄oho nawancuku ncoki iumu, nggomid̄oho tarima aomu kai neo ademu haba rangoa b̄a nami d̄i nggomid̄oho. Neo ademu ede rambei b̄a Roh Allah. 7Kai ndedena nggomid̄oho mandad̄i conto d̄i ru'u b̄a samenana dou ela Al Masih ma d̄i Makedonia ro Akhaya. 8B̄ara ratampu'u d̄i nggomid̄oho, haba mab̄oha Ruma wa'ura mbou sampe aka Makedonia ro Akhaya. Ro laina ede mpoa; bahkan haba mab̄oha rab̄unena nggomid̄oho imbimu d̄i Ruma Hatalla wa'ura rongga tab̄e-b̄e, ndad̄ina nami wati paralu walina nggahi au-au. 9Samenana dou manuntu mab̄oha rab̄unena nggomid̄oho tarima aomu nami aipu nami ntoina maimu d̄i nggomid̄oho. Siad̄oho nuntu ra nggahina mab̄oha rab̄unena nggomid̄oho tu'u wi'imu berhala-berhala ro maimu d̄i sab̄uampa Ruma Hatalla ma mori d̄imandad̄i ada Sia. 10Siad̄oho nuntu ra nggahi rauna mab̄oha rab̄unena nggomid̄oho mane'e poda maina Ana Ruma Hatalla rad̄i saroga, eded̄u Ruma Isa, ma wa'ura kamori mbali b̄a Ruma Hatalla rad̄i madena. Ruma Isa edeku makasalamana ndai rad̄i mbani Ruma Hatalla ma d̄imamai kento.
Currently Selected:
1 TESALONIKA 1: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
