SADEONG 119
119
Temeneno Na Ukum
Konauntungan komian motaatiyo ko Temeneno naukum
1Untungokai komian mo tubo moakiyo konasala
tukon taatiyo ko Temeneno naukum-ukum.
2Untungokai komian mo loingiyo Konaparenta
tukon totubo konoano mokakaate sulano natingoniiyo ko Temeneno.
3Untungokai komian motubo motulutiyo ko Temeneno namongiasan,
tukon moaki nalakukanggene kokulokisan.
4Komu ukum Ikoo beenggami, oh Temeneno,
sulano mai lakukanggene mono-monondok.
5Boliisi tukon noanggu momoonggol
namoola kuloingiyo Komu atu-aturan.
6Kalu yaku palatikanggene sasaibino Komu parenta,
aki naikon komian namokubaiyanggu maa.
7Kalu yaku palajario Komu kaputusan mo adil,
yaku nggaalon Ikoo tukon noanggu momoliyous.
8Yaku taatiyo Komu ukum,
tobikon doiya inai mootinggalaku.
Taat doi Temeneno naukum
9Komian motabokon moola dagaiyo konatuboan sulano naakiyo konakasalahan
kalu yana tubo tulutiyo Komu parenta.
10Tukon tootubo konoanggu mokakaate sulano kutingoniiyo Ikoo,
tobikon doiya inai mosobiiyaku moisa luwedoi Muparentadoo.
11Komu otunggul yaku abese doi noanggu lalomo,
sulano naaki kubaladosa doi-Koo.
12Oh Temeneno, yaku nggaalon,
otunggulikanaku Komu katatapan.
13Babasal tuuno koalalonggu mopopitoikene
sasaibino koukum Ikoo mo beekanaku.
14Yaku laba moloingiyo Komu parenta-parenta,
pokakana yaku mototooli sasaibino kobuat kaliangano.
15Yaku yase mopalajariyo Komu kaputusan-kaputusan,
tukon perhatikanggene Komu otunggul-otunggul.
16Komu katatapan kubaiyaku sanaang;
Komu otunggul aki kutoliminggene.
Kauntungan sabab Temeneno naukum
17Boliisi nasanaang konoamu doi Mupeleleani nia,
sulano kutataap tubo tukon taatiyo komu otunggul.
18Bukayo komatanggu sulano namoola kumokita
Komu otunggul mo minasaindinggon doi Muukum lalomo.
19Aki namalumbit daku dungolan doi dunia nia,
tobikon doiya inai moseekene Komu ukum doiyaku.
20Masakit konoanggu sabab kupoloonan,
yaku yase motoiyo Komu ukum sasamba kotempo.
21Ikoo anuukene komian mo bangga-banggaal,
tukon kutuke komian moisa luwedoi Muparenta.
22Osobiiyakukai luwedoi napo pototulai,
sabab yaku lakukene Komu parenta.
23Maukai nasasaibino kosambu napomeenggon molawanaku,
bai komu peleleani nia tongo tataap pikikene Komu katatapan.
24Komu aturan-aturan doiyamo komo otunggulaku
tukon sanaanggene konoanggu.
Koiyasano motaatiyo ko Temeneno naukum
25Yaku bangokoolo doi ambata lalomo;
tobikon doiya abalinggene dakutuboan pokokonoi komu perjanjian.
26Yaku akuiyo daku kokubai, tobikon doiya Mutimbiliyaku;
tukon otunggulikanaku Komu katatapan.
27Tulungiyakukai sulano kutoiyo Komu ukum-ukum,
tukon Komu otunggul mominasaindinggon yaku naikon pikikene.
28Daku tuboan susa tuuno sabab tinepak susaan mobabasal,
tobikon doiya okoonggolaku pokokonoi Komu perjanjian.
29Dodongganakukai doi loloon mo tapa komian,
tobikon doiya luwedoi Mumonondokan, otunggulikanaku Komu ukum.
30Yaku lapamo piliyo kotaatan,
tobikon doiya Komu parenta yaku neneeke momeenggon.
31Lapamo kuloingiyo Komu aturan-aturan,
sabab doiya oh Temeneno, inai mobatadikanaku momalaat maa.
32Tukon sanaang yaku naikon tulutiyo Komu parenta,
sabab Ikoo tealikanakumo momangalati tuuno.
Sambeang makabian pangalatian
33 Temeneno, otunggulakukai Komu katatapan-katatapan alatino,
sulano kuloingiyo napolong popupuson.
34Tealikanakukai momangalatikene Komu ukum sulano kutaatiyo,
sulano kulakukanggene tukon totubo konoanggu.
35Boliisi kubataani namoonggol doi Muparenta,
sabab doiyamokai daku iniyas.
36Beenggukai kamauan sulano kutaatiyo Komuparaturan,
moliisiyo daku iyasano moteali kaasa.
37Dagaiyakukai sulano naaki kumongotunggul kolangge mo akiyo kotakoso,
beenggukai tuboan mopokokonoi tukon Komu mongiasan.
38Komu perjanjian sio Muekeenggele doi Mupeleleani nia,
Ikoo mobeekenemo doi mian motaat doi-Koo.
39Dedeenggenekai kopototulai yaku mo matakutene,
sabab tutuu konamonondokan Komu ukum.
40Beenggukai tuboan mosoodo, sabab Ikoo adil,
tukon yaku yase motaatiyo Komukaputusan-kaputusan.
Moini doi Temeneno naukum
41Oh Temeneno, tudoikanakukai bulaando Komuseangano yaku,
tukon salamatakukai pokokonoi tukon Muperjanjian.
42Sulano namoolakai kutimbiliyo komian mototulaiyaku
sabab yaku balaanggene Komubantilan.
43Tulungiyakukai sulano kusidutu bantile komokana,
sabab dakumoinian tongo doi Mukaputusan.
44Yaku yase bataani doi Muukum,
tuuk sidutu-posidutukon.
45Sulano naikon kutubo tukon aman,
sabab yaku kakaate tuuno motulutiyo Komuotunggul.
46Komuaturan yaku naikon pelenggene doi tomundo-tomundo,
tobikon doiya aki naikon kumalaat maa.
47Dakusanaangan tongo lakukanggene Komuparenta,
sabab tongo doiya dakukinilakon.
48Yaku odotiiyo tukon kilakene Komuparenta,
Komu katatapan sio kupikikene.
Manggaan doi Temeneno naukum
49Neneekekai Komu perjanjian doi Mupeleleani nia,
perjanjian mobeenggu moinian doiyaku.
50Naiyamokai komobeenggu tanaangan doi kususaan lalomo,
baikon Domuperjanjianoo beenggu tuboan.
51Komian mo babanggaal totulaiyaku tuuno,
bai aki kuisa doi Muukum.
52Yaku tataap neneeke komuukum modaanomo salataa doi looluk,
tobikon doiya konoanggu tataap tanaang, oh Temeneno.
53Doi mian mo lokis yaku nggimoliiyo tuuno,
sabab yanila tinggalemo Komuukum.
54Dakutuboan mo aki namalumbit doi dunia nia,
Komu katatapan yaku tealikene sasadoyong nggaalano doi-Koo.
55Oh Temeneno, doi napopookan tempono yaku neneeke doi-Koo,
sabab Komu ukum yaku tataap taaniyo.
56Yaku malaat kauntungan
doi taatiyano komuparenta-parenta.
Sotiaan doi Temeneno naukum
57Tongo Ikoo tolong daku iniyas, oh Temeneno,
tobikon doiya yaku berjanji naikon molakukanggene Komuotunggul.
58Tukon tootubo konoanggu momakabi Mumaasi,
tobikon doiya seseangakukai pokokonoi Domuperjanjianoo.
59Yaku pikikenemo dakukalakuan,
tobikon doiya yaku berjanjimo motaatiyo Komuaturan.
60Yaku bato-batotobomo tukon moso-mosobit tukon akimo kumototiili malumbit,
moambakonggene Komuparenta.
61Komian mokulokis pukataku,
bai aki kutoliminggene Komukum.
62Pintanga kopopook yaku bangun monggaale Ikoo,
sabab Komukaputusan-kaputusan mo adil.
63Dakuposobatan tongo mian mo taat,
tukon sasaibino komian molakukanggene Komuparenta.
64Oh Temeneno, kodunia moono tukon Mumaasi,
tobikon doiya otunggulikanakukai Komu katatapan-katatapan.
Temeneno naukum anggano
65Oh Temeneno, Ikoo daanekenemo Komuperjanjian,
tukon Ikoo kubaiyomo monondok doi Mupeleleani nia.
66Beenggukai pikiran mosehat tukon motoiyan,
sabab yaku anggayo doi Muparenta-parentadoo.
67Akiyoon kuinukum, yaku isamo,
budodoiya yaku bataanimo doi Muparenta.
68Sabab Ikoo monondok tukon mokubai monondokan,
otunggulikanakukai Komu katatapan-katatapan.
69Komian mobabanggaal bapitanaakanaku,
bai totubo konoanggu tongo taatiyo Komukaputusan.
70Domianoo aki namangalati,
bai doiyaku Domuukumoo doiyamo komo sanaanggene konoanggu.
71Takainomo tadukai Muukumaku,
sulano kutingoniiyo Komu katatapan-katatapan.
72Doiyaku Domuukumoo lobian koanggano,
doi sasaibino komosoni tukon suasa doi dunia nia.
Konadilan ko Temeneno naukum
73Ikoomokai komo kubaiyo tukon motealikanaku,
tobikon doiya beenggukai pangalatian sulano kupalajariyo Komuparenta-parenta.
74Komian mo taat naikon sanaang kalu nakitaaku,
sabab yaku tongo moini Domuperjanjian.
75Oh Temeneno, yaku baikon toiyo Komukaputusan adil,
Ikoo ukumakumo sabab Mukosetiaan.
76Boliisi Komuseang nateali kumoonggolan,
pokokonoi tukon Muperjanjian doi Mupeleleani nia.
77Mamaasikanakukai, sulano kutataap tubo,
sabab Komuukum kubaiyo sanaang konoanggu.
78Batadikenemokai komian mo babanggaal nateali mamaa,
sabab bapitanaakumo,
bai yaku tataap pikikene Komuparenta-parenta.
79Boliisi komian motaat nalubat doiyaku,
tukon sasaibino komo tingoniiyo Komuparenta-parenta.
80Boliisi konoanggu naaki naisa doi Mukatatapan,
sulano naaki kumalaat maa.
Sambeang makabian luputan
81Konoanggu peloonggene tuuno kokasalamatan moluwe doi-Koo;
tukon yaku moinikene Komuperjanjian.
82Komatanggu nggulal mototiilikon sulano Mudaanekene Komuperjanjian,
yaku bantile, “Oila kotempono naikon Komu oluputano yaku?”
83Kokulitonggu mokukut pokakana kobangabosan anggur monggunggum,
bai Komu katatapan aki kutoliminggene.
84Polong doi oila kotempono Namupeleleani nia nasabaran?
Oila kotempono naikon Komuukumano komian mololongganaku?
85Komian mo aki natoiyo Komu ukum,
makalimo bitu sulano natuwongaku.
86Sasaibino Komuukum moola nabinalaanggon,
tobikon doiya tulungiyakukai, sabab yaku linolonggon akiyo koalasan.
87Baino soisik yanila akateyakumo,
bai aki kuotinggale Komuparenta.
88Salamatanakukai sabab Ikoo tataap meseseang,
sulano kumoola taatiyo Komuukum.
Maangga doi Temeneno naukum
89 Temeneno, komufirman moonggol sidutu-posidutukon,
tataap sidutu-posidutukon.
90Komusotiaan bataanggon popupuson koloonu,
Ikoo ekeenggele kodunia sampe tataap daano.
91Diabudodonia sasaibino komodaano, daano sabab Muparenta,
sabab doiyaniladoo daanokai Mupeleleani-peleleani.
92Kalukai andeno Domuukumoo bolikon kulabaan uuno,
pasti yaku matemo doi sakisaawan lalomo.
93Momeenggon akikai kutoliminggene Komuparenta,
sabab tongo doiya Ikoo otuboiyaku.
94Salamatanakukai, sabab yaku nia koomumo,
sabab yaku kakaatemo motaatiyo Komukaputusan.
95Komian mo lokis totiilimo sulano naakateaku,
bai yaku tataap mopalatikanggene Komuukum.
96Kukitayo baikon komo talakana doi dunia nia terbatas,
tongokai Muparenta komo talakana.
Kilaano doi Temeneno naukum
97Bulaando dakukilaano Komuukum;
tobikon doiya yaku pikikene popupuson kooloyo.
98Komuparenta sidutu kuneneeke,
sabab tealikanakumo pandoi liisiyo daku musuh-musuh.
99Dakupangalatian liisiyomo dakuguru-guru napangalatian,
sabab tataap kupikikene Komuparenta-parenta.
100Dakupamahaman liisiyo koorang-orang tua napamahaman,
sabab yaku tataap motaaniyo Komukaputusan-kaputusan.
101Kudedeenggene sasaibino kokalakuan mo lokis,
sulano kutaat doi Muotunggul.
102Aki kuotinggale Komuukum,
sabab Ikoomokai komo otunggulaku.
103Bukan maen kona maamisan Komu bantilan,
kotamiso liisiyo kodokot konamaamisan!
104Komuukum-ukum beenggu pangalatian,
sampe yaku mosikitene kokalakuan mo lokis.
Temeneno naukum mebee madialan
105Komufirman teali dial doi kulaakonan,
taraang motaraangiyo daku loloon.
106Daku pinarjanjikon tukon batotopian yaku naikon tapaatiyo,
sulano kubataani doi Mukaputusan-kaputusan mo adil.
107Oh Temeneno, yaku sakisaamo tuuno,
dagaiyokai dakutuboan tukon Muperjanjian.
108Oh Temeneno, talimayokai dakusambeang basukuuran,
tukon otunggulikanakukai Komu ukum-ukum.
109Sidutu kubataanggene dakutuboan,
bai aki kutoliminggene Komuukum.
110Komian mo lokis talongganaku,
bai aki kuisa doi Mukaputusan.
111Komuparenta teali ku pusaka sidutu-posidutukon,
mokubaiyo laba konoanggu.
112Yaku yase motaatiyo Komu katatapan,
polong doi napupusan dakutuboan.
Ko Temeneno naukum kubaiyo aman kondapikilan
113Yaku kilakene Komuukum-ukum,
tobikon doiya yaku mosikitene komian mo aki natootubo setia doi-Koo.
114Ikoomokai daku pombela tukon dakusoopan,
sabab doiya yaku tongo moini doi Muperjanjian.
115Eh komian mo lokis, badodoonggonkai doi yaku!
sabab yaku yase motaatiyo daku Mian Bisa naparenta.
116Kobukuangganakukai pokokonoi tukon Muperjanjian sulano kutubo,
inaikai mobatadikanaku momanasal doi kumoinian lalomo.
117Tumbakakukai sulano kusalamat,
tukon sulano nasidutu kupalatikanggene Komuparenta.
118Ikoo tolake komian mo isa luwedoi Mukatatapan,
tongo sia-sia konapo batipuan.
119Sasaibino komian mo lokis tongo ikoo aanggene peeput,
tobikon doiya yaku kilakene Komuparenta-parenta.
120Yaku lolondong sabab kumatakutanano Ikoo,
tukon konoanggu lendeng tuuk doi Mukaputusan.
Taat doi Temeneno naukum
121Yaku lakukanggene komo adil tukon mo kana,
sabab doiya inaikai mosalakangganaku doi kulawan limano,
122Paladandimokai baikon Ikoo naikon tulungiaku,
tukon inai mobatadikanaku komian mo babanggaal nalailaingganaku.
123Moonas komatanggu momototiili Mupotulung mosalamatanaku,
tukon yaku mototiili pongoluput Ikoo mo perjanjikenemo.
124Lakukanakumokai pokokonoi tukon Mumaasi,
tukon otunggulikanakumokai Komu katatapan.
125Yaku nia mupeleleani, kubaiyakumokai momangalati
sulano kupahamiyo Komuparenta.
126 Temeneno, laatemo kotempono Komu mokubaiyan tindakan,
sabab komian lumbaiyomo Komuukum.
127Dakuiyasano Komu parenta-parenta liisiyo komosoni,
tukon liisiyo komosoni mo tulen.
128Tobikon doiya yaku tubo pokokonoi tukon sasaibino Komu potudoikon;
kokalakuan molokis yaku mosikitene.
Iyasano moloingiyo ko Temeneno naukum
129Komuaturan-aturan tutuu mo minasaindinggon,
tobikon doiya kutaatiyo tukon tootubo konoanggu.
130Kalu binasalitakon, Komuotunggul taraang tuuno doi ndapikilan lalomo,
tukon doi mian mo akinduung napandoi bai taraang doi noanoila.
131Pakandang konoanggu,
sabab poloonggene Komuparenta.
132Palosiakukai tukon mamaasikanakukai,
pokakana Komu mamaasikanano komian mo kilakonggon.
133Kobukuanggene dakulaakonan pokokonoi Komu perjanjian,
inai mobatadikanaku kukinuasai kulokisan.
134Oluputaku luwedoi mian mo lailaingganaku,
sulano namoola kutaatiyo Komuparaturan.
135Doi Mudaanoan balakaatiyakukai,
tukon otunggulikanakukai komu katatapan.
136Komatanggu paisuno lomba pokakana kopaisu lomba,
sabab Komuukum aki natinaati.
Do Temeneno doo naukum adil
137Oh Temeneno, Ikoo adil,
sasaibino Komu ukum tapaat.
138Koparenta-parenta Ikoo mobeekene
adil tukon moola naminoinikon.
139Dakunggimalan moonas buno bilat doibutonggu lalomo
sabab dakumusu toliminggene Komuotunggul.
140Komu perjanjian moonggol tukon moola nainangga,
tobikon doiya yaku kilakene tuuno.
141Yaku nia poipoisik tukon akiyo kotakoso,
bai yaku aki kutoliminggene Komuotunggul.
142Komuadilan bataanggon sidutu-posidutukon,
tukon Komuukum sidutu kana.
143Yaku tinepak kasulitan tukon susaan,
bai Komu katatapan kubaiyo laba konoanggu.
144Komu aturan sidutu adil;
tobikon doiya beenggukai pangalatian sulano kutubo.
Sambeang makabian luput
145Tukon tootubo konoanggu mouang doi-Koo;
oh Temeneno timbiliyakukai, sabab yaku yase motaatiyo Komuparenta.
146Yaku uang doi-Koo; salamatanakukai,
yaku yase mobataani doi Muparenta.
147Dowa-dowa yaku bangun tukon uang makabi tulung,
tukon yaku moinikene Komu perjanjian.
148Pomodoakon daku badagaan,
mopikikene Komuotunggul.
149Oh Temeneno, longolakumokai luwedoi Mumaasi,
tukon luwedoi Muadilan dagaiyokai daku tuboan.
150Loolanimo komian mo lolongganaku,
konapo makasuut lokis tukon aki napopusinggene Komuukum.
151Bai Ikoo loolani, oh Temeneno,
sasaibino komu parenta kana.
152Salataa doi looluk yaku toiyomo Komu otunggul-otunggul,
bai Ikoo tataapkanggenemo tuuk sidutu-posidutukon.
Sambeang makabian tulungan
153Kitayokai daku sakisaawan tukon salamatanakukai,
sabab aki kutoliminggene Komuukum.
154Belayokai daku ulusan tukon oluputakukai;
tukon salamatanakukai pokokonoi tukon Muperjanjian.
155Komian mo lokis aki naikon nasinalamaton,
sabab aki napo taatiyo Komu katatapan.
156Oh Temeneno, tutuu bisa Komu maasi,
tobikon doiya salamatanakukai pokokonoi Komu adilan.
157Badaang komian mo musuwaku tukon lolongganaku,
bai aki kutoliminggene Komu paraturan.
158Yaku mosikit tuuno kalu yaku kitayo domianoo mo lokis,
sabab aki napo loingiyo Komu otunggul.
159Oh Temeneno, kitayokai bulaando daku kilakanano Komu parenta,
tobikon doiya luwedoi Mumaasi salamatanakukai.
160Sasaibino Komu bantilan kana,
tukon sasaibino Komu ukum mo adil tataap sidutu-posidutukon.
Lakukanano ko Temeneno naukum
161Komian mo berkuasa lolongganaku tutuu,
bai tongo naukum daku minatakuton.
162Komu perjanjian kubaiyaku laba,
pokakana komeeng komian momalaat buat.
163Sasaibino kobakakalaan kaliangano yaku mosikitene,
bai Komu ukum yaku kilakene.
164Yaku momeenggon basukuur doi-Koo,
sabab Komuukum adil.
165Komian mo kilakene Komuukum aman tukon sanaang konoano,
akiyo komo moola halangiyo yanila.
166 Temeneno, yaku totiiliyo kokasalamatan mo luwedoi-Koo,
tukon Komu parenta-parenta yaku lakukanggene.
167Yaku taatiyo Komu paraturan-paraturan,
tobikon doiya yaku kilakene tukon tootubo konoanggu.
168Yaku taatiyo Komu parenta tukon komu otunggul,
tobikon doiya Ikoo sanaang mokitayo sasaibino dakukokubai.
Sambeang makabian tulungan
169Oh Temeneno, boliisi daku uwangan napolong doi-Koo,
tukon beenggukai pangalatian, pokokonoi tukon Komu perjanjian.
170Boliisikai daku kakabi napolong doi-Koo,
tukon salamatanakukai pokokonoi tukon Muperjanjian.
171Yaku yase monggaalon Ikoo momeenggon,
sabab Ikoo otunggulikanaku Komu katatapan.
172Yaku yase tuuno momanyanyikene Komu perjanjian,
sabab sasaibino Komu parenta adil.
173Boliisi konoa-Mu nasanaang motulungiyaku,
sabab yaku nia lapamo loingiyo Komu parenta.
174Konoanggu peleenggene kokasalamatan mo luwedoi-Koo,
tukon Komu ukum tealikene laba konoanggu.
175Batadikenemo kutubo, sulano kunggaalen Ikoo,
tukon boliisi Komu katatapan-katatapan natulungiyaku.
176Yaku tapa pokakana kodomba mo lapus,
tobikon doiya siokai Mulubat, tukon umboliiyokai Namu peleleani nia,
sabab akimo kupalatikanggene Komu parenta-parenta.
Currently Selected:
SADEONG 119: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
