SADEONG 66
66
Nyanyian nggaalano ko Temeneno tukon sukuur
1Tuuk mokatuaiyo konyanyian. Meeng konyanyian.
Pokokuweis-kokuweiskai tuuk doi Mian Bisa, eh sasaibino komian doi dunia!
2Pomanyanyikai tukon poakabasalekai Kosambuno,
poodotiiyokai Yana tukon pongganggaale.
3Pobantilekai doi Mian Bisa,
“Tutuu Komukokubai minasaindinggon tuuno!
Komusuh somba doi-Koo tukon matakut,
sabab komukuasa babasal tuuno.
4Posaapon Komian doi dunia somba mososubaikon,
yanila manyanyi nggaale Kosambumu.”
5Polubatokai tukon pombalengekai ko Mian Bisa nakokubai,
tutuu kobangkapi masaindinggene Konalimang.
6 #
Tob. 14:21; Yos. 3:14-17 Kotobun Yana boliiyo teali buta motuul,
komai tulunan pintosiiyo tukon ampakon aiai.
Maka teali labalaba sabab Nakokubai.
7Yana maparentah tukon inodotii
tuuk sidutu-posidutukon.
Kobangsa-bangsa Yana dagaiyo,
sulano komian moiyase nggimal aki naamoola tealikene babanggaal doiya-Na.
8Ponggaalekai komai Mian Bisa, eh komuyu ko bangsa-bangsa,
pelenggenekai komunggaalano doiya-Na!
9Yana dagaikamimo sulano mai tataap tubo,
tukon aki nasobiikami tuwong.
10Oh Mian Bisa, Ikoo lapamo ujikami
pokakana komian mosopu suasa doi bilat lalomo.
11Ikoo batadikanggami tuwong doi bitu lalomo,
tukon Ikoo beenggami tanggungan motoong.
12Ikoo batadikene mai pinipiik musuh,
kami pintosiiyo koeyaba tukon bilat.
Bai budodoiya Ikoo lapamo babakami
doi lipu mosanaang.
13Yaku naikon makanggi sosubakon mosinua doi Mu Bonua
tukon yaku tapatiyo daku dandi doi-Koo,
14dandi yaku mobantile
doi tempo kususaan lalomo.
15Yaku mososubakon doi-Koo
sosubakon mosinua moluwedoi iyayon mopinilimo,
mbembe domba tukon sapi langgilo,
kotibolungo kalikuulan doi timbu.
16Polubatokai tukon polengelekai, eh sasaibino komian momoliyous,
tukon naikon yaku basalitakene oila komo lapamo ko Mian Bisa lakukene doiyaku.
17Yaku lapamo uwang makabi tulung doiya-Na;
budodoiya yaku nggaale tukon manyanyi doiya-Na.
18Kalu andeno yaku sanaang mopikikene kokulokisan,
pasti ko Temeneno aki naiyase molengele.
19Bai ko Mian Bisa lapamo longolaku,
Yana perhatikanggene daku kakabi.
20Yaku nggaale ko Mian Bisa sabab aki Natolayo daku sambeang,
tukon aki natade mamaasikanaku.
Currently Selected:
SADEONG 66: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
