SADEONG 116
116
Luput doi silakaan
1Yaku yase ko Temeneno,
sabab Yana ndongoliiyaku tukon perhatikanggene daku kakabi.
2Yana ndongoliiyaku,
sasamba luunggon kuuwang doiya-Na.
3Yaku salaanggene kosilakaan matean;
komatakutan matean sosinggat lubotiiyaku,
kubaiyaku aki kusanaang tukon matakut.
4Maka kuuwang doi Temeneno,
“Oh Temeneno, yaku kabiyo,
salamatanakukai!”
5Do Temeneno doo daano kona seang tukon adil;
konda Mian Bisa babasal kona seang.
6Ko Temeneno pialayo komian moaki nababanggaal;
doi tempo naakiyan kubukuan Yana salamatanaku.
7Kusananggene konoanggu,
sabab ko Temeneno seseangaku.
8Ko Temeneno oluputakumo doi matean;
Yana tealikanaku sanaang tukon aki Nasobiiyaku tuwong.
9Sampe yaku lasaiyo kotuboan doi dunia nia,
luwedoi Temeneno namaasi.
10 #
2Kor. 4:13
Yaku tataap maangga, maukai kubantile,
“Yaku sakisaa tuuno.”
11Doi kusanangan lalomo yaku bantile,
“Akiyokai komeeng komian momoola inangga.”
12Oila naikon daku bineekon doi Temeneno
tuuk mobalase Konamonondokan doi yaku?
13Yaku naikon mababa sosubakon anggur doi Temeneno,
sulano kubasukuur sabab Natulungan.
14Yaku naikon tapatiyo daku perjanjian doiya-Na
doi sasaibino Konamian salaano.
15 Temeneno seseange tuuno
Kona matean komeeng komian Naminamaasikon.
16Yaku nia Mupeleleani, oh Temeneno,
pokakana kotinanggu, yaku salaakanggene kobutonggu doi-Koo
sabab Ikoo sobiiyakumo luwedoi silakaan.
17Yaku naikon mababa sosubakon sukuur doi-Koo,
tukon molibakon sambeang doi-Koo.
18Yaku naikon tapaatiyo daku paladandian doi Temeneno,
doi sasaibino Konamian salaano
19mopototongi doi Temeneno Na Bonua basaleano,
doi kota Yerusalem tanga-tangano.
Nggaalekai ko Temeneno.
Currently Selected:
SADEONG 116: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
