SADEONG 55
55
Sambeang makabian soopan motuuk doi musuh
1Tuuk mokatuaiyo konyanyian. Tukon naminaenggonan kokacapi. Daud nanyanyian pongotunggul.
2Oh Mian bisa, lengelekai daku sambeang,
inai mototonggulunge daku kakabi.
3Palaatikangganakukai tukon timbiliyakukai,
yaku manas sabab kususaan.
4Konoanggu aki sanaang sabab yaku linubotii tukon linobosi musuh
tukon mian lokis napalainglainggon.
Sabab yanila tealikene susah, daku tuboan,
tukon koidan napo nggimalan musuiyo yaku.
5Konoanggu susah tuuno,
komatean tealikene konoanggu matakut.
6Yaku tinutupi bubusakan tukon matakutan,
tinitiiki luwe palasaan mosilaka.
7Ah, kalu andeno daano kokapilonggu buno lapatiing,
yaku naikon benga moumbolii lipu moaman.
8Ode, yaku naikon benga dodoon tuuno,
tukon dungol doi padang lalomo.
9Yaku naikon basadiamo momoumbolii lipu soopan
tuuk mobulenggene kosokoi.
10Oh Temeneno, tealikene napusing daku musuh-musuh,
nggabutekai konapo basalitaiyan
sabab doi kota yaku kitayo komian nabegalan
tukon kopoakatean.
11Oloyo popook yanila bailing,
lakukene kokulokisan tukon lubatene konggabutan.
12Diyaya daano kobamanasaan,
kobalai-lainggonan tukon kobatipuan marajalelamo doi labotan.
13Kalu andeno musuh mototulaiyaku,
yaku daanon momoola taane.
Kalu andeno daku musuh komo totulaiyaku,
yaku daanon momoola basookon luwedoi yana.
14Bai sabab ikoo, kotulanggu, dakusobat,
tulanggu sobat komo kulokisangganaku.
15Loluk kita polaing-laing tukon monondok,
tukon moola kaleda polaing-laing doi Temeneno Na Bonua.
16Batadikenekai daku musuh nasosinggot mate
tukon tubo-tubo bulus doi mian mate nalipu.
Sabab kokulokisan daano doi napo bonua,
doi yanila tanga-tangano.
17Bai yaku uwang doi Mian Bisa,
ko Temeneno naikon salamatanaku.
18Kooloyo popook yaku bebe tukon kokiil,
tukon Yana lengele koalalonggu.
19Yana salamatanaku luwedoi musuh namolobosian,
mopotutuundu molawanaku.
20Ko Mian Bisa momaparentah polong sidutu-posidutukon
naikon longolaku tukon lungguiyo yanila.
Sabab aki napo yase badodoloon,
tukon aki napo matakut doi Mian Bisa.
21Kotula-tulanggu looluk lobosiyo kotula-tulano,
yana akiyenggene konapaladandian.
22Konabantil-bantilan pongoluuli alus tuuno,
bai doi noa lalom moono tukon mosikitan.
Konasilingan mantalamuyuk,
bai batiik buno bakoko momamangan.
23Salakanggenekai komu matakutan doi Temeneno,
sabab Yana naikon tomboniikon;
tobikon doiya komian moloyos konoano aki Napaitaikene nalinunggui.
24Bai Ikoo, oh Mian Bisa, naikon Ikoo usekene yanila
doi leeng moatean tuuno.
Sasaibino kopotipu tukon kopangakate
aki naikon napitanga konapo umur.
Bai yaku maangga doi-Koo.
Currently Selected:
SADEONG 55: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
