SADEONG 94
94
Mian Bisa adiliyo sasaibino komian
1Oh Mian Bisa, Ikoomokai ko Mian Bisa momoola mobalase,
oh Temeneno, tudoikenemokai Komupabalas.
2Oh hakim posaapon kodunia, kokondongokai,
ukumemokai komian mobabanggaal posukotii konapo kokubai.
3Oh Temeneno, polong oila kotempono komian molokis nalabalabaan?
Polong oila kotempono, oh Temeneno?
4Yanila masakukon bantilan-bantilan molokis,
tukon konapo kulokisan yanila babanggaakene.
5Oh Temeneno, yanila lailanggenemokai Komu mian,
tukon tutukiyomo Komu mian pilih.
6Kobalu-balu tukon pau tuboon yanila akateyo
tukon mian molulubaton modungul nai tano nia.
7Konapo bantilano, “Ko Temeneno aki nakitayo,
Yakub na Mian Bisa aki naparhatikanggene.”
8Eh daku bangsa, inakai pobonggu buno doi yaniladoo,
kakatekai mopakeyo komu akal!
9Mian Bisa komo kubaiyo kotolingainggita,
oilakai dotolingganggitadoo aki namoola molongol?
Yana komo kubaiyo komatanggita,
oilakai domatanggitadoo aki namoola kitayo?
10Yana komo otunggule ko bangsa-bangsa,
oilakai Yana aki namoola hukume?
Sasaibino komian Yana koguluno,
kalu bunodoiya oilakai Yana aki napandoiy?
11 #
1Kor. 3:20
Ko Temeneno toiyo kobanggapi napikiran,
Yana toiyo sasaibino akiyo kotakoso.
12Oh Temeneno, kinatauwankai Ikoo mootunggulemo komian,
Komu hukum-hukum Ikoo otunggulikenemo komian.
13Doi oloyo-oloyo na susaan ikoo beena tanaangan doi yana,
kobitu mokinali tuuk malahoan mian molokis.
14Sabab ko Temeneno aki naotinggale Konamian;
Yana aki naikon nabatadikene Kona pusaka.
15Maka kohukum naikon inokoonggol koidan doi pengadilan,
sasaibino komian mojujur yanila dukunge.
16Dio mian molokis salaano inde komo belaaku?
Indee komo pomeenggon tukon yaku molawane
komian momokubai lokis?
17Kalu andeno ko Temeneno aki natulungiyaku,
pasti yaku biol doi mian mate nadunia.
18Doi tempo kubapikiran baikon yaku naikon tuwongo,
Temeneno, Komu maasi kubaiyaku kokondong monggol.
19Kalukai konoanggu susa tukon matakut,
Ikoo hiburaku tealikanaku laba.
20Ikoo aki mupomeenggon tukon hakim-hakim molokis,
mopikikene kokulokisan luwedoi hukum.
21Yanila pomeenggon molawane komian momoloyos konoano,
tukon hukume mate komian moakiyo kona sala.
22Bai ko Temeneno doiyamo daku pembela,
daku Mian Bisa teali kusoopan.
23Yana hukume komian molokis pokokonoy kona kulokisan,
tukon tealikene yanila akiyono koalalo sabab nadosa.
Ko Temeneno nda Mian Bisa naikon kukupe kobabanoila.
Currently Selected:
SADEONG 94: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
