SADEONG 118
118
Sambeang basukuuran luwedoi manaangan
1Basukuurkai doi Temeneno sabab Yana monondok,
Konamaasi sidutu-posidutukon.
2Siokai ko Israel miano nabantile,
“Konamaasi sidutu-posidutukon.”
3Siokai sasaibino koimam nabantile,
“Konamaasi sidutu-posidutukon.”
4Siokai nasasaibino komian motaat nabantile,
“Konamaasi sidutu-posidutukon.”
5Doi kususaan lalomo yaku uwang doi Temeneno;
tukon Yana timbiliyaku maka naoluputaku.
6Aki kulolondong sabab ko Temeneno lolaingaku,
kobanggapi akiyo kona kubaiyano yaku.
7Ko Temeneno lolaingaku tukon tulungiyaku,
tukon yaku kitayo daku musuh molinungguimo.
8Tadukai nasoop doi Temeneno,
kalubaino kita moinikene kobanggapi napotulung.
9Tadukai nasoop doi Temeneno,
kalubaino kita moinikene kobanggapi moinodotii natulungan.
10Badaang komusuh moboilingiyaku;
bai yaku lungguiyo yanila, tukon Temeneno nakuasa.
11Luwedoi sasaibino kotampat yanila lubat molobosiyaku;
bai yaku lungguiyo yanila, tukon Temeneno nakuasa.
12Pokakana koani konapo tokuuniano yaku;
bai yaku lungguiyo yanila, tukon Temeneno nakuasa.
Doi sopiyoman lalomo yanila pinosoi
pokakana kobilat molalakene komosolot.
13Bolikon langge daku linobosian tukon adukon yaku tuwong,
bai ko Temeneno tulungiyaku.
14Tongo Temeneno daku moinian tukon daku inangga,
sabab Yana salamatanakumo.
15Doi Namian nasandung-sandung, longol konapo wookonan sabab napo manaangan,
“Ko Temeneno lakukanggene kokokubai mobabasal tuuno!
16Tukon Temeneno nakuasa beena kita manaangan!
Tukon koidan ko Temeneno lakukanggene kokokubai mobabasal tuuno!”
17Aki naikon kumate, bai tataap yaku tubo
sulano kubabilitakene ko Temeneno nakokubai.
18Ko Temeneno sakisaakumo tuuno,
bai aki Nasobiiyaku momate.
19Bukayo ko Temeneno Na Bonua tataapono mobabasal,
sulano kuusok tukon basukuur doiya-Na.
20Naiyamokai ko Temeneno natataapon mobabasal,
tongo mian momoloyos konoano komo moola loloiyo.
21Yaku nggaale Ikoo, sabab Ikoo daanekenemo daku sambeang;
tukon Ikoo lapamo beenggu manaangan.
22Kobatu tukang-tukang bangunan mosakukene,
tealimo batu pasuno doi posaapon kotampat.
23Doiyamokai ko Temeneno nakokubai,
tutuu kita masaindinggene.
24Naiyamokai kooloyono ko Temeneno mo tantukanggene;
mai nda lamekene tukon laba-laba.
25 Temeneno, kami kabiyo, salamatanggamikai,
oh Temeneno, beenggamikai kamanangan!
26Binalakaatikai yana mo lubat luwedoi Temeneno sambuno,
tukon kami balakaati komuyu doi Temeneno Na Bonua.
27Ko Temeneno doiyamokai ko Mian Bisa,
Yana momonondok konoano doi kita.
Poambakon polaing-laing tukon pomataani kayung langa-langano
tukon poboilingiyokai ko Temeneno nabalabaan.
28Ikoo daku Mian Bisa, yaku basukuur doi-Koo,
tukon Ikoo daku Mian Bisa yaku akabasale Ikoo.
29Pobasukuurkai doi Temeneno sabab namonondokan,
Konamaasi sidutu-posidutukon.
Currently Selected:
SADEONG 118: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
