SADEONG 5
5
Sambeang makabian padagai
1Tuuk komo pimpine konyanyian. Tukon maengganano ko suling. Daud na Sadeong.
2Oh Temeneno, lengelekai dakubantilan-bantilan,
perhatikanggenekai daku sinusakon.
3Danokenekai dakuinuanggon tukon tulungiyaku,
oh daku Tomundo tukon ku Mian Bisa.
4Sabab doikoo yaku baladosa, oh Temeneno,
lengelekai daku uwangan doi tempo dowa-dowa.
Dowa-dowa kubabayo daku sosubakon
tukon yaku totiiliyo komupotimbili, oh Temeneno.
5Ikoo Mian Bisa mo aki naiyase naikon kokulokisan;
komian molokis aki namoola lubat sampukon doi-Koo.
6Ikoo aki namoola kitayo komian mobabanggaal,
Ikoo mosikitene komian momakabai lokis.
7Ikoo silakayo komian-mian moyase bakala-kala,
motipuwo tukon momangakate Ikoo kitayo akiyo kotakoso.
8Bai tobikon Museang mo babasal,
yaku moola usok doi Mubonua lalomo.
Kusosuba doi Mubonua salaano momoliyous,
tukon kusombaiyo ikoo tukon pandoiyan.
9Oh Temeneno badaangkai tuuno daku musuh!
Pimpinekai yaku tuuk lakukanggene komu mongiasan,
tukon tudoikenekai komuloloon mo sio kuloloiyo.
10 #
Rm. 3:13
Sabab dakumusuh nabantilan aki namoola inangga;
yanila noano moono tetel molokis.
Yanila nabantilan-bantilan maamis tuuno,
bai yanila noano moono kulokisan.
11Ukumemokai yanila, oh Mian Bisa,
batadikenemokai naposilaka sabab napo tetel susungo.
Sikayomokai yanila sabab badaangkai kona polalim,
sabab yanila lapamo nggimal tuuk doi-Koo.
12Boliisi sasaibino komian mosoop doi-Koo laba-labamo
tukon wokon laba-laba sidutu-posidutukon.
Dagaiyokai komian-mian mokilakene Ikoo,
sulano yanila laba-laba sabab Ikoo.
13Sabab Ikoo balakaatiyo komian mosatia doikoo
Ikoo dagayo yanila tukon mumaasi.
Currently Selected:
SADEONG 5: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
