SADEONG 83
83
Sambeang makabian tulung molawane komusuh
1Asaf na Sadeong doi Temeneno: Meeng konyanyian.
2Oh Mian Bisa, inaikai mobabongoli,
inai moosipute kolimamu tukon tongo dungol batingaakon.
3Kitayokai komusuh mobukal konoano,
komian-mian momosikitene Ikoo yase molawane Ikoo.
4Yanila mokubai tetel molokis sulano napo lawane komumian;
tukon yanila pobasalitaikene bulaando koakalo kolawanano komumian-mian ikoo modagaiyo.
5Konapo bantilano, “Maimo nda akamanase kobangsa Israel,
sulano kosambunoila akimo naninonook.”
6Kobangsa-bangsa lapamo pomeenggon,
tukon lapamo pomeenggon pikiran molawane Ikoo:
7kobangsa Edom tukon Ismael,
ko Moab tukon Hagar mian-miano;
8kobangsa Gebal, Amon tukon Amalek,
kobangsa Filistin tukon ko Tirus tumbuno.
9Tukon koidan ko Asyur miano pomeenggono pikiran tukon yanila,
sulano nawakiliyo Lot nakaturunan.
10 #
Tan. 4:6-22, 7:1-23 Lakukenekai yanila pokakana ko Median miano,
pokakana Sisela tukon Yabin doi Kisyon Paisunobatango,
11molapamo minanas lapus doi Endol,
tukon tealikene pokolumbang buta.
12 #
Tan. 7:25, 8:12 Lakukenekai konapo pamarentah pokakana Oreb tukon Zeeb,
akalayokai konapo katua pokakana Zeba tukon Salmuna.
13Sabab yanila bantilemo,
“Main nda dungoliyo ko Mian Bisa nabuta dungulan.”
14Oh Mian Bisa, tipasenekai yanila napokakana ko ambata,
pokakana kolabuwe batango momotuulo mopinuul mbombuul.
15Pokakana kobilat molalakene kobabono,
kobilat laango molalakene kobunggul-bunggul.
16Lelenggenekai yanila tukon Mukuasa
mobukuan pokakana kosokoi mososinggot
tukon tealikene yanila ngginggim tukon Domu sokoidoo.
17Oh Temeneno, batadikene napo tinotulai,
sulano napo akuiyo Komu kakuasaan.
18Batadikenemokai napo sidutu inakkamaa sulano napo matakut,
batadikenemokai napo mate doina kulokisan tuuno.
19Boliisi napo toiyo tongo Ikookai Mo Tatandak Tuuno.
Temeneno, mokuasaiyo posaapon kodunia.
Currently Selected:
SADEONG 83: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
