SADEONG 91
91
Soopan doi Mian Bisa lalomo
1Komian mosoop doi Mo Tatandak Tuuno,
tukon dunggol doi Mo Babasal Kona kuasa lalomo,
2moola bantile doi Temeneno,
“Ikoomokai daku pembela tukon daku soopan,
daku Mian Bisa, doi Ikoomokai daku maanggaan.”
3Yana naikon olupute ikoo luwedoi silakaan motosookon,
tukon luwedoi sesel mobabayo komatean.
4Yana naikon itolungiyo ikoo tukon kapilo,
tobikon doiya ikoo aman doi Nabasooponan lalomo;
Kona sotiaan pokakana kotompide mupangaliu.
5Kosilakaan doi tempo popook inai momatakutene,
kai linobosian mososinggot doi namadialanan;
6doi tempo kalipookan naikon lubat kobalaa,
kai inakamanasan motepak doi nasuunan kooloyo.
7Maukai 1.000 komian momate doi lisukomu,
tukon 10.000 doi limamu bakalinggano taalikon,
bai koomu susuumu aki naikon mupakolon.
8Kalu ikoo mbaleng doi mupotikunggonan,
ikoo kitayo komian molokis kanakon pabalas.
9Sabab ikoo tealikene ko Temeneno mupembela,
Mo Tatandak Tuuno ikoo tealikene musoopan.
10Maka ikoo aki naikon mukanakon balaa,
kobalaa motepak aki naikon nakanakon komubunoa.
11 #
Mat. 4:6; Luk. 4:10 Ko Mian Bisa sumboliiyo Kona malaekat modagaiyo ikoo,
sulano naeseepe ikoo doiyayamo tolong komutausan.
12 #
Mat. 4:6; Luk. 4:11 Yanila naikon bingkate ikoo doilimamu palalaino,
sulano koaimu aki natakait doi batu.
13 #
Luk. 10:19
Ikoo naikon lumbaiyo kobindda tukon singa,
piike kosinga mongula tukon binda moupason.
14Ko Temeneno bantile, “Komian moiyase Yaku naikon Yaku salamatene,
komo akuiyo Yaku naikon Yaku lindungiyo.
15Kalu yana uwang doiya-Ku,
Yaku naikon timbiliyo.
Doi kasulitan tempono, Yaku naikon tulingiyo yana;
Yaku naikon olupute yana tukon Yaku beena pongodotii.
16Yaku naikon akambule yana tukon nabulusanan kona umur,
tukon Yaku salamatene.”
Currently Selected:
SADEONG 91: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
